پەکەکە واتش: "داوا جە گرڎ لایۍ مکەرمۍ، بەشێوێوە کاریگەر جۆشوخرۆشو ١٥ و ئابی ئەزموون بکەرا، بەجۆشۆ جەژنەو ئێمەی گەریلای پیرۆزە بکەرا، دەرز جە جەنگوو ئازاڎیی ٤٠ ساڵەی هۆربگێرا و جە ساڵەو ٤١ ەمینوو هەڵمەتەکێنە، ئەرەکۊشای ئازاڎیی و دیموکراسی کاریگەرتەر بکەرا"
کۆمیتەو ڕاوەبەری پەکەکەی بۆنەو ساڵیاڎو هەڵمەتەو ١٥ و ئابیۆ ئەرەیاۋنێوەش وةڵا کەردۆ.
کۆمیتەو ڕاوەبەری پەکەکەی جە ئەرەیاۋناکەینە ماچۆ:
"ئێمە ئینایمۍ چلەمین ساڵیاڎو هەڵمەتەو شۆڕشگێڵنی ١٥ و ئابینە کە جە ئەڎابیەیۆ کورڎین، تاریخو ئێمەش جە ئەگەرو دڵێنەشیەینە بە ئازاڎی فاڕا پەی بیەی. پېسە جمیەرو ئازاڎیی کورڎەسانی و گەلوو کورڎی سەرو بناغەو هەڵمەتەو گەریلایی ١٥ و ئابی، ٤٠ ساڵێن بێ مردای ئەرەکۊشای ئازاڎیی ڕاوەبەر مکەرا. ئی ئاژە ئەوەڵجارا جە تاریخو کورڎەسانینە ڕووە بڎۆ، پەی تاریخو ڕزگاریی مرۆڤایەتی و گەلا چێردەسەی ساحیب و بایەخێوە تاریخیا. بەڵێ، جە ٤٠ ساڵی ۋیێەرڎەنە ئێشو ئازار و ۋن متەی فرۍ بێنۍ، بەڵام هیچکامشا بەزایە نەلۍ؛ بەپێچەوانۆ جە ڕاو ئەرەکۊشای ئازاڎییوە جە ٤٠ ساڵی ۋییەرڎەنە دەسکۆتۍ فرە گۆرێما پەی بیەی و ئازاڎیی کورڎی بەدەسئاردۍ. پېسە گەلی، سەردەمێوە جە قارەمانی و ڕۊشنای و ئازاڎیما ئەزموون کەرد. چێگە بە دمایچۆ، بە زېڵۍ هەڵمەتەو ١٥ و ئابی و سەرکۆتەیۆ ئەرەکۊشمۍ و گرڎ کاتۍ سەرۍ گنمۍ".
پەکەکە جە ئارەیاۋناکەیشەنە ماچۆ: "سەرو ئی بناغەیە، ١٥ و ئابی، جەژنەو ژیۋایۆ نەتەوەیی و گەریلای جە ڕابەر ئاپۆی و گرڎو هەمڕایا و هێزەکاو گەریلا قارەمانەکا و گەلی وڵاتپارێزنیما و دۆسە دیموکراتەکاما پیرۆزە مکەرمۍ.
جە کەسایەتی فەرماندە نەمرەکامانە عەگیدی و زیلانێنە، بە ڕێز و سوپاسۆ گرڎوو گەشمەرڎە قارەمانەکاما یاڎمارمێوە. هەمڎیسان قەول واوەی مکەرمێوە، کە مەرامەکاشا سەروزمۍ و یاڎەکاشا بە زیڼەیی مازمێوە. جە ٤١ ەمین ساڵیاڎو ١٥ و ئابینە، واوەیش مکەرمێوە، ئەرەکۊشای ئازاڎیی و دیموکراسییما فراوانتەر مکەرمۍ، هەڵمەتەو ئازاڎیی گەردوونیی پەی ئازاڎیی جەستەیی ڕابەر ئاپۆی، میاونمۍ بە سەرکۆتەی".
با ٤١ ەمین ساڵیاڎو هەڵمەتەکۍ، بکەرمۍ بە ساڵەو سەرکۆتەی
کۆمیتەو ڕاوەبەری پەکەکەی جە ئەرەیاۋناکەینە سڵامش کیانا پەی مهەندیسوو هەڵمەتە گۆرەکۍ ڕابەر ئاپۆی و واتش؛ ئێمە فرە عال مزانمۍ کە هەڵمەتەو شۆڕشگێڵنی ١٥و ئابی کە تاریخوو گەلوو کوردیش فاڕا، بە تەمامی بەرهەموو بلیمەتی و ڕەنجوو ڕابەر ئاپۆی بۍ. ڕابەر ئاپۆ جە گرڎ قۆناغێوەنە سەرو بناغەو فاڕای شێواز و تاکتیکی هەڵمەتەو شۆڕشگێڵنانۍ ١٥و ئابیش وەڵێوست، بەجۆرێ کە حەجگیز تووشو شکسی نەبۆوە. ڕابەر ئاپۆ دەربارەو هەڵمەتەو گەریلایی ١٥ و ئابی و ئا جەنگوو ئازادییەی سەرو ئی بناغەیە وەڵێکۆت، هۊرسەنگنای قووڵ و ماناڎارش کەرد.
ڕابەر ئاپۆ سەرو بناغەو فاڕای پارادایمو سیستەمو ۋێپارێزنای بە سەرمەشقایەتی گەریلای و جەنگو ئازاڎی سەرو بناغەو هێزی جەوهەری پێناسەش کەرد. جە چلەمین ساڵیاڎو هەڵمەتەو ١٥ و ئابینە، بە ڕێزێوە فرۆ سڵام مکیانمۍ پەی مهەندیس و هەڵمەتە گۆرەکۍ ڕابەر ئاپۆی، داوا جە گرڎ لایۍ مکەرمۍ کە ۋێشا بە وڵاتپارێزن و دیموکرات موینا، کە جە مڎرامانی تاریخی ئیمراڵی بەعالی بیاوانە و هەڵمەتەو ئازاڎیی گەردوونی بە مەرامو ئازاڎیی جەستەیی ڕابەر ئاپۆی، سەرو هێڵۊو ١٥ و ئابی و سەرکۊتەی بەرەو وەڵۍ بەرا.
پېسە مزانمۍ، هەر چێوۍ جە ٤٠ ساڵی ۋییەرڎەنە بەنامۍ ئازاڎیۆ ئەزموون کریان و خوڵقیان، بە ئەرەکۊشای و سەرمەشقایەتی گەریلای سەرو بناغەو ١٥ و ئابی بەرکۊتەن. گەر هەڵمەتەو ١٥ و ئابو ١٩٨٤ ی و جەنگوو گەریلای ٤٠ ساڵەی نەبیۍ، ئیساتۍ جە کورڎەسانەنە چێوۍ بە نامۍ کورڎبیەی و ئازاڎیی و مرۆڤایەتی نەمەنێوە. هەڵمەتەو ١٥ و ئابی، شۆڕشو ژیۋایۆ نەتەوەییش بەدیئاورد. هەڵمەتەو ١٥ و ئابی شۆڕشو ئازادیی ژەناش دەس پنە کەرد، ئەرەپڕای گەلوو کورڎی بەرهەموو جەنگوو گەریلاین. سەرو ئی بناغەیە و دژوو پیلانگڵنیی مېیاننەتەوەیی ڕابەر ئاپۆ فاڕای پارادایمیش کەرد.
هەڵمەتەو ١٥ و ئابی بیە بە هەڵمەتەو ئازاڎیی و دیموکراسیی پەی تەماموو مرۆڤایەتی
پەکەکە جە درێژەو ئەرەیاۋناکەیشەنە سەرنجش وست سەرو هەڵمەتەو ١٥و ئابی و واتش؛ ئی هەڵمەتۍ تەنیا پەی گەلوو کورڎی ڕاسی وەڵێوستەی بیەی ئازاڎی و ڕۆشنگەری نەبۍ، جە هەمان کاتەنە گرڎ ڕەهەندێوە "پەرسوو کورد"ـیش ڕۆشن کەردۆ. بە ئاشکراکەردەی حەقەتینوو کۆمارو تورکی فاشیستی و ستەمکاری و قڕکەری و ناستەی گرڎ جۆرە درۆ و فێڵێوە، ڕاس و دروسی دیموکراتیزەکەردەی تورکیایش نیشانە دا. جە هەمان کاتەنە ۋەرکۊتوو مېیامینیش ڕۆشن کەردۆ کە جە تاریکی دەوڵەت-نەتەوەینە گیری کەردەن و گرڎ حەقەتینە تاریخیەکێش ئاشکرا کەردۍ. سەرو ئی بناغەیە، هەڵمەتەو ١٥و ئابی ڕۆشنگەری حەقەتینەش پەی گرڎو تورکیای و ۋەرکۊتوو مېیامینی و جیهانی خوڵقنا، وە بیە بە هەڵمەتێوە گرنگەو ئازاڎیی و دیموکراسی پەی تەمامو مرۆڤایەتی.
پېسە مزانیۆ دەوڵەتو تورکیای پەی ماڕای هەڵمەتەو ١٥و ئابی و جەنگو گەریلای بە گرڎوو هێزو ۋێشۆ هرووژمش کەرد و پەی ئینەیچ گرڎوو دەرفەتە دلێینەی و جبەرەکێش سەفەربەرۍ کەردۍ. ٢٤، ٤٨، ٧٢ سەعات کاتش دا بە گەریلاکا ئازاڎی کورڎەسانی؛ گرڎ جۆرە ئۆپراسیۆنێوەش ئەنجامدا. ساڵەو ١٩٨٥ جەنگو گەریلایش کەرد بە ڕۆژەڤو ناتۆی و جە مانگەو ئابو هەمان ساڵینە خیانەت و هامکاری بارزانیش لاو ۋێشەرە کێشت.
هەرچنە پا گرڎوو هامکاریاوە کە چی هێزاوە هورشگێرتەبۍ هرووژمش کەرد، بەڵام پەی ماوەو چل ساڵان نەتاوانش گەریلاکاو ئازاڎیی کورڎەسانی بماڕۆ و لاوازشا بکەرۆ. گەلوو کورڎی و جوانا و ژەنا کورڎی بە سەرمەشقایەتی گەریلا قارەمانەکا دژوو ئا گرڎ هرووژمە فاشیستە-قڕکەرانا مڎرامانشا کەرد و کورڎةسانشا پارێزنا. حکومەتو تورکیای و ۋەرپەرسەکێش بە گرڎ جۆرێ شکسشا ئارڎو و وزیۍ سەتڵەو شێخەڵ و تاریخیوە.
ئیساتۍ کە ئینایمۍ چلەمین ساڵیاڎو هەڵمەتەو ١٥و ئابینە، ئیدارەو فاشیستی ئاکەپە-مەهەپە، بە هامکاری ناتۆی و بارزانی، هرووژم مکەرۆ سەرو ڕابەر ئاپۆی و گەریلاکاو ئازاڎیی کورڎەسانی و گەلوو کورڎی و ژەنا و جوانا کورڎی و دیسان بەروارەکا پەی دلێنەبەردەی منیۆراوە. پی هرووژما ئیجاریشە گەرەکشا پارچەکا پانیشتی و ۋەرنیشتوو کورڎەسانیچ ئەرەگیر بکەرۆ و چەسپنۆشا ۋێشۆ. ئی هرووژمە کە جە ٢٦و ئابو ٢٠١٦ دەسش پنەکەردەن، ئارۆ بە پلەی یوەم جە زاپ و مەتینا، جە گرڎوو هەرێمەکاو پارێزنای مەدیای ئینۍ زیاڎبیەینە. بێگومان گەریلای فیدایی کورڎی سەرو هێڵۊو مۆدێرنیتەی دیموکراتیکی ۋێش تازەکەردۆ، سەرەڕاو ئا هرووژمە نایاسایی و نائەخلاقیا، ڕا بە فاشیزمی نمەڎۆ و سەرو هێڵۊو قارەمانی و جە ڕاو مڎرامانیوە ئازاڎیی کوردی پارێزنۆ. گەریلاکۍ ئازاڎیی کورڎەسانی ئارۆ بە زینڼەکەردەیۆ زېڵۍ ١٥و ئابی و سەرکۆتەی جە زاپ و مەتینانە و گرڎوو هەرێمەکا پارێزنای مەدیاینە و تەمامو سەرنیشتوو کورڎەسانینە پەرەش پنە دێنۍ. سڵام و پیرۆزبایی مکیانمۍ، پەی مڎرامانی قارەمانانەو گەریلاکا هەپەگەی و یەژاستاری، بەتایبەتی چالاکییەکا ئی دماییە جە سەرگەڵێ و کەشو وەهاری و گەڤەری و گرڎوو مێڎانەکانە، وە هیواو سەرکۊتەی زیاتەری موازمۍ. باوەڕیما هەن کە مڎرامانوو گەریلای و گەلی گرڎ جۆرە گەمێوە فاشیزمی هۊرشێونۆوە.
پەی گەلی وڵاتپارێزنیما و ژەنا کورڎی وڵاتپارێزنی و جوانا!
پەکەکە جە بەیاننامەکەشەنە ئاگاڎیش دا بە گەلی وڵاتپارێزنیما و جوانا پی جۆرە واتش؛ بێ گومان کاتێ ئێمە یاڎو ٤٠ ساڵەو ئی هەڵمەتۍ مکەرمێوە، جە گرڎ کاتێ قەوەتتەرێنمۍ و متمانەما بە هێزو ۋێما زیاتەرا. هێزیچما بە شێوێوە پلە بە پلە زیاڎ مکەرۆ. سەرو ئی بناغەیە ئەرەکۊشای ئازاڎیما جە چوارچێوەو هەڵمەتەو ئازاڎیی گەردوونینە جە گرڎ مێڎانێنە وەڵێوزمۍ. بەڵام مشۊم بزانمێچ کە دوژمنیچ هەر پاسە مەمەردۆ. جە ٤١ ەمین ساڵیاڎو هەڵمەتە گۊرەکێمانە، دوژمن هرووژمەکاش جە گرڎ مێڎانێنە زیاتەرۍ مکەرۆ. گرڎوو دەرفەتەکاش جە دلێینەو جە جبەرۆ پەی ئی هرووژما سەفەربەر مکەرۆ. ٤١ مانگێن هیچ زانیاریێوەما سەرو ڕابەر ئاپۆی نییا. هەواڵما جە ئاژەو تەندروستیش نیا. هرووژمە ئەرەگیریەکۍ پەی سەرو هەرێمەکاو پارێزنای مەدیای بە هامکاری عێراقی و پەدەکەی بەردەوامێنۍ. زینانەکۍ پەڕۍ بیێنۍ و گرڎ جۆرە ئەشکەنجێوە هەن. هرووژم و قڕکەردەی دژو زۋانی و چاندی و بیەو کوردی هەن، جە ڕاو تاڵانکارییوە گەرەکشانە سرووشت و گلێرگەو کورڎەسانی دلێنەبریۆ.
بە پوختی هرووژمەکۍ پیلانگێڵنی مېیاننەتەوەیی بەردەوامێنۍ. بێگومان ئێمە پېسە جمیەری و گەلی مڎرامان مکەرمۍ و دەرفەتو ئانەیچما هەن. بەڵام ئاژەکە جدییا و نمەبۆ بە ئاسایی بوینیۆ. دماتەر با بە دروسی جە قۆناغەکۍ بیاومێنە و دژو پیلانگێڵنیی مېیاننەتەوەیی ئەرەکۊشای ئازادیی جەستەیی ڕابەر ئاپۆی جە گرڎ یاگێنە قەوەتتەر بکەرمۍ. جە گرڎ کاتۍ زیاتەر بە هەستیاری و ڕیکوستەیۆ مامەڵە بکەرمۍ. زیاتەر پەشتگیری جە ڕابەر ئاپۆی و گەریلای بکەرمۍ. چنی مڎرامانوو ئیمراڵی و گەریلای یۆبگێرمۍ و ئەرکی وڵاتپارێزنیما بە تەمامی جابەجێ بکەرمۍ. دژو هامکاری و خیانەتیچ یۆبیەی وڵاتپارێزی وەڵۍ وزمۍ. سەرو هێڵۊو ۋێپارێزنای ۋیما پەروەردە و رێکوزیا و قەوەت بکەرمۍ. جە نزیکایەتی و هەڵوێسی تاکگەرایی و دووەبەرەیی و سیاو وینی و دورۍ گنمێوە. بە ڕۆحو ١٥ و ئابی و سەرکۊتەی، ۋێما سێرۍ بکەرمۍ. جە گرڎ یاگێنە بەمۆراڵۍ و ڕێکوزیۍ و ۋەرپەرسۍ و چالاکۍ بیمۍ!
پەی گەلوو وڵاتپارێزنوو پانیشتیما!
پەکەکە جە بەیاننامەکەشەنە پەیامش پەی گەلوو پانیشتی بۍ و پیجۆرە واتش؛ شمە جە گرڎ لێوە زیاتەر ڕووبەڕوو هرووژمی فاشیستی و کۆڵۆنیاڵیستی و ستەمو فیوداڵی بیەیدێوە. ئارۆ ئیدارەو فاشیستی ئاکەپە-مەهەپەی مقارنە بە هرووژمەکا وەڵتەرو ئیدارەو سەدامی، هرووژمۍ دژوارتەرۍ مکەرۆ. ئیدارەو عێراقی و خیانەتو بارزانیچ هامبەشۍ ئینەینۍ. خیانەت و ستەمو بارزانییەکا، تازە نیا. شمە عال ئینەی مزاندۍ. پېسە چنی ئیدارەو عێراقی و بارزانی سەرمەشقی هرووژم و ئەرەگیری دەوڵەتو تورکی مکەرا، هامکات زانیاری ناڕاسیچ دەربارەو پەکەکەی و گەریلاکا ئازاڎیی وەڵا مکەراوە. هەرچڼە هیچ عیلاقێوەشا بە ڕێکوستەی ئێمۆ نییا، پارتەکا پېسە پادێ و تەڤگەری ئازاڎی وزارە کە بەپاو یاساکا عێراقی ئەرەمەرزیێنۍ و بەپاو یاسای کار مکەرا. هەڵبەتە مزاندۍ ئاڎۍ چی ئی کاریە مکەرا. هەرێموو برادۆس و ڕێکانی و زاپ و مەتینا و حەفتانینشا ورەتۍ بە دەوڵەتو تورکی، چنی ئاکەپە-مەهەپەی هرووژم مکەرا سەرو پەکەکەی کە دژوو ئی هەوڵەیە مڎرامان مکەرۆ. پەی پۆشنایرەو ئینەی، دروۍ چامنۍ مکەرا.
شمە پەکەکەی و گەریلاکاتا عال مشناسدۍ. ٤٢ ساڵێن ئینایدۍ پێوەرە. حەقەتینەکێتا جە نزیکۆ دیێنۍ و مزاندۍ پەکەکە و گەریلاکێتا بێجگە جە ئازاڎیی کورد و کورڎەسانی هیچ داوێوەشا نیەنە ، هیچ سەرچەمێوە مادیی کۆ نمەکەراوە و فیداکارانە دژوو دوژمنا کوردی پێوەرە جەنگ مکەرا. بە پوختی پەکەکە و گەریلاکۍ ئازاڎیی هەر پێسە جارانینۍ. هەمیشە دژوو دژمنی ستەمکار-قڕکەری و خیانەتکاری و هامکارەکاشا ئەرەکۆشۆ. ئارۆ هەرێمەکاو مەدیاینە دژو ئەرەگیرا قارەمانانە جەنگ مکەرا. دژو ستەمکاری و چەوەسنایۆ بارزانینە هەمیشە پاڵپەشتوو شمەن. حەجگیز ئی حەقەتینەیە جەێاد نمەکەردۍ و گرڎ یاگێنە باسش بکەردۍ. گۆش مەداردێنە درووەکا ئیدارەو عێراقی و بارزانییەکا. گرڎ وەختۍ خاوەنداری جە گەریلاکا بکەردۍ کە فیداکارانە پارێزگاریتا ۋنە مکەرا. خیانەتی هامکار و ستەمو فیوداڵی جە ۋێتا دوور داردۍ. یۆبیەی وڵاتپارێزنیی ۋێتا بنیاڎ بنیەیدۍ و ئازایانە دژوو ئەرەگیری و هرووژم و دەوڵەتو تورکی مردێوە!
پەی دۆسا شۆڕشگێلنی و دیموکراتیما جە گرڎ شۊنێنە!
جە دمادمایی ئەرەیاۋناکەینە بانگەواز پەی دۆسا شۆڕشگێڵنی کریاو واتش؛ ئەرەکۊشای ئازاڎی کورڎەسانی بە قۆناغی چارەنووسسازەرە موییەرۆ. جە حەقەتینەنە فاشیزمو ئاکەپە – مەهەپەی گورزەی گۊرێش ۋەرکۊتێنە و ئینا لێوارو وڕاینە. پەشتیوانی بەری و پەشتیوانی بارزانی ئاڎشا ئاستەنۆ. وڕنای دیکتاتۆری فاشیستی تەیب ئەردۆگانی بە پلەی یوەم پەی کوردی و گرڎوو گەلا ستەمۋنەکریای بۆ. تورکیای دیموکراتیک ڕا پەی دیموکراتیکبیەی تەمامو ۋەرکۊتوو مېیامینی وەشمکەرۆ. پەی ڕاگێرتەی چینەیچ هرووژم مکەرا سەرو ڕابەر ئاپۆی و پەکەکەی. جە ۋەرا ۋەرو ئینەینە ئەرەکۊشای شمە و فراوانبیەی ئی ئەرەکۊشایە جە جیهانەنە فرە کاریگەرا. هرووژمە ئەرەگیریەکا فاشیستی ئاکەپە-مەهەپەی و خیانەتو بارزانی بەشێوێوە ۋەرفراوان ئاشکرا بکەردۍ. سەرو بناغەو پارادایموو مۆدێرنیتەی دیموکراتیکی خەباتو پەروەردەی و ڕێکوستەی جە گرڎ مېڎانێنە وەڵا بکەردۍ. بەشداریێوە قەوەتتەر بکەردۍ جە هەڵمەتەو ئازاڎیی جیهانی پەی ئازاڎی ڕابەر ئاپۆی و چارەسەری پەرسو کورڎی. هەڵمەتەکۍ گرڎ شۆنێنە وەڵا بکەردۍ و چالاکی هەمەڕەنگ گۆرەتەر بکەردۍ!.
سەرو ئی بناغەیە دیسان جەژنەو ژیۋایۆ ١٥ و ئابی جە گەلی وڵاتپارێزنیما و دۆسە دیموکراتەکاما پیرۆز مکەرمۍ و بانگەواز جە گرڎ لایۍ مکەرمۍ جە گرڎ شۊنێنە و بەشێوێوە کاریگەر جۆشو ١٥ و ئابی ئەزموون بکەرا. جەژنەو ئێمەی گەریلای بە جۆشۆ پیرۆز بکەردۍ و دەرز جە جەنگو ئازاڎیی ٤٠ ساڵەی هۊرگێردۍ، جە ٤١ ەمین ساڵیاڎو هەڵمەتەکێنە ئەرەکۊشای ئازاڎیی و دیموکراسی کاریگەرتەر بکەردۍ!".
