شۆڕش ئالان فەرماندارو یەکینەکاو ۋەرکۊتوو کورڎەسانی (یەرە کە)ی، گەشمەرڎۍ داڵاهۊیش یاڎۍ کەردێوە و داواش جە جوانا کورڎی کەرد کە تفەنگو جەنگاوەری بکەرا شانەشا و ڕا نەڎا نۊکەرا پېسە بنەیانەو بارزانی وڵاتی ڕادەسو ئەرەگیرا بکەرا.
شۆڕش ئالان فەرماندارو یەکینەکاو ۋەرکۊتوو کورڎەسانی (یەرە کە)ی بۊنەو ٩ەمین ساڵڕۊو گەشمەرڎا داڵاهۆیۆ ئاڎێش یاڎۍ ئاوردۍ و پێسە هورسەنگنایش کەرد:
"ئارۆ ٩ەمین ساڵڕۊو شەهادەتوو هەڤاڵاما فەرمانداری گەشمەرڎە لەشکەر جودی ،عەلی شێر ئامەد، میرخاس زیلان و برووسک مەریوانین کە جە ئاکامو پیلانگێڵنی و پەلامارەو سپاو ئەرەگیرکەرەو پاسدارا بڕۍ جاشانە جە داڵاهو و سەلاسی باوەجانینە یاوۍ بە پلەو شەهادەتی و حەرپاسە دە یەمین ساڵایاڎو تراژدیای کۆمکوژی هەرە گۊرەو سەڎەو ٢١ین کە سەرو گەلوو شەنگالیرە ئاما و گەلەکەما ڕوو بە ڕوو کۆمکوژیێوە گۊرەی بیۆ؛ هەرپۊکەی هەم هەڤاڵە گەشمەرڎەکاما جە داڵاهو هەم گرڎوو گەشمەرڎا گەلەکەیما جە شەنگالەنە بەرێزو پنەزانایۆ یاڎۍ مکەرمێوە. حەرپاسە کە پەی ڕای گرڎی ئەرەیاۋنابێما جە ١٤و ئی مانگېنە بەمەڵامەتوو هرووژم و فرۆکە جەنگیەکا دەوڵەتو فاشیست و ئەرەگیرو تورکیەی پەی سەرو هەرێموو پێنجوێنۍ کە جە ئاکاموو ئا هرووژمەینە یەرۍ هەڤاڵېما بە نامەکا جەنگاوەر میکاییلی و ڕامان ڕێناسی و ئاندۆک تۆڵهەڵدانی یاۋۍ بە پلەو بەرزو شەهادەتی جارێوەتەر جە کەسایەتی هەر یەرە هەڤاڵی گەشمەرڎەیمانە گرڎوو گەشمەرڎا ڕاو ئازاڎیی کورڎەسانی بەڕێزو حورمەتۆ وە یاڎ مارمېوە و سەرەما ئاستشانە منامنمېرە و قەولما واوەی مکەرمېوە کە هەتا بەدیئامای خیاڵ و مەرامەکاشا ئەرەکۊشایما بە گڕ و تینۆ هەتا سەرکۊتەی بەردەوام بکەرمۍ.
هەرپاسە شۆڕش ئالان هرووژمە ئەرەگیرکەریەکۍ دەوڵەتو فاشیستی تورکیش پەی سەرو بادینانی و خییانەتو بنەیانەو بارزانیش پی جۆرە هۊرسەنگنۍ:
هەرپاسە کە گەلەکەما جە کورڎەسانەنە ئاگاڎارێنۍ ئانە چن ساڵېوەن جەنگێوە قورس و بێ ئەمان جە کورڎەسانەنە ملۆڕاوە. بەتایبە دەوڵەتو فاشیست و قڕکەرو تورکی مەتڵەبشا جە سەرنیشت و پانیشتوو کورڎەسانینە گرڎوو دەسکۊتەکا گەلوو کوردی دلېنە بەرۆ پی جۆرە ئانەی کە سەڎ ساڵی ۋییەردەنە نەتاواش سەرو کوردارە بارۆش یانێ پاکتاوکاری و بە کویلە کەردەی گەلوو کوردی؛نیازشا جە سەڎ ساڵی دووەم و دەوڵەتی ۋێشەنە بەهامکاری هێزە خیانەت کارەکا و نۆکەراو بەکرێ گرتا کوردی یانێ بنەیانەو بارزانی پ.د.ک و پا هرووژمەی کە جە هەرێموو بادینانینە دەسش پنەکەردەن جە کەسایەتی گەریلاو ئازاڎیی کورڎەسانینە ئیراڎەو گرڎوو گەلوو کورڎی بماڕۆ بەڵام گەلەکەما و تەماموو ئا گەلا کە چی هرووژمانە زەرەر و ئێششا دییەن بە وریایوە خاوەن هەڵوێسێنۍ و داواو یۆگێرتەیی مکەرا، چېگەنە ئیتر تەنیا ئەرکو تاکو کوردی ئازاڎیی و وڵات پارێزنی نیا بەڵکم ئەرکو گرڎ کەس و لایەنێوەن جە ۋەرا ۋەرو ئی ئەرەگیری و خیانەتەینە هەڵوێسی کرداری برمانا ۋەروو ئانەی تاریخ سەلەمنانش کە ئەرەگیرەکۍ بەتایبە تورکیا گرفتش تەنیا چنی شۆناسو کوردی ئازاڎیی نیا بەڵکم مەرامش پاکتاو کەردەی گرڎوو گەلوو کوردین و ئەرەگیرکەردەی کورڎەسانیا بەڵام بنەیانەو بارزانی سەرەڕاو ئانەی کە ئینەیچە مزانۆ دیسان بیەن بە چەمساغوو دەوڵەتو ئەرەگیرو تورکیەی و ڕاسە و ڕاس دوژمنایەتی گەلوو کوردی مکەرۆ هەر پۊکەی هەر تاکێوە کوردی مشۆم هێڵۊو ۋێش دیاریە بکەرۆ و خاوەن هەڵوێس بۆ ۋەرو ئانەی چی جەنگەنە بێ لایەنی قبووڵ نمەکریۆ،ئانێچ کە عال چی مژاریە نەیاۋێنێنە مشۊم عال بزانا ئانەی کە شێخ عبدول السلام بارزانیش جە قەنارەدا ئارۆ نەوەکۍ ئاڎینۍ کە بۆمبۍ سەرو کورڎەسانیرە ۋارنا پۊکەی پەنەوازا دەرس جە تاریخی هۊربگێرا بزانا ئانەی کە هۆڵاکۆ خان سەرو مۆستەعسەمی عەباسیرە ئاوردش ئارۆ ئەردۆغان و فاشیستا تورکی سەرو بارزانی و بنەیانەکەیشەرە ماراش هەرپۊکەی پەی هەر کوردێوە بەشەرەفی شەرمێوە فرە گۆرەن قبووڵ کەردەی ئی خییانەت و تەسلیمیەتیە ئانەیچ تاریخ سەلەمنانش خیانەت مەردەین و ئەرەکۊشای و مڎرامان سەرکۊتەی و ژیۋاین.
حەرپاسە هرووژم پەی سەرو ژیۋگەو زاگرۆسی و بەتاڵان بەردەی سرووشت و ئی وڵاتەیشە پی جۊرە هۊرسەنگنا:
هەمدیسان ئێساڵ کۆمکوژی و قڕکەردەی ژیۋگەو کورڎەسانی جە لایەنو بەکرێ گرتا و دوژمنا ژیۋگەیۆ جە دارسانەکا زاگرۆسی، پاوە، مەریوان،جوانرۆ و چی دماییەیچەنە کامیارانەنە لواڕاوە. جاشەکۍ و کەسانۍ سەر بە رژێمی جە هەر هەلێوەنە پەیشا دەس بڎۆ دارسانەکا ئێمە سۊچنا بەڵام چی ڕێچەنە کەسانۍ ژیۋگە پارێزنۍ و بەقیمەتۍ و نیشتمان دۆسۍ بە بەردەوامی ئینۍ ئەرەکۊشاینە و هەوڵ مڎا ژیۋگەو وڵاتەکەیشا پارێزنا و هەتا دما نەفەس چا ڕێنە لا مەڎا؛ چی ئێرە دماینەو کامیارانینە ژیۋگە پارێزن و کەسایەتی بە قیمەتو شارو مەریوانی کاک ئیسمایل کەریمی گیانی ئازیزیزش بە سرووشتوو وڵاتەکەیش بەخشا هەر پی بۆنۆ سەرەوەشی ۋێما ئاراسەو بنەیانەو بەڕێزیشا و گلێرگەو ژیۋگە پارێزنی و تەمامو گەلەکەیما جە ۋەرکۊتوو کورڎەسانینە مکەرمۍ
شۆڕش ئالان جە دمادمایی قسەکاشەنە داواش جە جوانا کورڎەسانی بەتایبەت جە جوانا شارو مەهابادی و سنەی کەرد کە چەکوو جەنگاوەری بکەرا شانەشا و خاوەن داری جە وڵاتوو ۋێشا بکەرا و نازا نۆکەرا پېسە بنەیانەو بارزانی وڵاتی ڕادەسو ئەرەگیرا بکەرا. جە دماینە قەسەمش وارد و قەولش دا بە گرڎوو گەشمەرڎا و گەلەکەیما و ئەڎایا گەشمەرڎا بەتایبە ئەڎا حەلیمۍ و ئەڎا نەهیە ئەڎایا گەشمەرڎا جەنگاوەری و ڕامانی کە بە خاستەرین شێوە حەقەو گەشمەرڎا بسانمۍ.
