پەنەوازا مرۆڤ ئا شۊنۍ پانیشتوو کورڎەسانی کە هرووژم و ئەرەگیریشا سەرا، بە ئیراڎێوە بەرزۆ، ڕادەو ئەرەگیریەکەی پەی ڕای گرڎیی ئاشکرا بکەرا.

سەرەتا ۋییەرنای خاڵەکا چێرو کۆنترۆڵو پاراستنی و میتی مەترسیێوە گۊرەش هەن. ئا ڕووەدایۍ کە سەرو ڕۆنامەنوویسۍ پېسە سلێمان ئەحمەڎیرە ئامۍ هەڵای ئینۍ ڕۊژەڤەنە. بارەش وەرو چەما ۋێت ڕۆنامەنوویسێوە تەنیا بە بەبەهانۍ ئانەی سنوورش بەزنان چێشش سەر مۍ.

پی مەعنۍ جارێوەتەر گرنگی ڕۆنامەنوویسی موینیۆ.

ئێمە فرە بەوریاییوە هەڵسوکۊت مکەرمۍ پەی ئانەی چێش سەرو ئا ڕۆنامەنوویسارە ئامان سەرو کەسیتەریرە نۍ. چونکی نمازا هەواڵ و زانیاری سەرو ئا یاگا کە جەنگ و ئەرەگیرکەردەیشا چنەن پەی ڕای گرڎیی وەڵا بۆوە. هەر ڕووەدایۍ چا هەرێمانە ڕووەمڎۆ، حەقەتینو ڕووەو پەدەکەی  کە ئینا چێرو ئیدارەدای بنەیانەرو بارزانینە زیاتەر و زیاتەر ئاشکرا مکەرۆ. هەر پۊکەی ئا ڕاوجا تنەشا گێرتەنەنە ۋەر، ئینترنێت فرە خاوا و بڕیەی جاڎەکا و ئاستەنککەردەی سەرچەمەکا پەیوەندی پەی ڕاگێرتەین جە ئاشکرا بیەی حەقەتینەکا.

ئی کارۍ گرڎ بە جۆرۍ پەی ئانەینۍ کەس نەزانۆ و ئاگاڎارو هرووژمە کۆمکوژییەکا نەبۆ.

ئینە ئەوەڵ چێوێنۍ کە ۋەرو چەما گنا. جە دەگایەکانە ئێر کۊتەنۆ و زەرەری فرەش بە خەڵکی یاونان واتا بە ئەنقەس کریان، هاموشۆو ڕەوت ۋەربەس کریان، ۋەرو ئانەی بەفڕۆکە فرەو جاڎەکا بۆردومان کریێنۍ، ئاماو لوای پۊرەشەرە محاڵا، تەنانەت جە بڕۍ شۊنێنە جاڎەکۍ بیێنۍ بە چاڵی گۆرۍ.

مەڵامەتوو چاڵەگۊرەکا دلېڕاسەو جاڎەکا، بوردومانو فڕۆکە جەنگیەکا تورکینۍ.

بە شێوێوە سیستماتیکی ڕێکۍ بۆردومان کریێنۍ. ئەوەڵ چێوۍ کە سەرنجو ئێمەش کێشت ئانەنە کە ئا شۊنەمۍ ئێرشا چنە کۊتەنۆ بە مەڵامەتوو بۆردومانەکاوە بیەن. ۋەرو ئانەی گەریلا جە کاتو فاڕایۆ سەروازا و کارەوانە سەروازییەکانە نەتاوۆ چالاکیی سابۆتاژ ئەنجام بڎۆ. جە لێوەتەرۆ ئەرەنیشتا مەنتیقەکەی بۆردومان مکەرا پەی ئانەی شۊنەماو ۋێشا چۆڵبکەرا و ئا جاڎا بەکار نەبەرا.

سەرەڕاو ئانەی هامنا، بەڵام ئا کەسۍ کە سەوزە و میوەشا کەردەن، نمەتاوا ترۆمبێلەکاشا بەرانۍ سەرو بویسانەکاشا ئانەیچ بیەن بەمەڵامەتوو زەرەری پەی هاموڵاتیا. پەی ئانەی گەریلا ئیسفاڎە چی باخا هۊرنەگېرا، باخەکا بۆردومان مکەرا و سۆچناشا.

ئا جاڎۍ کە خەڵکی مەدەنی پەی حاسڵکەردەی پەنەوازیەکاشا بەکارشا بەرێنۍ، ئیساتۍ بیێنۍ بە ڕای سەروازیۍ. چۍ مرۆڤەکۍ جە هەر کات وساتێوەنە بۆ چانەینە کوشیا. خەڵکی ئاگاڎار مکەراوە ئەگەر ئا ڕایا بەکاربەرا ئانە ۋێشا ۋەرپەرسێنۍ کە چێشش سەرمۍ. جە حەقەتینەنە ئینە تەنیا زانیاری نییا، فرەو کەسی ماچا پەدەکە جە خاڵەکاو ۋێشەنە کیشیانۊ و ڕادەسوو میتیش کەردێنۍ و جە بڕۍ شۊنێچەنە میت و پاراستن پێوەرە جە خاڵەکانە ۋنەپەرسایۆ و هەڕەشۍ جە خەڵکی مکەرا.

ئێمە ڕووانە شایەتحاڵۍ ئانەینمۍ کە کەلوپەلی سەروازی بە گەڵابۍ فاڕیاوە پەی هەرێمەکەی. هەمدیسان ئەوەڵ چێوۍ کە سەرنجما کێشۆ لاو ۋێشەرە ئا دوکەڵەنە کە پېسە هەورێوی تاریکی ئاسمانی پۊشنۆرە. ئینۍ ئەوەمەنۍ ئێرەکانۍ کە هەڵای کوشیێنێوە و بە ئەنقەس جەلایەنو دەسەڵاتیوە پەشت گۆش موزیا. بیەی بەردەوامو درۆنە سیخوڕییەکا ڕا نمەڎۆ مەردم ۋێشا ئێرەکا کوشناوە. ئا کەسۍ ڕووە جە ئێرەکا مکەرا جەلایەنو درۆنە سیخوڕەکاوە هەڕەشێشا ۋنە مکریۆ. پی کارەیشا هەوڵمڎا فشارێوە دەروونی وەش بکەرا. هەرچڼە ئا کەسۍ کە ئێرەکا کوشناوە گرنگی بە هەڕەشەکا نمەڎا، بەڵام ئی فشارو چەوەسنایۆ و ئەرەگیریە جەلایەنو سوپاو تورکی ئەرەگیرکەریۆ بەردەوامێنۍ.

جە بڕۍ یاگێنە دوکەڵی چەرمە بەرز مبۆوە. هەر جە دوورۆ هەستش پنەمکەری ئا دوکەڵۍ ئاسایۍ نیەنۍ و ئێمە نمەشناسمێش. پېسە پەیامنێرۍ جەنگی کە ساڵانێوەن جە هەرێمەکاو پارێزنای مەدیاینە هەرمانە مکەرمۍ و جە جەنگەکا  گەریلاکانە بیەیما هەن پېسە ڕۆنامەنویسی، یەکسەر میاومێنە کە ئی دوکەڵۍ مادەی کیمیایی فسفۆڕیێنۍ. ئی دیمەنۍ سەرو فرەو کەشە بەرزەکاوە موینیۆ. دوکەڵەکە سەرەتا سەرو مەنتیقەکەیرە وەڵا مبۆوە و کاریگەری مکەرۆ سەرو پانتایییۍ ۋەرفراوانی. دماتەر وردە وردەی بەرەو ئاسمان بەرز مبۆوە.

سەرەڕاو قەڎەغەبیەی ئی گازە ژەعراوییا. بەڵام کاتێ باسو گەریلای و خاکو کورڎەسانی مۍ وەڵێوە، کەس نتقچ چۆوە نمۍ. فرەتەرین کاریگەری ئی دوکەڵا کە هێواش هێواش وەڵا مبۆوە و بەرەو ئاسمان بەرز مبۆوە، خاک، ئاوی، دارسان و زیندەوەرا مەنتیقەکەی وزانۍ چېرو کاریگەریێوە مەترسیڎاریۆ.

وەختۍ بە مەنتیقە تازە بۆردومانکریاکارە ۋییەرمۍ، بەمەڵامەتو ئا دوکەڵەی کە ناخما مگېرۆ، نمەتاومۍ هەناسە بڎەیمۍ. ڕووەو خاکو فرەو ئا مەنتیقا کە بوردوومان کریان ڕەنگەش فاڕیێنە. فرەو ئاژەڵا مەنتیقەکەی مرارۍ بیێنێوە. تەنانەت مەشی و مرۆچۍ و هەنگۍ کە ۋەرکۊتۍ ماددە کیمیاوییەکا بیێنۍ وەڵۍ گرڎ چێوێنە بە کۆمەڵ مرا. بەمەڵامەتوو ماددە کیمیاوییەکا کە نیشۆ سەرو گەڵاو دارەکاوە ، دماو ماوۍ گەڵاکۍ وشکۍ با وە جە وەختێنە ئاگات چنە نەبۆ دەست ۋەرو ماددە کیمیاۋییەکا گنۆ، پۊست سۆچنۆ.

تا مانگێ چێوەڵی جە دەگایەکا ئا مەنتیقانە کە باسما کەردۍ، بەدەیان هەزار کەسۍ ژیۋێنۍ. بەڵام تەرسەو ڕژێمو فاشیستی تورکینە مەنتیقەکێشا جیا ئاستێنۍ، ئینەیچ پەی پەدەکەی مەنەنۆ و پیلانەکېشا خێراتەرۍ کەردێنۍ.

جە مەنتیقە ئەرەگیرکریایەکا پانیشینە، ڕا بە دەنگ و ڕەنگو هیچ زیندەوەرێوە نمەڎریۆ.

پی مەعنۍ ئا توانا سەروازیۍ کە گەریلا جە ئاسمان و زەمینۆ پەرەشا پنە دێنۍ، جە ئاژەو مەنتیقەکەینە دەورو ۋێش هەنش. پا تەرسێوە کە پەشتەو هەر دارێوە گەریلېوە بۆ، ڕەوایەتی بە دلېنەبەردەی دار و درەختۍ دارسانەکا مڎا. سەرچەمەکۍ ئاوەو واردەیۆ ژەعراویۍ مکریا ۋەرو ئانەی ماچا گەریلا بەکارشا بەرۆ. سەروازە ئەرەگیرەکۍ تورکی کە دەس بە هرووژمەکاشا مکەرا، جە تەرسەو ئانەی هەر دەنگێوە کە مژنەواش چانەینە گەریلێوە بۆ، مەنتیقێوە ۋەفراوان سۆچنۆنە. خەڵک چەمەڕایی چێشیش چا سەروازا هەن کە کولتوری دزی و دەسدرێژیشا هەن؟ ئی ئاژە سەرسامێما نمەکەرۆ. ئەرەکۊشای ٤٠ ساڵەو گەریلای وەڵتەر  فرەو وەختا حەقیقەتو سوپاو تورکیش نیشانەدان.

جە حەقەتینەنە جوگرافیاو کورڎەسانی ئینا ۋەردەمو کاولکاریێوە گەورەینە. ئانۍ جە ۋەرا ۋەرو ئی ئاژەینە بێدەنگێنۍ، پەنەوازا بزانا کە ئاینڎەو ۋێشا سۆچنا. جوگرافیاو کورڎەسانی کە بە بەهای گەورەو ئەرەکۊشای بەرهەم ئامان، ئڼە بە قیمەتا کە ئینسان بە تایبەتی نمەتاوۆ خاکو پانیشتی پەی خیانەت و ئەرەگیری دەوڵەتو تورکی بازۆ جیا. گەریلاکۍ کورڎەسانی گیانو ۋێشا وزا مەترسیۆ و پاگیری سەرو پارێزنای ئی خاکیە مکەرا. ئا گەشمەرڎۍ ڕووانە مڎریا نیشانۍ ئی حەقەتینەینۍ. بەڵام ئانۍ هەوڵو مردنای ئەرەگیری مڎا، بەبێ ئانەی ژیۋای ۋێشا ڕزگار بکەرا دمایین قسۍ مکەرا.