نویسەر لەتیف فاتیح فەرەج، سەبارەت بە لەشکرکێشی و ئەرەگیریەکا دەوڵەتو تورکیای، جە دیڎارێوەنە چنی ئاژانسوو هەواڵوو فوراتیی (ANF) ئاماژەش پانەیە کەرد کە ئەرەگیرکەردەی سەرو کورڎەسانی جە لایەنو دەوڵەتە هامسایاوە بەردەوام بیەن و واتش: "جە سەردەمو عوسمانییەکاوە تورک هەمیشە مەتڵەبشبیەن گەلوو کوردی سەڕۊوە و لایەزال تا ئیساتێچ بەردەوامېنۍ، بەتەنیا جەلایەنو تورکیایۆ هەوڵ پەی ئەرەگیرکەردەی کورڎەسانی نەدریان، بەڵکم سیاسەتو تەعریبیچ سەرو گەلوو کوردی لوان ڕاوە و بەپەیلواو من ئەشۆ هەر تاکێوە بە ئەخلاق دژو ئی ئەرەگیریا مردۆوە، جە چەمۍ دەوڵەتو تورکینە کورد گرڎ دوژمنا، ئەگەر ئارۆ نۆبەتو پانیشتوو کورڎەسانی بۆ کە بەحساب نەیارو ۋێشا، ئانە سەبای سەرەو یارەکایچشا، چونکی کورد جە هەرشۊنۍ دنیێنە بۆ، تورک بەدوژمنوو ۋێش مزانۆش."

سەبارەت بە پارێزگاریکەردەی جە گەریلاکاو ئازاڎیی ئاڎ واتش: "گەریلاکۍ ئازاڎیی پەشگیری و پارێزگاری جە ئێمە مکەرا، ۋەرا ۋەر بە لەشکرۍ قەبەی پېسە دەوڵەتو تورکیای مردێنێوە و موینمۍ کە درۆنەکاشا پوچۍ مکەراوە، خەڵکو پانیشتوو کورڎەسانی بەڕاسی ئشیۍ پەشتگیریشا چنە بکەردێنۍ دلۍ شارەکانە، حەرپاسە هێزە سایاسییەکێچ، نەک ئانەی بلا کەسانۍ ئازاڎیوازی بگېرا و عەزییەتشا بکەرا، ئشیۍ جە مەنتیقەکا ئامێدی و ئاکرێ و دهۆکەنە، پەی پارێزنای مافوو کەرامەتو ۋێشا و خەڵکو دەگایەکا، ئامێنۍ سەرو جاڎەی و ۋێنیشاندایشا کەردەبیۍ و ناڕەزایشا بەربڕیەبیۍ، چونکی دەوڵەتو تورکی خەریکا تیرۆر مکەرۆ، ئیساتۍ هێزی سیاسی دەنگو خەڵکیا و دەوڵەت خجڵو تیرۆرکەردەیا."

بەپەیلواو ئی نویسەرەیە، سیاسەتو تورکیای ئانەنە پارێزگارو کەرکوکی بڎۆ بە دەسەڵاتی کوردی و ۋێش پارێزگاکاو هەولێری و دهۆکی و سلێمانی ئەرەگیر بکەرۆ و واتیچش: "تورکیا ئیساتێچ ئەجۊشەنە عەفرین و موسڵ و کەرکوک، ویلایەتو هەشتا و دووۍ و هەشتاو یەرۍ و هەشتاو چوارو تورکیاینۍ، وەرموو ئاڎیی ئەرەگیرکەردەی و پڕۆژەو ئەسڕیەیۆ گەلوو ئی مەنتیقەینە، گەرەکشا دەس سەرو بیرە نەوتیەکارە بگێرۊ و پەیماننامەکایچ پاشێل بکەرۆ و ۋێش بۆ بە ساحیبشا، بەڕاسی ئینە ترسناکا و من ئەجۆمەنە، حکومەتی ناوەندیچ بەپاو پێویسی ڕووبەڕوو تورکیای نەبیەنۆ، تورکیا تەنیا بەپانیشتیۆ نمەمدرۆ، پلانەش پەی مەردمو ۋەرنیشتوو کورڎەسانیچ هەن و چڼین جارێچ هەوڵو ئەرەنیشتەیش چنی بەشار ئەسەدی دان و ئاڎیچ کوچۍ نەرمیش ئەرمانان، ئاڎیچ جە ۋەرا ۋەرو ئانەینە ٣٠٠٠ ئاوارۍ سوریۍ بلاوە خاکو ۋێشا و مەنتیقەکەشا ئارامبۆوە، بەڵام هەڵای بە تەمامی ڕێکێنەکەوتێنۍ، ئەگەر تورکیا پی مەرامەو ۋێش بیاوۆ، ئانە کارەساتێوە ترسناک خوڵقنۆ."

سەبارەت بە هەڵوێسو خەڵکی و لایەنە سیاسییەکایچ، لەتیف فاتیح فەرەج واتش: "بەڕاسی هەڵوێسو خەڵکی بەپاو پێویسی نەبیەن، ئەشیۍ گرڎوو نویسەر و ڕۆنشۋبیر و چالاکا و ڕۆنامەنویسا و لایەنە سیاسییەکا هەڵوێسی جدیشا بیۍ، بەڵام بەپاو پێویسی نەبێشا، خەڵک ئەگەر بە ئەزعەفول ئیمانیچ بۆ، بێدەنگ نەبیەن و قسۍ ۋێش هەر کەردێنە، بەڵام لایەنە سیاسییەکۍ فرە بێدەنگۍ و بێهەڵوێسېنۍ."