کۆردیناسیۆنوو جڤاکی ئێزدی ئەورووپای بە ئەرەیاوناێوە ناڕەزایەتییش بەروست وەراوەرو قەرارەکەو بەغدای دەربارەو قەدەغەکەردەی پادێ و واتش: "ڕەنگا بتاوا بەڕسمی پادێ قەدەغە بکەرا، بەڵام جڤاکی ئێزدی ئازادیواز مۆدێلوو جڤاکی دیموکراتیکی مپارێزنۆ".
کۆردیناسیۆنی جڤاکی ئێزدی ئەورووپای دەربارەو قەراروو دادگاو عێراقی پەی وستەیەرەی پارتوو ئازادی و دیموکراسیی ئێزیدیا (پادێ) ئەرەیاوناێوەش وەڵا کەردۆ.
دلێشنە ئاماژەش کەردەن ئی قەرارە ڕێککەوت نییەن، بەڵکوم سیاسەتێوی قڕکەردەی سیستماتیکا.
ئەوەخوایش مکەرۆوە بێسەبەب نییەن، ئی قەرارە جە دەیەمین ساڵیادوو قڕکەردەکەینە دریان ماچۆ: "پەیامەکە ئاشکرا و وەرچەما، ئا زیهنیەتە مافوو ژیوای نمەدۆ پا ئێزدییا کە خاوەنداریی جە ئیرادەی مکەرا و داواو ستاتۆی سیاسی، کاریگەرییش سەروو قەرارەکەی نیانرە".
جەخت کریانۆ کە کۆشیای دژوو ئی زیهنیەتەیە بەردەوام مبۆ و ماچۆ: "پەنەوازا خاس بزانمێ، تا بە ئیرادەو وێما، بە یۆگێرتەیی وێڕاوەبەریی وێما، ئازادی و ئاسایشوو وێما نەوزمێ دەسوو وێما و هێزوو ڕێکوستەی وێما مسۆگەر نەکەرمێ، ئامرازەکاو دەسەڵاتی هەژموونگەرای هامچەرخی هەرێمەکەنە، ماف بە ئێمە نمەدۆ".
ئەوەخوای کریانۆ زیهنیەتوو قەدەغەی نمەتاوۆنە وەراوەروو داواو ئازادیی جڤاکی ئێزدی بمدرانێوە و داواو ستاتۆی ئاستەنگ بکەرۆ.
ئاخرۆ ئاماژە پانەیە کریان، ئێزدییەکێ داراو هێز و ئیرادەی ڕێکوزیاینێ و خاوەنداریی جە ئیرادەیشا مکەرا، ماچۆ: "ڕەنگای بتاوا بەڕسمی پادێ قەدەغە بکەرا، بەڵام جڤاکی ئێزدیی ئازادیواز مۆدێلوو جڤاکی دیموکراتیکی مپارێزنۆ. درێژە بە کۆشیای پاگێرانەو وێش مدۆ."
