هێزەکاو حکومەتو دیمەشقی و گروپوو 'ۋەرگری نیشتیمانی' ماوەو یەرۍ ڕوان هرووژم مکەرا سەرو دەگایەکا ۋەرکۆتوو دێرەزوری. سەرسەعب و هێزی جە دەگایەکا دەحلەی و جەدیداتی بەگاراینە کۆمکوژیشا کەرد، کە پا مەڵامەتۆ ١١ کەسۍ گەشمەرڎۍ بیۍ و فرەیشا ژەنی و زاوڵێنۍ.

ئەنجومەنو کۆنگرە ستاری پێوەس بە کۆمکوژییەکەی و هرووژمەکا حکومەتو دیمەشقی ئەرەیاۋنێوە نویسیاش وەڵاکەردۆ.

جە ئەرەیاۋناکەینە ئاماژە پانەیە کریان حکومەتوو دیمەشقی و چەتەکاش بە نامۍ 'وەرگری نیشتیمانی' ساڵەو پاریچ بە مەراموو تێکدای ئارامی دێرەزوری هرووژمشا کەرد، بەڵام جە سەیەو یۆگێرتەی گەلی و پەشتگیریکەردەیشا جە قەسەدەی ئا هرووژمۍ پوچۍ کریێوە.

جە ئەرەیاۋناکەینە جەخت چانەی کریانۆ کە هرووژمەکۍ حکومەتو شامی دژوو هەرێمەکەی بۆ بە مەڵامەتوو قەوەتبیەیۆ و زینڼەبیەیۆ چەتەکاو داعشی.

هەر جە ئەرەیاۋناکەینە فرە بە تنی کۆمکوژییەکەو دێرەزوری شەرمەزار کریان  و سەرەوەشی جە بنەیانەو گەشمەرڎا کۆمکوژییەکەی کریان و هیواو خاسبیەیۆ پەی زامڎارا وازیان.

جە درێژەو ئەرەیاۋناکەینە داوا جە ڕای گرڎیی، گلېرگەی مېیاننەتەوەیی و ڕێکوزیاکا مافو مرۆڤی کریان کە جە ۋەرا ۋەرو کۆمکوژییەکەینە هەڵوێس هۊربگێرا و ۋنەپەرسایۆ جە بکەراو کۆمکوژییەکەی بکەرا.

حەرپاسە ئانەیچ ئامان: " داوا جە ژەنا و جوانا مکەرمۍ جە ۋەرا ۋەرو ئی کۆمکوژیانە کە مەبەس چنەشا تێکدای ئارامی هەرێمەکەیا، هەڵوێست هۊربگێرا و جە بێدەنگینە نەمەناوە."

ماچۆ: "بەپەیلواو ئێمە نەک تەنیا گەلەکەما، بەڵکم گرڎوو پێکئامایەکا جە ۋەرا ۋەرو ئی کۆمکوژیەینە هەڵویس هۊرگێرا. هرووژمەکۍ ئیراڎەو ئی گەلەیە مەماڕا. بە پێچەوانۆ هەڵوێس و ۋەرپەرچدایۆ گەلی قەوەتتەر و زیاتەر مکەرۆ."

هەر جە ئەرەیاۋناکەینە داواو خاوەنداریکەردەی جە هێزەکاو قەسەدە، یەپەگە، یەپەژەی و هێزەکاو ئاسایشی کریان و ماچۆ: "بە تنی هەڵوێس ۋەرا ۋەر پی هرووژمە وەحشیانە و چەتەکا حکومەتو شامی نیشانە بڎەیدۍ."

جە دمادمایی ئەرەیاۋناکەینە داوا جە حکومەتو شامی کریان پەنەوازا دەسبەردارو هەڵوێسە چەتەگەراییەکەیش و هامکاریکەردەی حکومەتو ئاکەپەی بۆ و ماچۆ: "مەرامەکۍ دەوڵەتو تورکی ڕۆشنێنۍ؛ چونکی دەوڵەتو تورکی گرڎ کاتێ دژوو ئارامی هەرێمەکەین، پەی بەدیئامای مەراموو وەرمی عوسمانی تازەی، ئارامی هەرێمەکەیش وستەن چێرو تەرسێوە."