ڕێکوزیایەکاو ژەنا، تاژێ و تەژەئا سڵامشا ئاراستەو کۆشیای و مدرامانوو ژەناو هیندسانی کەرد کە دژوو دەسدرێژی پەی سەروو ژەنێوە پزیشکێ و کوشیایش ئامێ سەروو جادەی و ئەرەیاوناشا:" با هۆشیاریی وێپارێزنایما زیاتەر و ڕێکوزیاتەر بکەرمێ."
جمیەروو ئازادیی ژەناو ئێزیدی (تاژێ) و جمیەروو ژەنە ئازادا (تەژەئا) خێرامایشا جە ناڕەزایەتیی ژەناو هندسانی کەرد، کە دماو دەسدرێژیکەردەی سەروو پزیشکێوە ژەنێ دەسش پەنە کەرد و پەیاموو قەوەتکەردەی کۆشیایشا ئەرەیاونا.
نامەکەو تاژێنە ئامان: "ئێمەی جمیەروو ئازادیی ژەناو ئێزدی ( تاژێ) بە ڕۆحوو ژیوای ئازادیی ژەنێوە سڵام وەنەو شمەی ژەناو هندسانی مکەرمێ. تارێخەنە ژەنی بە هەرمانێ و یرۆکەو وێشا ژیوایشا بنیات نیان، بەڵام عەقڵیەتوو پیاسالاری ٥ هەزار ساڵێن حەر ساتێوی ژیوای ژەنێوی مگێرۆ و مکوشۆنەش، حەرپاسە ئی عەقڵیەتە عەقڵیەتوو دەسدرێژییا. دنیانە ژەنی گرد لاێوە تووشوو دەسدرێژیی دەروونی و سۆزداری و جەستەیی مبانێوە. ئاستوو تندوتیژی ئیساتێ یانەنە و جادە و مەکتەبنە و گرد یاگێوەنە بەبێ هیچ مافێوە سەروو ژەناوە مسەپنیۆ.
ئێمە پەی ماڕای عەقڵییەتی ڕەگەزپەرەسی و فاڕای سەدەو 21 پەی سەدەو ژەنا هۆشیاریی وێپارێزنای ڕێک موزمێ و بەوردی ملمێ شۆنەو کۆشیای ژەنە گەنجاو هندسانیرە. بەتایبەت چالاکیی هەزارا کەسا کە بە پانکارتوو "ژەنی، ژیوای، ئازادی"ی هەستێوە ڕۆحی و مەعنەوییش پەنەبەخشایمێ و دڵوەشێش کەردیمێ، کۆشیای و دیمەنەکێ فرە مانادارێ بێنێ. ئارۆ فەلسەفەو ژەنی، ژیوای، ئازادیی کە ڕابەروو گەلوو کوردی عەبدوڵا ئۆجالانی بەخشان بە گردوو ژەناو دنیێ، بە ویر و ڕۆح و هەستی ئازادیوازانەوە سەرناسەروو دنیێنە وەڵا مبۆوە، فەلسەفەو ژەنی، ژیوای، ئازادیی چندە پی ئێمەی ژەنا مایێ هێز ومۆراڵی و سەرکەوتەین پاسەیچ پەی دەسەڵاتی مایێ شکسین.
ئێمە واوەی پێسەو جمیەروو ئازادیی ژەناو ئێزدی (تاژێ) کۆشیای پەی ژیوایوە ئازاد و شکۆمەندی بە پەنەواز مزانمێ و سڵام پەی کۆشیایتا مکەرمێ."
"دروشموو ژەنی، ژیوای، ئازادیی، فەلسەفەو ژیوای ئازادین"
نامەکەو تەژەئاینە ئامان:" واڵا ئازیزاو هیندسانی، ئێمە پێسەو ژەناو تەژەئای سڵام وەنەو کۆشیایتا دژوو دەسدرێژی مکەرمێ کوردسانۆ، خاکوو ئێمە کە شایەتوو جوانتەرین شارسانیەتوو تارێخی بییەن، بەداخۆ ئارۆ شایەتوو دەسدرێژیین بە عەقڵوو پیاسالاری و کۆکوشیی ژەنا. ئی سیستمە چەپەڵە کە گەرەکش نییەن شوناسوو ژەنێ ژیواینە بەروو کۆنترۆڵوو مێردیو ئەدێنە بوینۆ دژوو شناسنامەو ژەنێ ئازادێن و بە دەسدرێژی و کۆکوشیی وەرش مگێرۆ.
پێسە چەنی کۆشیایەکەیتا ئەرەیاونانتا "ژەنی، ژیوای، ئازادی"ی فەلسەفەو ژیوای ئازادیا، ڕاسینە مشۆم ژیوای ژەنێچ ئازاد بۆ، کوشتەی ژەنا کوشتەی ژیواین.
حەرچندە ئێمە جوگرافیای جیاواز و کولتووری جیاوازەنە مژیومێ، بەڵام حەقیقەتوو ژەنبییەی سنەەرەکاما جە یۆی نزیکێ مکەرۆوە، ناڕەزایی و کۆشیایتا واوەی پەنەوازییش بە پەشتیوانیی و کۆشیای ژەناو دنیێ نیشانە دا، کۆشیای ژەناو هیندسانی هیز بە کۆسیای ژەناو کوردسانی مبەخشۆ، ئێمە مزانمێ کە فەلسەفەو " ژەنی، ژیوای، ئازادی"ی داوێوەنە پەی ئازادیی ژیوای بە سەرمەشقایەتیی ژەنا و واوەی بە ڕێز و حورمەتۆ سڵام پەی کۆشیایتا مکیانمێ."
