دووۍ هێڵۍ فرە ئاشکرۍ جە کورڎەسانەنە هەنۍ؛ هێڵۊو مڎرامانی و ئەرەکۊشای جە دەرەنجاموو بەها کۆمەڵایەتییەکانە، جە ۋەرا ۋەریچەنە هێڵۊو خیانەتی بە شێوێوە فرە قیزەون و مەترسیڎار. ئی هێڵۍ کە ئارۆنە بەشێوێوە فرە ئاشکرا ۋێش نیشانە مڎۆ، چارەنویسوو گەلێوە دیاری مکەرا.

کورڎەسان جە ۋەرا ۋەرو گرڎ هرووژمێوەنە تۆم و ۋێش پارێزنانش و سەرجە نۆ خوڵقنانشۆ و نەمەردەن، پۊکەی تۆم و ژیۋایش سەوزکەردەنۆ. جە ۋەرا ۋەرو گرڎوو ئا هێزانە کە گەرەکشا بیەن کاولکاریش سەرەرە بارا، بە ئاوو هەوا بەهەشتیەکەیش و خاکە بەپێتەکەیش ژیۋایش بە گەلەکەیش بەخشانۆ. جە ڕاو مڎرامانوو ۋێشۆ جە ڕێخۆ، پیرۆزییەکێش چی خاکەنە گرڎ کاتێ پارێزنان. پۊکەی گەلوو کورڎی دڵسۆزو کەشی و خاکی بەپیتوو کورڎەسانیا. ئا چەمۍ کە ئی کرۆکە پیرۆزەیە نمەوینا کە پەی تەماموو مرۆڤایەتی بیەن بە ژیۋای، ئا دڵە وشکۍ پېسە تەوەنێشا پنە ئامان کە هەست بە ژیۋای چی خاکەنە نمەکەرا، پەی ئانەی بتاوا ئی خاکە بەهەشتییە بوارا پەی جەهەنەمی بە ڕوو سیایشاوە هرووژم مکەرا. ئایە چی خیانەت جە سەرچەمەکا خاکی مکەرا؟ پەنەوازا خاوەنی حەقەتینەو ئی خاکیە یەخۍ ئانیشا بگێرۆ و ۋنەشا پەرسۆ؛ ئایە سەختا ڕۊشنایی چی خاکەنە بویندۍ؟ پەنەوازا چنەشا پەرسا ئایە ئی کەشۍ ئاڼنە بێ بەهێنۍ کە ئێرشا ۋەرمڎەیدێنە، پارچە پارچەش مکەردۍ و ورەشدێش. پەنەوازا ۋنەپەرسایۆ چا کەس و هێزا بکریۆ کە دلۍ خیانەتینە دەور گێڵنا. جە حەقەتینەنە جوابوو ئا پرسیارا، پېسە ئا کەشا کە ۋەرچەما گرڎ کەسێوە سۆچانە ڕۆشن و بە ئێشا. ئانەی گرنگا ئانەنە ۋنەپەرسایۆ چا خیانەتا بکریۆوە کە میللەتی ئەرەگیرکەرو تورکییایشا ئارڎەن دلۍ ئی خاکە مبارەکەیە.

پەنەوازا ئی گەمە قیزەوونە دلێنەبریۆ

وەختۍ ئینسان تەماشەو کورڎەسانی مکەرۆ، پەنەوازا جە دڵشەنە هەست بە ئێشوو جوگرافیاو کورڎەسانی بکەرۆ کە گرڎ ڕووۍ ئینا چېروو بۆردوومانینە. گەر ئینسان ئینەی نەوینۆ، ئانە هەست بە ئێشوو سۆتەی ئا دارە تەمەن سەڎان ساڵایچە نمەکەرۆ، گەر هەست نەکەرۆ ئانە جە مرۆڤایەتی بیەو ۋێش کۊتەن. نەوینای ئێشو ڕێش و کەشەکا کە چېرو چنگەو خیانەتینە فاڕیۆ پەی مشتێ جە خوڵۍ، بە ماناو نەبیەی ئەخلاقی و کەرامەتوو مرۆڤایەتییا. هەر ئینەنە کە مرۆڤەکا جە مرۆڤایەتی بڕۆرە. ئا کاتە پەنەوازا چێش بکەرمۍ؟ پەنەوازا ئی گەمە قیزەونەیە تێکبڎەیمۍ؟ کامە گەمە؟ ئا گەمە قیزەونەی کە ئەرەگیرۍ و خیانەتەکارۍ سەرو ئەوەمەنڼەو، تاریخ، ڕێخە و بەهاکا گەلوو کورڎی مگێڵناش، پەنەوازا بێ ویرکەردەیۆ ئا گەمۍ تێکۍ بڎریا. پەنەوازا ڕێخەو خیانەتی جە بنەنە بەربۍ کە ۋێش خزنان کەشەکا کورڎەسانی کە سەرچەمەو ژیۋای و بەرهەمدارییا. پەدەکە و بنەیانەو بارزانی نمونەی ڕۊشن و ئی ئاژەینۍ. بەڵێ، ئاڎۍ هەوڵمڎا جوگرافیێوە پارچەکریا خوڵقنانە و پێشکەش بە ئەرەگیراش بکەرا.

خیانەت چارەنوویس و ئی گەلەیە نیا

ئی ناڕەحەتیۍ سەرو گەلوو کورڎیرە مەیا، بە تایبەت خەڵکو پانیشتی، هیچ کاتێ چارەنوویس و ئا خەڵکەیە نیا. بۆردوومانکەردەی و سۆچنای کەشەکا، بڕیەیۆ دارۍ سەڎان ساڵەی و سۆچنای گرڎوو ئا گیانلەبەرانە ئینۍ دلۍ ئی خاکەینە، پەنەواز نمەکەرۆ پېسە چارەنوویسی هۊربگیریۆ. تەماشەکەردەی چی کارەساتا تەنیا پېسە ڕووسیاویۍ جە پەڕەکا تاریخینە گنۆ ویرو ئینسانی. پەنەوازا پرشوو ئی ئێرا نۆکەرەکاو ئەرەگیرا سۆچنۆنە نەک سروشتی بێهامتاو کورڎەسانی. خیانەتکارەکۍ کە خنجەرەشا چەقنێنە مازی گەلوو ۋێشانە مەحکومێنۍ بە تێکشیەی و دلێنە شییەی، نەک جەنگەوانا ئازاڎیی. ئانۍ کە جەنگوو حورمەتی پەی ئی گەلیە مکەرا، ئانۍ کە بانۍ بە هەمڕۍ کەشەکا، گەریلاکۍ کە هیوا خوڵقنا، قەولشا بە ۋێشا و خاکیشا دان کە ۋێشا جە ئێرەنە سۆچنانە و ۋێشا پاک بکەراوە و پی جۆرە بانۍ بە هیواو گەلەکەیشا و کرۆکو گلېرگەکەیشا پارێزنا. پۊکەی پەنەوازا گرڎ کەسێ چەمەکاش بکەرۆوە، هەیبەتوو میللەتوو مڎرامانی بوینا و چنیش جماوە. هەر پی جۆرە ئیتر خیانەت نمەتاوۆ بۆ بە چارەنووسوو ئی گەلەیە، گورزەی جەرگبڕەش جە خاوەنی حەقەتینەو ئی خاکیۆ ۋەرگنۆ. باجوو سۆچنای ئی خاکە قەڎیمیە بڎۆ، حەقێش چنە بکریۆوە ئڼەو ئێش و سۆچنای ئی خاکیە گۆرە بۆ.