'ئا حوکمەتەی ئینا ئەنقەرەنە، هەمان ئا حوکمەتە ناوچەو بادینانی ڕاوەبەرمکەرۆ'

هرووژم و ئەرەگیریەکۍ دەوڵەتو تورکی فاشیستی پەی سەرو خاکو پانیشتوو کورڎەسانی بەردەوامیشا هەن و رۆ دماو ڕۆی زیاتەر پەلۍ کێشۆ، چی بارۆ کەمال حەسەن، پێشمەرگەی قەڎیمی پەی ئاژانسوو هەواڵوو فوراتی(ANF) قسێش کەردۍ و واتش: "هرووژمەکۍ دەوڵەتو فاشیستی تورکی ئێمە و گرڎو مەردمیش  ناڕەحەت کەردەن، پارتی بارزانی بە ئاشکرا بیێنۍ بە چەمساغوو ئی لەشکر کێشییە، ئانە ڕۊشنا کە ئا حوکمەتەی کە ئەنقەرەی و ئیستەنبوڵی ڕاوەبەر مکەرۆ، هەمان ئا حوکمەتە جە ناوچەکا بادینانی و هەولێرینە حوکمڕانیی مکەرۆ و محاڵا خەڵک بتاوۆ چېرو سەیەو ئانیشانە بتاوۆ هەڵوێسوو ۋێش بەربڕۆ."

 هەرچنە پەیلوایش چامنەبۍ کە دەسەڵاتی ئشناسیا بە دەسەڵاتو زۆنی سەوزی عالتەرێنۍ، ماچۆ سیاسەتەکێشا جە ئیساتێنە سییاسەتێوە شەرمنانێنۍ و واتش: "ئەگەر ۋێچشا بێدەنگېنۍ بۆنەو ئا فشاراوە کە ئینۍ سەرشا، بەڵام با وازبارا مەردم هەڵوێسوو ۋێش بەربڕۆ و بێدەنگ نەبۆ، با دوژمن پاسە نەزانۆ کە خەڵک ئی ئەرەگیریەشە قبوڵکەردەن، چونکی خەڵک جە تەرسەو دایۋنەی و گێرتەین ئەگەر بێدەنگیش ئەرمانابۆ."

 'ئەرەگیری تاریخێوە کۆنش هەن و ویستێوەن پەی ئەسڕیەیۆ گەلێوە'

 هەر سەبارەت پی پەرسەیە، کاروان فەرەج قادر، فەرمانبەر جە شالیارو ڕۆشنۋیری هەڵوێسوو ۋێش بەربڕی و واتش: "ئەرەگیری تاریخێوە کۆن و دوور و درێژش هەن، ویسوو تورکیای پەی ئەسڕیەیۆ گەلوو کورڎی پاسشە کەردەن کە گەریلاکاو ئازاڎیی چا کەشانە پارێزگاری جە نیشتمانی بکەرا، بەڵام داخەم نمەشۆ لایەنیوە سیاسی بیەن بە هامکارو ئی دەوڵەتە فاشیستەیە، تا هامزۋان و هامنیشتمانی ۋێش سڕۆوە، بەپەیلواو من ئەرکو گرڎ کەسێوە خاوەن هەڵوێسییا کە هەڵوێس ۋەرا ۋەرو ئی ئەرەگیریانە بوینۆ و نارازی بۆ سەرشا."