هجووم و ئەرەگیرکارییەکاو دەوڵەتوو تورکی ئەرەگیرکەری پەی سەروو پانیشتوو کوردستانی بەردەواما، مامۆسێ ئاینیێ ماچا ئینە پاشێلکارییا و چی بارەوە هەڵوێست و ناڕەزایەتیی وێشا بەروست و قسێشا پەی ئاژانسیما کەردێ و واتشا:"پەنەوازا گردما دژوو ئی لەشکرکێشی و ئەرەگیرکارییەو دوژمنی بمردمێوە."

'ئەرەگیرکارییەکێ دەستدرێژیینێ پەی سەروو گەلوو کوردی'

مەلا نادرعەلی مامۆسای ئایینی ئاماژەش دا کە دەوڵەتوو تورکی زوۆن خەریکوو جە ئەرەگیرکاری و دلێنەبەردەی گەلوو کوردینە و واتش: "بەپاو شەریعەتوو ئیسلامی ئی ئەرەگیرکاریێ دەسدرێژییەن پەی سەروو گەلوو کوردی، پەنەوازا ئی نادادییە قبووڵ نەکریۆ. دەوڵەتوو تورکی زوۆن  گەرەکش بییەن گەلوو کوردی دلێنە بەرۆ و بەردەوام هجوومش کەردەن. هیچ کێشێوە بە ونمتەی حەل نمەکریۆ، بەڵام پەنەوازا وێنیشانەدای و ڕای مەدەنییە، هەرپاسە گێرتەیرەوەروو  سکاڵێ دادگا میاندەوڵەتییەکانە بکەرمێ بە ڕاێوە ڕووەبەڕووبییەیوە ئی ئەرەگیرکارییا و نیشانەو بەنامێ ڕێکوزیا میاندەوڵەتییەکاو مافوو ئینسانی بدەیمێ، کە چەنی گەلوو کوردی و خاکوو کوردستانی ئینا چێروو ئەرەگیرکاری و هەرمانە دڕندانەکاو دووژمناو کوردینە."

'چەمساقی پەی ئەرەگیرکاری هەرمانێوی نەعلەتییەنە'

جە بەردەوامی قسەکاشەنە مەلا نادر واتش ئاینوو ئیسلامییەنە هەر کەسێوە هجووم و ئەرەگیرکاری  بکەرۆ، وەروو نەحلەتەو خودای مگنۆ و ئەرەیاوناش: " ئی وەڵاتێ تەنیا بە نامێ ئیسلامێنێ و موسوڵمانێ گەر پاسە نەبۆ ئانە هەرگیز هجووم نمەکەرانە سەروو وەڵاتی و گەلای تەری. هەرکەسێوە ڕا بە چەمساقی پەی  ئەرەگیرکاری بدۆ کەسێوی نەحلەتییا، ئانێ  کە ۆاسە مکەرا  هیچ پاڕیایۆێوی و هەرمانێوی ئایننیەشا دروودە نییەنە، حسابوو موسوڵمانیچشا پەی نمەکریۆ، سەبارەت بە خەڵکیچ، با کەس نەواچۆ ئایرە سوورەن جە وێم  دوورەن، ئی ئایرە گەر نەکوشیۆوە گردیما مسۆچنۆ، مشۆم گردما هەڵوێستما بۆ و نازمێ هیچ لایەنێوی سیاسی بۆ بە ڕاوەشکەر و داردەسوو ئی هجووما."

' ئاینەنە ڕایێوی نییەنە پەی هجوومی و ئەرەگیرکاری'

هەر سەبارەت بە ئەرەگیرکارییەکاو دەوڵەتوو تورکی ئەرەگیرکەری پەی سەروو خاکوو پانیشتوو کوردستانی؛ مامۆستا عوسمان نورسی، کە کەسایەتیێوی ئاینییا ئاماژەش بە دەوروو کەسایەتییە ئایینەکا کەرد پەی ڕوبەڕووبییەیوەی هجوومی ئەرەگیرکاری پانەیە پەنەوازا کەسایەتییە ئاینییەکێ بە زوان و ویژدانی ئاینییوە هەڵوێست وربگێرا و پێسە بەردوام بی: "ئجۆم تەنیا بە ئیدانە متاومێ ڕووبەڕوو ئی هجووما بیمێوە، ڕاسەن ئانە بەشێوەن جە هەڵوێستی. بەڵام پەنەوازا سەرجەموو چینەکا ڕای گرد نۆعەینە بەکاربارانە، وەراوەروو دوژمنێوە کە گەرەکشەن خاکەکەیما ئەرەگیر بکەرۆ. مامۆسێ ئاینێی پەنەوازا بە زوانوو ئاینی ڕووبەڕووێ دوژمنی بانێوە، چونکوم ئاینوو ئیسلامی بە هیچ جۆرێوە ڕا بە ئەرەگیرکاریی نمەدۆ و هیچ یاگێوی ئاینینە  ڕاوەشکەردەی پەی ئی لەشکرکێشییە نەکریانۆ، هەرپاسە ئێمە پەنەوازا پێسەو بەشێوە جە عێراقی، داواو هەڵوێستورگێرتەی چادیشایچ بکەرمێ و نمەبۆ ڕا بە بەردەوامبییەی ئی ئەرەگیرکارییە بدەیمێ."