هامسەرۆکایەتیی کۆنسەو ڕاوەبەریی کەجەکەی جەساڵوەگێڵوو هجوومو داعشی پەی سەروو شەنگالی ئەرەیاوناێوەش وەلا کەردۆ و ئاماکەش پانەیە دا، تەڤگەروو ئازادیی کوردسانی گرد وەختێو ئینا چەنی خەڵکوو شەنگالی
کەجەکە یادوو قوربانییاو فەرمانەو ٣ی ئابوو٢٠١٤و شەنگالی مکەرۆوە و واتش: "بەڕێزۆ یادوو قوربانییاو کۆکوشیی شەنگالی مکەرمێوە و پێسەو تەڤگەروو ئازادیی کوردسانی گرد وەختێ ئیناێمێ چەنی خەڵکوو شەنگالی."
هامسەرۆکایەتیی کۆنسەو ڕاوەبەریی کەجەکەی ئاماژە پانەیە مکەرۆ کە گردوو ئا کەسا ماچا کە دژوو قڕکەردەینمێ و وەڵی گردیوە دەوڵەتوو عێراقی، پەنەوازا جەنی کۆشیای ڕەواو دیموکراتیکوو خەڵکوو شەنگالی بانە و واتش: "پەنەوازا ئیرادەو خەڵکوو شەنگالی و داوای دیموکراتیکە و ڕەواشا وەرەچەم بگێرا و پێسە قۆرتەکا چارەسەر بکەرا. فرە درووسا کە قۆرتەکاو خەڵکوو شەنگالی سەروو بنەماو دیالۆگی و مافە دیموکراتیکەکا چارەسەرێ بکریا."
ئەرەیاونایەکەو هامسەرۆکایەتیی کۆنسەو ڕاوەبەریی کەجەکەی ئیەنە:
" ٣ێ ئابوو ٢٠١٤ بە دەسوو چەتەکاو داعشی شەنگالنە دژوو گەلەکەیما فەرمانەش کەردە، ماوەو ١٠ ساڵا ملوو ئی فەرمانێرە ویەردەن. قڕکەردەی شەنگالی یۆ جە حەرە دڕندانەتەرین وڕکەردەیەکاو تارێخوو ئینسانین. گردوو ئا هێزا کە دەسشا چەنەش بێ واوەی بە تووڕەییوە فرەوە شەرمەزار مکەرمێ. بەڕێزدارییوە گردوو ئا کەسا کۆکوشییەکەنە مەردێ یاد مکەرمێوە. ئی ئازارێ کە خەڵکوو شەنگالی و گردوو گەلوو کوردی هەستش پەنە مکەرا دلێمانە مژیوۆ. پێسەو تەڤگەروو ئازادیی کەردی پێسەو هیزی ئارۆیچەنە ئیایمێ چەنی خەڵکوو شەنگالی و بە وەرپەرسیی ئینسانی و تارێخی و نەتەوەیی و وەڵاتپارێزنییوە هامبەشی ئازارەکاشانمێ.
بەداخۆ کۆکوشیی شەنگالی ورەچەماو دنیێوە کریا، کەچی دنیا وەراوەروو ئینەیوە بێدەنگ و بێهەڵوێست مەنۆ. چە ژەنی و چە زارۆڵێ و چە پیرێ دڕندانە بە هامڕایی ڕژێموو ئاکەپەی و چەتەکاو داعشیوە کوشیێ، دەسدرێژی کریا سەروو هەزاران ژەنا و هەزارانیچ ورەشیێ. چندین ژەنێ ئێزدیێ وێسا کوشت تا نەگنا ئا دۆخە دڕندانەوە. هەڵا بە هەزارا ئێزدیێچ بێسەروشۆنێنێ و نمەزانیۆ ئینێ چکۆ و دەسوو کێوە. خەڵکی ئێزیدیما کۆکوشیی شەنگالێ پێسەو ٧٤ەمین فەرمانێ پێناسە مکەرۆ. ئی کۆکوشییە پێسە یۆ جە دڕندانەتەرین کۆکوشییەکا تارێخی ئاما دلێوە، کە ئامانجش دلێنەبەردەی هەقەتینوو گەلوو ئێزدیما بێ. بەڵام بۆنەو لوای پێوای گەریلاکاو ئازادیی کوردسانی و مدرامانوو خەڵکوو شەنگالیوە ڕا چا دلێنەبەردەیە وەرفراوانەیە کریا، گەر پەشتیوانیی گەریلاکاو ئازادیی کوردسانی و پەشتیوانیی هێزەکاو یەپەژە- یەپەگە نەبیێ، سەدان هەزار ئێزدیێ کوشیێنێ و گەلوو ئێزدیما بەتەمامی دلێنە بریێ، ئەنجاموو قڕکەردەیەکەی ئینە بێ.
گردوو دەوڵەتا وەراوەروو کۆکوشیی سەروو شەنگالینە بێ بە وینەرێ و هێزەی ئەوەڵ کە زەمینەش پەی کۆکوشییەکەی کەرد پەدەکەن، ئا وەختە داعش هجوومەکەش کەرد، خەڵکوو شەنگالیشا دا دەسۆ و وێشا ڕەمێ. پەوکای پەدەکە لاو کەمیوە پێسەو داعشی وەرپەرسا و تاوانباروو کۆکوشییەکەین، کە مشۆم وەردەموو دادگاو تارێخینە دادگایی بکریۆ. ئینە ڕاسینو بەڵام بەداخۆ پەدەکە پێسەو ئانەیە هیچ ڕووەش نەدابۆ، بە بێ شەرم واوەی گەرەکشەن جارێوی تەر دەسەڵاتوو وێش شەنگالەنە هوربگێرۆوە، پەی ئینەیچە خەریکوو هەرمانە نهێنییان. هجووم سەروو شەنگالی و تەوقەدای شەنگالی جە ڕووە ئابوورییوە پەسەندنەکەردەی داوایەکاو خەڵکوو شەنگالی پەی وێڕاوەبەردەی و وێپارێزنای، ئەنجاموو هەرمانەکاو پەدەکەینێ. پەدەکە دەوڵەتوو تورکیش وەردانەنە شەنگالی و نمازۆ دەوڵەتوو عێراقی ددانی بنیۆ داوا ڕەوایەکاو خەڵکوو شەنگالیرە. چونکوم گەل و وەڵاتی پێسە ماڵ و موڵکوو وێس موینۆ، گەرەکش نییەن خەڵکوو شەنگالی داراو ئیرادەو وێش بۆ وێش بپاریزنۆ و ببەرۆنە ڕاوە، وەلێ هەرچی کەرا با بکەرا، گەلوو شەنگالی و گردوو خەڵکوو کوردسانی حەقیقەتوو پەدەکەی و بارزانییەکا مزانۆنە. بەداخۆ تارێخوو پەدەکەی پەڕەن جە خیانەت و تەسلیمبییەی قیزەونی. هیچ وەختێوە گەل و خەڵک و ئازادیی نەبیێنێ بە خەمێ بارزانییەکا، تاکە خەمشا خەمی تاکەکەسی و بنەیانەیین و چێوە گردوو بەهایەکا مورەشا. توولوو تاریخینە گرد جارێ گەلشا تەسلیموو قڕکەردەیۆ و ئازارە گەورا کەردەن. ئا وەختە چەتەکاو داعشی هجوومشا کەرد و شەنگالشا گێرت، هەمان جێوشا دووەبارە کەردۆ و وێشا نەوست نەهامەتیوە و گەلسا جیا ئاست پەی قڕکەردەی، ئارۆیچەنە بارزانی جە ئەرەگیرکارییەکاو پانیشتوو کوردسانییەنە لایەنگێروو دەوڵەتوو تورەکین. دەوڵەتی تورکی ئەرەگیر وێس ئسپاران بە بارزانییەکا و گەرەکشەن بە شەنگالیچۆ پانیشتوو کوردسانی ئەرەگیر بکەرۆ و قڕشا بکەرۆ. دەوڵەتوو تورکی گەرەکشەن ئا قڕکەردەیە ڕاو داعشیوە پەیش نەکریا ئیساتێ بە گێرتەی کوردسانی بکەرۆش.
واوەی گیانجەدەسدایاو قڕکەردەکەی بەڕێزۆ یاد مکەرمێوە و پێسەو تەڤگەروو ئازادیی کوردسانی ئەوەخوایس مکەرمێوە، پێسەو گرد وەختێ ئینایمێ چەنی خەڵکوو شەنگالی. گرد کۆشیاێوی خەڵکوو شەنگالی پەی ژیوای و پاریزنای باوەڕداری و شناسنامەی و زوان و کولتووروو وێش، کۆشیاێوی ڕەوا و دیموکراتیکەن. گردوو ئا کەسا کە دژوو قڕکەردەینێ لای سەریی گردیوە دەوڵەتوو عێراقی پەنەوازا پەشتیوانیی بکەرا، جە کۆشیای ڕەوا و دیموکراتیکوو خەڵکووشەنگالینە، واوەی ماچمێوە پەنەوازا دەوڵەتوو عێراقی پەشتیوانی ئیرادە و داوا ڕەواکاو خەڵکوو شەنگالی با، پێویسا داوا ڕەوا و دیموکراتیکەکاشا وەرەچەم بگێرا تا چارەسەروو قۆرتەکاشا بوێزیۆوە، ئانە ڕاێوی درووسەنە کە سەروو بنەماو دیالۆگی و مافە دیموکراتیکەکا بیاوا چارەسەر. گرد پەشتیوانێ ڕێبازی دیموکراتیکی و ئینسانی پەنەوازا پەشتیوانی چینەیە بکەرا. بارزانی و دەولەتوو تورکی ئینێ هەوڵێ ئانەینە قۆرتەکێ عێراقەنە چارەسەرێ نەبا و ئالۆزی و جەنگ قووڵتەرێ باوە. ئامانجوو ئەرەگیرکارییەکا ئینەنە سەروو پانیشتوو کوردسانیوە. پەوکای پەنەوازا دەوڵەتوو عێراقی، هێزە سیاسییەکاو عێراقی، ڕۆشنویراو عێراقی، گلێرگەو عێراقی و گرد کەسێوە وەراوەروو بارزانییەکاوە بمدراوە، کە بانە بایسوو لکنای و قڕکەردەی و پیلانەکاو دەوڵەتوو تورکی."
