ئەرەگیرکەردەی خاکو کورڎەسانی جە لایەنو دەوڵەتو تورکی ئەرەگیریوە بە هامکاری پەدەکەی بەردەواما، ئینەیچ بیەن بە مەڵامەتو نارەحەتی گەلی بە گرڎیی چینو ڕۆشنۋیرا بە تایبەتی، سەبارەت بە ۋەرفراوانبیەی ئەرەگیریەکا دەوڵەتو تورکی هەر یۆ جە نویسەرا؛ پەروێزهوما و هاوکارنەسرەدین پەی ئاژانسوو هەواڵوو فوراتی ANF ی قسێشا کەردۍ.

'تورکیا ڕێکەوتەیش چنی لایەنێوە ڕامیار و هەرێموو کورڎەسانی کەرڎەن'

نوسەر پەروێزهوما باسش چانەیە کەرد ئی ئەرەگیریەو دەوڵەتو تورکی جە تاریخەنە تازە نیا ، وە جە ڕوو سەروازیچۆ شکسش ئاردەن و پۊکەی پەناش بەردەن ۋەرو هامکاری لایەنێوە سیاسی پانیشتوو کورڎەسانی و واتش: "لایەنێوە ڕامیار جە هەرێموو کورڎەسانینە ڕێککەوتەیش چنی تورکیای کەردەن، پنەما وەشا بزانمۍ ئا ڕێککەوتەی چنی ئەرەگیری کریان پەی ڕای گرڎینیی ئاشکرا بکریۆ کە بزانمۍ چ ئیسفاڎێوەش پەی هەرێموو کورڎەسانی هەن، جگە جە یانە کاولی پەی گەلی؟ ئینە نیشانۍ پرسیارینە سەرو ئا لایەنە ڕامیارەیە کە جە هەرێموو کورڎەسانینە بیەن بە ڕا وەشکەر پەی سوپاو تورکیای. ئینەیچ بیەن بە مەڵامەتوو ئانەی دەگا نشینەکۍ دەگایەکا ۋێشا چۆڵۍ بکەرا. چۆڵکەردەی مەنتیقەکا هەرێموو کورڎەسانی و دەگایەکا و ئامای بەرەو شارەکا بە ماناو گولانەبیەیۆ جوگرافیاو کورڎەسانی و فراونبیەی دەسەڵاتو ئەرەگیرکەری مۍ. ئانەی یاگۍ نیگەرانی گەلی و ڕۆشنۋیرو نویسەران؛ مەرامو تورکیاین کە بە ئاشکرا گەرەکشا خەلافەتو عوسمانی زیڼە بکەرۆوە."

پەروێزهوما جە قسەکاشەنە ئاماژەش پانەیچ کەرد کە پەنەوازا ڕۆشنۋیرا و نویسەرا فشار چا لایەنە سیاسییە بکەرا و ڕاش پەی بنریۆرە و واتش: "مادام لایەنێوە ڕامیارو هەرێموو کورڎەسانی گەرەکشا ڕێککەوتەی ئەنجام بڎۆ با چنی ۋەرنیشتوو کورڎەسانی و چنی لایەن سیاسییەکا سەرنیشتوو کورڎەسانی ڕێکگنۆ کە ئەنجامێوە گۊرە و مەسڵەحەتێوە فرە عالش پەی هەرێموو کورڎەسانی و هەر چوار پارچەو کورڎەسانی مبۆ، چونکە ئاڎۍ ڕامیاریۍ حەکیمانە پەیڕەو مکەرا."

'دەوڵەتو تورکیای چەکی قەڎەغە کریا دژوو  گەلوو کورڎی بە کاربەرۆ'

هەر سەبارەت بە پەرسو ئەرەگیرکەردەی نویسەر هاوکار نەسرەدین ناڕەحەتی ۋێش جە ۋارا ۋەرو ئەرەگیریەکانە بەربڕی، نویسەر جە قسەکاشەنە باسش چانەیە کەرد جە دماو جەنگی جیهانی یوەمی، خەلافەتو عوسمانی هۊرسێویۆوە و جەمۍ دەوڵەتۍ وەشۍ با یۆ چا دەوڵەتا تورکیای تازەن، ئی دەوڵەتە درێژەپنەدەرو سیاسەتو تاونایۆ کلتورییا جە ۋەرا ۋەرو گەلوو کوردینە و واتش: " ئی دەوڵەتەیچە هامشێوەو خەلافەتو عوسمانی ئەرەگیریا و هەوڵو دلېنەبەردەی کەمە نەتەوە و پێکئامایەکاش دان و یۆ چا نەتەوا کە بە درێژایی تاریخی چەوەسیانۆ جە لایەنو ئەرەگیراوە کوردا و بەش بەش کریان سەرو چوار بەشارە و یۆ چا بەشایچە تورکیان. دەوڵەتو تورکی هیچ وەختۍ قەڎرش جە کلتوور و زۋان و ئینسان و کوردی نەگېرتەن و بە درێژایی تاریخی کوردش چەوەسنانۆ. گەر تەماشەو دەسەڵاتو دەوڵەتو تورکیای بکەرمۍ تەنیا جە دلېینەو تورکیاینە چەوەسنایۆ نیا و بەڵکم جە گرڎ شۊنێنە ئاڎ دژوو کوردیا، گەر تێبینی ئانەی بکەرمۍ دەوڵەتو تورکیی بە گرڎوو هێزو ۋێش و بەچەکی قەڎەغەکریا هرووژمش کەرد سەرو کوردا سوریای. حەرپاسە چەکی قەڎەغە کریایچش  قەندیلەنە بەکار بەردەن."

جە دمادمای قسەکاشەنە هاوکار نەسرەدین پەیامش پەی نویسەرا و ڕۆشنۋیرا کیاست کە دژو ئەرەگیریەکا دەوڵەتو تورکی مرداوە و واتش: " بڕۍ پارتۍ ڕامیارۍ نەک هەر بێدەنگێنۍ بەڵکم هەنشا بیەن بە چەمساغ و دەوڵەتو تورکی ئەرەگیرکەری. دەوڵەتو تورکی نەک دژو مرۆڤی بەڵکوم دژو ژیۋگە و ژیۋایچا، ئانە ئەرکو گرڎیمانە جە ۋەرا ۋەرو ئی کارە قیزەوەنا دەوڵەتو تورکیاینە هەڵوێسما بۆ.