دەوڵەتو تورکی قڕکەری و ئەرەگیرکەری جە هرووژم و کۆمکوژییەکاش بەردەواما و تا ئی ساتە وەختە دەسەڵاتداراو پانیشتوو کورڎەسانی و دەسەڵاتداراو عێراقی هیچ هەڵوێسێوەشا نەبیەن. جە دژوو ئەرەگیریەکا دەوڵەتو تورکی و بێدەنگی لایەنەکا مامۆسایا جە پانیشتوو کورڎەسانیوە هەڵوێسی ناڕەزایشا بەربڕی، چا بارۆ مامۆسا؛ سامان تاهیر و بەهادین عەبدول پەی ئاژانسوو هەواڵوو فوراتی (ANF)ی قسێشا کەردۍ.

'مەراموو ئەرەگری دەوڵەتو تورکی زیڼەکەردەیۆ میساقی میللیا'

مامۆسا سامان تاهیر باسش چانەیە کەرد پەنەوازا دوور جە باوەڕی حیزبی و لایەنگری خەموو نەتەوەکەیما  وەڵۍ گرڎ چێوێنە بۆ و واتش:" پەی هەر لەشکرکێشیێوە تورکیای مشۊم گێڵمېوە پەی ڕێخە تاریخیەکەیش کە مەتڵەبشا میساقی میللی جابەجێ بکەرۆ. تورکیای تازە جە چڼین ڕێوە هەوڵش دان بە کلتوور و ئابووری و جە ئیساتێچەنە بە هێزی سەروازی ئامان مەنتیقەکە، مەرامش ئانەنە ویلایەتوو موسڵی  گێڵنۆوە چێروو هەیمەنەو ۋێش. ئێمە پېسە تاکۍ کوردی پەنەوازا ۋەرگیری بکەرمۍ چی خاکیە کە سەرشۆ مژیومۍ، ئەرەگیرەکۍ کورڎەسانی مەرامشا ئانەنە کورڎی و کورڎەسانی دلېنەبەرا هەرپۊکەی بە گرڎیماوە مشۆم دژوو ئی لەشکرکێشیی و ئەرەگیریە مردمېوە."

جە دمادمایی قسەکاشەنە مامۆسا سامان تاهیر سەرنجش وست سەرو ئانەی مشۆم کۆدەنگیۍ بۆ پەی مردایۆ دژوو گرڎ لەشکرکێشی و ئەرەگیریێوە پەی سەرو خاکو پانیشتوو کورڎەسانی و واتش: "گەر ئێمە چەکی گەورەو مۊدێرن و درۆنما نەبۆ خۆ متاومۍ نەبیمۍ بە چەمساغۍ ئەرەگیرا پەی ئەرەگیرکەردەی نیشتیمانەکەیما."

' ئەرەگیرکاریەکۍ قەوارەو هەرێمی وزانە مەترسیۆ نەک ۋێنیشاندای کە مافی ڕەواو هاموڵاتییان '

مامۆسا بەهادین عەبدول باسش چانەیە کەرد ئی ئەرەگیریۍ دەوڵەتو تورکی ئەرەگیری بیەن بە مەتەرسی پەی سەرو قەوارەو پانیشتوو کورڎەسانی و واتش: "بەزنای سنورو خاکی و واوەی بیەیۆ کارەساتە تاریخیەکا قەوارەو هەرێموو کورڎەسانی وزۆنە مەتەرسیۆ، نەک داواکاری و ۋێنیشاندای گەلی کە مافی ڕەوان. پنەم خاسا چینو ڕۆشنۋیرا جە هەرێموو کورڎەسانینە چنی هەر دووە حیزبوو دەسەڵاتی و بەغڎای کوۍ باوە پېسە نوێنەرو گەلی. چونکی ئینە هێزێوە مېیاندەوڵەتیاو مشۊم حکومەتو هەرێمی و عێراق سنورێوەش پەی بنیارە، بەمەڵامەتوو ئەرەگیرکەردەیۆ سنوورەکێما شێویێنۍ، حەرپاسە دەگۍ و باخەکێما سۆتێنۍ."