لەشکرکێشی و ئەرەگیرکارییەکاو دەوڵەتوو تورکی ئەرەگیری پەی سەروو خاکوو پانیشتوو کوردسانی بەردەوامەن، ئینەیچ بییەن بایسوو نیگەرانیی گەلی. سەبارەت بە هجووم و ئەرەگیرکارییەکا، حەر یۆ جە مامۆسایا کامەران محەمەد و عەلی نادر پەی ئاژانسوو هەواڵوو فوراتی ANF)) قسێشا کەردێ.

'حکومەتی دڕەندەو تورکیای جە ئەرەگیرکەردەی کوردسانی بەردەواما'

مامۆسا کامەران محەمەد ئاماژەش پانەیە کەرد، ئەرەگیرێ زوۆن هجوومێ مکەرا سەروو کوردسانیو بە ئیسەیچۆ کە دەوڵوتی ئەرەگیروو تورکی هجوومێ مکەرۆ سەروو خاکەکەیما واتش:" حکومەتی دڕندەو تورکی گەرەکشەن جە ئەرەگیرکەردەی و هجوومکەردەینە سەروو خاکوو کوردسانی بەردەوام بۆ، ئینە فرە ناڕەوان، پەنەوازا چالاکێ مەدەنیێ، حزبە سیاسییەکێ و حکومەتوو عێراقی وەراوەروو ئی ئەرەگیریینە بێدەنگێ نەبا، چونکوم پەی ئی خاکەیە هەزارا گەشمەردێما دێنێ و خاکوو کوردسانی مەبارەکەن."

ئاخرۆ کامەران محەمەد ئاماژەش پانەیە کەرد،کە بێدەنگی و نەبییەی هەڵوێستی پاسە مکەرۆ ئەرەگیری سەروو خاکەکەیماوە بۆ و  واتش:" چند گرنگەن حکوومەتوو عێراقی و هەرێنێ بێدەنگێ نەبا و ڕاگێری بکەرا و ئاندەیچ گرنگا کە چالکێ مەدەنیێ، ڕۆشنویرێ،ژەنی و مامۆسێ هەڵوێستشا بۆ و بێدەنگێ نەبا وەراوەروو، ئەرەگیرکارییەکاو تورکی کە هەرمانێوی نیشتیمانییە و نەتەوەییەنە."

'تورکیا هامکاری مکریۆ پەی ئامایدلێ خاکوو کوردسانیوە'

مامۆسا عەلی نادر ئاماژەش پانەیە کەرد، لایەنێوی سیاسی بییەن بە چەمساقوو دەوڵەتی ئەرەگیرکەروو تورکیب و هامکارشا و واتش:" ئامای دەوڵەتوو تورکی پەی خاکوو کوردسانی تاوانا و بەداخۆ دەسێوە دلێنە کە ناپەسەندا هامکاروو تورکیاین، ئی ئەرەگیرکاریێ قبووڵکریێ نییەنێ و ئیدانەشا مکەروو."

ئاخرۆ عەلی نادر  باسوو ئانەیش کەرد کە پەنەوازا ڕۆشنویرێ و گەل هۆشیاریی ئانەیشا بۆ،کە ئەرەگیرێ تەنیا بە خاکیوە نمەمدراوە بەڵکوم کولتوور و ژیوگەیما تێک مدانە و واتش:" پەنەوازا گرد ڕاێوە دژێ تورکیای بیمێ و ئی ئەرەگیرکارییە قبووڵ نەکەرمێ،مشۆم هۆشیاریی تەرسەو تورکیای ئەرەگیری وەڵا بکریۆوە و دەوڵەتوو تورکی دارێ بڕۆ و خاک تێک مدۆ و ئا هامکارییەچە کە مکریۆش دەسش بڕمێ و دژش بیمێ تا جارێوە تەر ئینە ڕووە نەدۆ."