کۆنسەو ڕاوەبەری کۆنگرەو نەتەوەیی کورڎەسانی (کەنەکە) قەرارو ئەنجومەنو باڵاو دادوەری عێراقی پەی وستەیرەو یەرۍ پارتا سیاسی کورڎی بە قەرارێوە سیاسی و دژ بە مەسڵەحەتەکا گەلوو کورڎی نامۍ مبەرۆ و داواو هۊرشێونایۆ قەرارەکەی مکەرۆ.
دەقوو ئەرەیاۋناکەو کۆنسەو ڕاوەبەری کەنەکەی پی جۆرەنە:
" وستەیرە و قەڎەغەکەردەی پارتە سیاسییەکا جە عێراقەنە قەرارێوە سیاسی دژ بە مەسڵەحەتەکا گەلوو کورڎین!
ئەنجوومەنوو باڵاو دادوەری عێراقی جە ٥-٨-٢٠٢٤ قەرارێوەش پەی وستەیرەو ٣ لایەنا سیاسی عێراقی و هەرێموو کورڎةسانی ئەرەیاۋنا، تەڤگەری ئازاڎی گلېرگەو کورڎەسانی (تەڤگەری ئازاڎی)، پارتوو ئازاڎی و دیموکراسی ئێزیدی ( پادێ )، بەرەو ئەرەکۊشای دیموکراسی. ئینە قەرارێوە سیاسییا و چێروو فشارو دەوڵەتو تورکیاینە دریان.
پېسە مزانیۆ ماوۍ فرەن سەردای شاندەکاو هەردووە وڵاتی زیاڎشا کەردەن و چی دیڎار و ئەرەنیشتانە سەرو فرەو خاڵا جە دژوو جمیەرو ئازاڎیی گەلوو کورڎەسانی ڕێکێکەوتێنۍ. چی دماییایچەنە ئەردۆگان، سەرۆککۆمارو تورکیای جە ٢٢-٤-٢٠٢٤سەردای عێراقیش کەرد و جە ئاکامەنە ڕێککەوتەیۍ ٢٦ خاڵیشا ئیمزا کەرددلۍ ئا ڕێککەوتەیانە گرنگتەرین بڕگە ئانێنۍ کە دژوو جمیەرو ئازاڎیی گەلوو کورڎەسانینۍ. پەنەوازا گرڎ کورد و کورڎەسانیێوە بزانا کە سەردای و ڕێککەوتەی ئەرەگیرا سەرو بنەمای عالی پەی ئێمەی کورڎەسانیا نییا. دماو ئی سەردایا، حکومەتی عێراق نامۍ پارتوو کرێکارا کورڎەسانیش پېسە هێزێوە قەڎەغەکریای نامۍ بەرد و عیراق کۊت سەرو هێڵۆو دژایەتی. ئیساتێچ قەرارو قەڎەغەکەردەی ٣ پارتا تەری کوردیێش ئەرەیاۋنۍ.
قەرارو قەڎەغەکەردەی پارتوو ئازاڎی و دیموکراسی ئێزدییەکا جە یاڎو ١٠ساڵەو جینۆسایدو شەنگالینە بە ڕێکەوت نییا. قەرارو دەسوەردای جە ویست و ئیراڎە و باوەڕدارا ئێزیدی، بەردەوامیی هرووژمەکا داعشین پەی سەرو موڵکو ئێزدی.
ڕەنگە ئی قەرارە پاسە بەرگنۆ دژوو بڕۍ لایەنا کورڎةسانیا، بەڵام جە دماینە دژوو گرڎوو خەڵکوو کورڎەسانیا و ئامانجش تێکدای مەسڵەحەتوو گەلەکەیمانە. پی قەرار و کردەوا هێواش هێواش حکومەتو عێراقی گنۆ سەرو لۆژیکی و هێڵۆو حزبو بەعسی. ئەگەر ۋەر پی سیاسەتە ناڕەوایە نەگیریۆ، گرڎوو وستەکا گەلوو کورڎةسانی، بە پێگەو فیدراڵی هەرێموو کورڎةسانیچۆ، دلێنەبریا. پەنەوازا گرڎوو هێزە کوردییەکا و گرڎوو هێزە دیموکراسیەکا عێراقی و گرڎوو عێراقییەکا کە وڵاتەکەشا وەش مسیۆ ئی مەترسییە بوینا، ئی مژاریە بە جددی هۊربگێرا و دژوو ئی هەڵوێستیە مرداوە.
تەڤگەری ئازاڎیی گلێرگەو کورڎەسانی و پارتوو ئازاڎی و دیموکراسی ئێزدی دووۍ پارتۍ کورڎةسانیێنۍ و حەرپاسە ئەندامۍ کۆنگرەو نەتەوەیی کورڎةسانینۍ. کەنەکە دژو وستەیرەی و قەڎەغەکەردەی گرڎوو ئا لایەنە سیاسیانە. کەنەکە ئا پارتا بە پارتی شەرعی مزانۆ. کەنەکە قەرارە سیاسییەکەو ئەنجوومەنو باڵاو دادوەری عێراقی ڕەڎ مکەرۆوە و ئیڎانەش مکەرۆ.
پی مەڵامەتۆ ئێمە پېسە کۆنگرەو نەتەوەیی کورڎەسانی داوا جە حکومەتو عێراقی مکەرمۍ و ماچمۍ ئی ڕا وزیێرە شمە ڕێوە غەڵەتەنە و پەنەوازا بە زووتەرین کات ئا قەرارە سیاسییە هۆرشێوندۍ.
جگە چانەیچ داوا جە گرڎوو هێز و لایەن و دامودەزگاکا کورڎەسانی مکەرمۍ دژوو ئی قەراریە مردا و مەسڵەحەتوو گەلوو کورڎەسانی پارێزنا."
