ئەنڎامو کۊمېتەو ۋێڕاۋەبەری پەکەکەی جە بارەو نەورۊزیۊ ئەرەیاۋناش؛"نەورۊز تەنېا ڕۊو پېرۊزکەرڎەیو زەماۋەنڎ گێڵنای نېا، ڕۊو بەرزکەرڎەیۊ مدرامانی و ئەرەکۊشای و یۊبیەیا، چونکی نەورۊز تەنېا بە یۊبېەیۊ نەورۊزا و حەرپاسە ماچۊ؛ چڕیەو باڤڵ تاڵەبانی بە مانا مزانمۍ و ڕاسیچ چی ۋەختەنە عالتەرین پەنەوازی یۊبېەی نەتەۋەیی گەلوو کورڎیا".

موراڎ قەرەیلان؛ ئەنڎامو کۊمېتەو ۋێڕاۋەبەری پەکەکەی بەشڎاری بەرنامەو تایبەتو ستێرک تېڤېش کەرڎو جە بەشێۋە چەمپنەکۊتەکەیەنە سەرنجش وست سەرو جەژنەو نەورۊزی و جواب و چڕیەکەو باڤڵ تاڵەبانی سەرۊکو یەنەکەیش داوە جە بارەو یۊبېەو نەتەۋەیۊ.

قەرەیلان پېرۊزبایی نەورۊزیش جە ڕابەر ئاپۊی کەرڎو ۋاتش:'' بەبۊنەو جەژنەو نەورۊزیۊ سڵامو ۋێم پێشکەش کەرونەو پېرۊزبایی جەژنەو نەورۊزی جە ئەڎایا گەشمەرڎا مکەرو. پېرۊزبایی نەورۊزی جە گرڎو ھامڕایام، خەباتکارا، گەلو کورڎی و گەلۍ مەنتېقەکەی مکەرو، کە باۋەڕیشا بە نەورۊزی ھەن، یاڎو گەشمەرڎە قارەمانەکاما مکەروۋە، کە نەورۊزشا بە مدرامانو ونەو ۋێشا ڕازناۋە، جە کەسایەتی کاۋەی ھامچەرخیەنە(مەزڵوم دۊغان)، ئا ۋەعدەی پایشاما دان واوەیش کەرووە، ئا ئاڵۍ کە ئایشا دێنە دەسو ئێمە بە بەرزینە مازمێشۊ و ئەرەکۊشاکەیشا سەر وزمێنە، ئێمە تا دما ھەناسەما پا ۋەعدەیماۋە وەفا ڎارۍ بېمۍ و جە ئەرەکۊشاو ئازاڎیی کورڎسانی و ڕابەر ئاپۊینە گرڎ ۋەختۍ یاڎشا مکەرمێۋە.  

ئا ئەنڎامەو کۊمېتەو ۋێڕاۋەبەری پەکەکەی ۋاتېچش؛ نەورۊز پۍ ئێمە، پۍ گەلەکەیما و پۍ ئا گەلا کە قەناعەتشا پی کلتورەیە ھەن، فرە مانادارا، ئی ڕوۋە تەنېا ڕوۋۍ پېرۊزکەرڎەی و زەماۋەن گێڵنای نېا، ئانا بومەلەرزێۋە ڕوۋەشدا فرەو کەسی جە گەلەکەیما گیانشا جە دەسدا، ئېسە جە کورڎسانەنە تەعزیە ھەنە، پۍ ئانەیچ دامو دەزگا دیموکراتېکەکۍ کورڎی قەرارشا دان، کە نەک بە زەماۋەن گێڵنای، بەڵکم بەشێۋێۋی خۊتان کەرڎەی جە قوربانېاو بومەلەرزەکەی و یاڎو ئا کەسا کە گېانشا جە دەسدان پێشوازی جە نەورۊزی بکەرا، ئېنە چێۋێۋی گونجېان، وێش جە وێشەنە نەورۊز تەنېا زەماۋەنڎەو ھورپڕای نیا، پێسە ۋەڵتەر واتم، نەورۊز جە بنەڕەتنە بەرزەکەرڎەیۊ مدرامانېن، ڕۊو خۊتانکەرڎەین جە ڕۊحو جمیەرو مېدیاو کاوەی، ڕۊحو مدرامانېا، ڕۊحو سەرکۊتەیا، ڕۊحو یۊبیەی و ئەرەکۊشایا، چا ۋەختەنە واتە ڕۊو بەرزکەرڎەیۊ ئەرەکۊشای و یۊبیەیا، چونکی نەورۊز بەتەنېا بە یەکڕیزی و یۊبیەیۊ نەورۊزا، بە ئەرەکۊشاو نەورۊزی جمېەرو مېدیای سەرکۊت.

جە بەشێۋە تەرو قسەکاشنە ئاماژەش بە زەروری بەستەو کۊنگرەو نەتەوەیی کەرڎو ۋاتش؛ چی دماییەنە ھامسەرۊکو کەنەکەی ڕێزدار "ئەحمەڎ کاراموس" سەرڎاو پانېشتو کورڎسانېش کەرڎو چن چەمپنەکۊتێۋەش ئەنجامدا، ئێمە ئی ھەرمانۍ فرە بەمانادار مزانمۍ، بێگومان چی ۋەختەنە چێۋۍ فرە بەنرخ و ماناڎارو پەنەوازەن. حەرپاسە ڕێزدار "باڤڵ تاڵەبانی" سەرۊکو یەنەکەی چڕیەیش پۍ یۊبېەی نەتەۋەیی کەرڎ، ئێمە ئی چڕیەیچە بە ماناڎار مزانمۍ بە ڕاسېچ چی ۋەختەنە زەرورتەرین پەنەوازی یۊبېەی نەتەۋەیی گەلو کورڎیا، ئێمە پێسە جمیەری جە لاو ۋێماۋە حەوڵ پۍ ئانەی مڎەیمۍ، سەرو ئی بنەمۍ داوا کەرو نەورۊزو ٢٠٢٣ۍ کەرڎێنە ئەۋەڵو یۊبیەی نەتەۋەیی. پەنەوازا یۊبیەی نەتەۋەیی ۋەشکەرڎێنە، ئەگەر بەعزۍ مەتاوا شانە بڎا چێرو ئانەی با نەڎاش، مەبۊ ئێمە بە مەڵامەتو حېچ کەسێۋە ۋێما سنوردار کەرمێنە مەبۊ ۋاچمێنە؛ ئەگەر فڵانە کەس یان فېسارە کەس نۍ ھەرمانەکۍ سەرمە گێرۊنە،نەخێر ئێمە پێسە ھێزو کەسایەتیەکا کورڎسانی سەرو خەتەو بنەماو نېشتېمان پەروەری و ۋڵاڎ پارێزی جە ۋەران ۋەر بە جېنۊسایدی و پاکتاوکاریەنە مرڎمێۋە، بە دڵنېایۊ پەنەوازەن یۊبیەی نەتەوەیی پێکبارمێنە.

سەرو ئا پەرسەیە زیاتەر ھةڵوێسەش کەرڎو ۋاتش:" ئەشۊ ھەم سەرو پارچەکاو ھەم سەرو ئاستو ۋڵاتېەنە یۊبیەی نەتەۋەیی پێکبارمێنە، چڕیەیم پۍ پارتە کورڎسانېەکا، دامو دەزگا نېشتېمانیەکا، ڕۊشنفکرا و ھونەرمەنڎا کورڎسانی ئانەن، ھەڵۋێسو یۊبیەی نەتەۋەیی نېشانە بڎەیدۍ و دەسکەردۍ بە حۊڵەکاتا پۍ ۋەشکەرڎەو یۊبېەی نەتەۋەیی، داوا جە گرڎی مکەرو، بە ھەڵۋێسو یۊبیەی نەتەۋەیی پێشوازی چا پرۊسە ۋەڵېنگەیە بکەرا. کە ڕێککۊتننامەو لۊزانی ملۊنە سەڎەمېن ساڵۊ ئانەی بە تەمامو جەھانی نېشانە بڎەیدۍ، کە ئێمە پێسە کورڎی ھەنمۍ و یۊنمۍ، ڕاپېماکەیما ڕاپېمایۍ مرۊڤانەو مافدارانەو دیموکراسېانەن، کەس مەتاۋۊ ڕاگېری چی ڕاپېماینە کەرۊ ئێمە ئی ڕاپېماو ۋێما سەروزمۍ. ئەشۊ پی شکڵو شێوازە پێشوازی جە ١٠٠ەمېن ساڵەو لۊزانی بکەرمۍ، ئانە فرە مانادارو زەرورا.

ھ.ش