قوبرسەنە کۆنفرانسێوە بە نامۍ 'قوبرس و کورڎەسان چێرو سەیەو جەنگی جەهانی یەرەمی' و 'سیاسەتو فاشیزمی تورکیای ئیسرائیلەنە و بێدەنگی ئەوروپا'ی لواڕاوە و بە سەڎان کەسۍ بەشداریشا کەرد.

کۆنفرانسەکە جە نیکۆسیای پایتەختەنە لواڕاوە و کەسانێوە فرۍ جە پارێزنەرا، پەرلەمانتارا، نوویسەرا، ڕۆنامەنوویسا و چالاکا و گەلوو قوبرسی بەشداریشا کەرد.

جە هۆڵوو کۆنفڕانسەکەینە وێنەو ڕابەرو گەلوو کوردی عەبدوڵا ئۆجالانی و قارەمانی هامبەشو گەلوو کوردی و قوبرسی تیۆفیلۆس جۆرجیادێس کە جە لایەنو دۆڵەتوو ئەرەگیرو تورکیوە تیرۆرکریا، هۆرۍ واسیێبێنۍ.

'پێوەرە متاومۍ دیوارەکا ئیمرالی وڕنمۍ'

ناوەندو کولتووری کوردی تیۆفیلۆس و یۆبیەی پارێزنەرا دیموکراسی قوبرسی سەرپەرشتی کۆنفرانسەکەیشا کەرد و وتارەو سەرەتای جە لایەنو پارێزنەر ئفستاتیۆس ئفستاتیۆیۆ پێشکەشکریا. ئفستاتیۆ واتش: "تەنیا ڕا پەی دمایی پنەئاردەی بە فاشیزمی و ئەرەگیری دۆڵەتو تورکی مڎرامانی هامبەشا و ئاماژەش پانەی کەرڎ کە چارەسەری کێشەو کوردی و چارەسەری کێشەو قوبرسی و ئازادی ئێژا عەبدوڵا ئۆجالانی گرڎ عیلاقەشا پێوەرە هەن.

هەرپاسە سیاسەتمەدارو کوردی لەزگین سەرحەد ئاماژەش پانەی کەرڎ کە تۆڕێوە قەوەتو ئەرەکۊشای چنی ئی کۆنفرانسەیە دەسش پنەکەرڎ و واتش: "من قەناعەتم هەن کە پێوەرە متاومۍ دیوارەکا ئیمرالی وڕنمۍ."

جە یوەم ئەرەنیشتەو کۆنفرانسەکەینە ڕۆنامەنوویس و نوویسەر سەفکان کۆبانێ، شارەزاو ژیۆپۆلەتیک ئینترناشناڵی کریستۆڤ ئیاکاوڤو و ئەلیکۆس مهالدێس قسێشا کەردۍ.

گەریلا ژیۋایش بەگەلی بەخشاوە

مهالدێس باسش جە مڎرامانی تاریخی ئازادیوازا کوردی کەرد و واتش: "گەریلا ژیۋایش بە گەلوو کوردی بەخشاوە و بە شۆڕشو ۋەرنیشتی مایۍ ئیسفاڎە بەخشاین پەی جەهانی."

مهالدێس ئاماژەش پانەیچ کەرڎ، عەبدوڵا ئۆجالان ڕابەرێوەن کە متاوۆ کاریگەری بکەرۆ سەرو ئاشتی و ئارامی گرڎو جەهانی و واتش: "داواو ئازادکەردەی عەبدوڵا ئۆجالانی تەنیا داواکاریێوە ئینسانی نییا، وەڵۍ گرڎ چێوێنە داواکاریێوە سیاسییا و تەنیا پێوەس نیا بە گەلوو کوردیۆ."

مهالدێس ئەرەیاۋناش، سەرساما بە گەلوو کوردی کە گیانو ۋێشا پەی تاریخی، نەتەوە، زۋان، ئشناسنامە و هۆشیاری ۋێشا بەخت مکەرا و واتش: تا فاشیزمو تورکی بە تەمامی نەشێویۆ بەردەوامۍ بیمۍ جە کۆششی و ئەرەکۊشای، مشۆم وڵاتێوە دوور جە ئەرەگیری دۆڵەتو تورکی پەی زاوڵەکاما وەش بکەرمۍ.

'ڕابەر ئاپۆ  تەنیا ڕابەرا کە متاوۆ جە ۋەرکۆتوو دلێڕاسەینە چارەسەری بەدیبارۆ'

کۆنفرانسەکەنە سەفکان کۆبانێ قسێش کەردۍ و ئاماژەش بە گرنگی پارادایمەکا ڕابەرو گەلوو کوردی عەبدوڵا ئۆجالانی جە چارەسەری کێشەکاو ۋەرکۊتوو مېیامینینە کەرد و واتش: "پارادایمەکۍ ڕابەر ئاپۆی دمایی بە نەتەوەپەرسی و نەژاڎ پەرسی مارۆ. جە پارادایمو ڕابەر ئاپۆینە دەوڵەت-نەتەوە کە سەرچەمەو قەیرانەکان ڕاش نمەبۆوە. مەڵامەتوو گۆشەگیرکەردەیچش ئانەنە کە دژوو ئا عەقڵیەتەیە مردانۆ. خۆسەری ۋەرنیشتی نمونەی کۆنکرێتی پارادایمەکا ڕابەر ئاپۆیا"

دماتەر کریستۆڤ لاکاوڤو باسس جە هەوڵو هەژمونگەرایی هێزە مېیاننەتەوەییەکا کەرد و ئاماژەش پانەی کەرڎ کە جە ڕاو تەیب ئەردۆغانیوە هەوڵو وەڵاکەردەیۆ هەژمونگەرای مڎریۆ و واتش: "دۆڵەتو تورکی جە ئازادی کوردا متەرسا. گەر دۆڵەتو تورکیای هەوڵێسی هامکاری و چارەسەری نیشانە بڎۆ، ئانە تاکە موخاتەب چی قۆناغەنە پەنەوازا ڕابەرو گەلوو کوردی عەبدوڵا ئۆجالان بۆ."

وەڵۍ دەسپنەکەردەو بەشی دووەمو سیمینارەکەی کوڵە فیلمێوە سەرو ژیۋای ڕابەرو گەلوو کوردی عەبدوڵا ئۆجالانی نیشانە دریا.

ئەگەر داواو چارەسەری کریابیۍ ئیساتۍ پارێزنەرا ئیمرالینە بێنۍ

ئیبراهیم بیلمەز یۆ جە پارێزنەرا ڕابەرو گەلوو کوردی عەبدوڵا ئۆجالانی، جەڕاو سکایپیوە بەشدارو کۆنفرانسەکەی بۍ و واتش: "چی دماییانە سەرۆکو مەهەپەی کە پارتێوە نەتەوەپەرسا جە تورکیانە، مەرحەبای نوێنەرا دەم پارتیش جە پارلەمانەنە کەردەن و گرڎ کەسۍ باسشا چانەی کەرد کە ئایا پرۆسەو چارەسەرکەردەی دەسپنە مکەرۆوە یان نا. بەتایبەتی بڕۍ ڕۆنامەنوویسۍ جە میدیا جەهانیەکانە ئی پرسیارێشا چنەکەردەنا. بڕۍ ئەجۆشانە دۆڵەتو تورکی چنی ئێژا ئۆجالانی کوۍ بیێنێوە بەڵام گەرەکما چێوە واچوش. چێوی چامنە بیەیش نییا ئەگەر ئانە بیەبیۍ، ئێمە ئیساتۍ پېسە پارێزنەرا ئاگاڎارۍ گرڎ چێوۍ بێنمۍ."

ناڕەزایی جە دژو گۆشەگیری ئیمرالی

ئەندامو ئەنجوومەنو پەرلەمانو ئەوروپای و پەرلەمانتاری سەربەخۆو قوبرسی و هەرپاسە پارێزنەر کۆستیس ئفستاتیۆ ۋەرا ۋەر بە سیاسەتەکا دۆڵەتو تورکی جە ۋەرا ۋەرو ئیمرالینە ڕەخنەشا جە بێدەنگی ئەوروپای گېرت.

دماتەر پارێزنەر دینۆس پاسپالیدس قسێش کەردۍ و ئەرەیاۋناش کە مشۆم سەرە ئاستی مېیاننەتەوەیی خاوەنداری جە ئەرەکۊشای گەلوو کوردی بکریۆ."