نوسینگەو یاسایی سەڎەی سەبارەت بە دیڎارەکەو ٢٣ۍ ئۆکتۆبەری چنی رابەر ئاپۆی ئەرەیاۋنێوەش وەڵا کەرڎۆ و داواش کەرڎە، پاشێلکەردەی سیستماتیکی مافەکا مرۆڤی جە ئیمراڵینە دمایش پنە بۍ و دەرفەت بە پاڕێزنەرا بڎریۆ دیڎار ئەنجام بڎا.
نوسینگەو یاسایی سەڎەی سەبارەت بە سەردای پەرلەمانتارو دەم پارتی عومەر ئۆجالانی پەی ئیمراڵی ئەرەیاۋنێوەش وەڵا کەرڎۆ.
جە ئەرەیاۋناکەینە ئامان، "موەکیلەکەما ئێژا عەبدوڵا ئۆجالان و برازەکەش ئێژا عومەر ئۆجالان جە چوارچێوەو سەردایۍ بنەیانەینە هێزی دیڎارشا ئەنجامدان. دمایین دیڎارو بنەیانەی جە ٣ۍ ئادارو ٢٠٢٠ینە بیەن، واتە چوار ساڵێش سەرەرە ۋییەرڎەن و دماو ئا ماوەیە دیڎارەکە ئەنجامدریان. وەڵۍ گرڎ چێوێنە مشۆم ئا سەرۋنەدایە تەنیا پېسە یەک دیڎاری نەمەنۆوە و درێژەش پنە بڎریۆ. بە پاو دەستوری هەمیشەیی، یاسا و پەیماننامە مېیاننەتەوەییەکا مشۆم ئێژا عەبدووڵا ئۆجالان، حامیلی یەڵدرم، عومەر خەیری کۆنار و وەیسی ئاکتاش بتاوا پارێزنەرەکاشا و بنەیانەکاشا بوینا. ئێژا ئۆجالان خاوەن هێزۍ تیۆریک و پراتیکا کە متاوۆ پرۆسەکە جە بوارو جەنگیوە فاڕۆوە پەی بوار و زەمینۍ یاسایی و سیاسی، هەرپۆکەی دیڎاری بەردەوام چنی ئێژا ئۆجالانی جە تورکیا و هەڕێمەکەنە ڕا ۋەردەمو چارەسەری کێشە کۆمەڵایەتی و سیاسیەکانە سەرو بنەماو ئاشتی، دیالۆگی و رێککۆتەی دیموکراتیکینە مکەرۆوە.
چی چوارچێوەنە ئێمە ماچمۍ، مشۆم پاشێلکارییە سیستماتیکەکا مافەکا مرۆڤی کە ئیمراڵینە بەردەوامێنۍ دمایشا پنە بۍ، مافو دیڎاری چنی پارێزنەرا و بنەیانەکا کە جە ساڵەو ٢٠١٩یوە ئاستەنگ کریان، بە پاو یاسای جابەجێ بکریۆ".
