"پەنەوازا سیاونویسوو یاساو هامسەگێریی زارۆڵە ٩ ساڵا عێراقەنە بکێشنیۆوە"
ڕێکوزیاو پەیوەندییەکاو ژەناو کوردی ئەرەیاوناش، پەنەوازا عێراق سیاونویسوو یاساو هامسەرگیریی زارۆڵە ٩ ساڵا بکێشنیۆوە و داواو گەورەکەردەی کۆشیای هامبەشیش کەرد.
ڕێکوزیاو پەیوەندییەکاو ژەناو کوردی (ڕێپاک) بە ئەرەیاوناێوە ئاماژەش پانەیە کەرد، ماویوە فرەن سیاونویسوو یاساو هامسەرگیریی زارۆڵا جە ١٥ ساڵیوە پەی ٩ ساڵی پەرلەمانوو عێراقینە بیێنە بە پەرسەو ڕۆی پەی ڕای گردینی.
جەختش کەردۆ، ئەگەر هەڵوێستێوە ناڕەزایەتیی نەبۆ، گێرا پەرلەمانەنە پەسەند بکریۆ.
ڕێپاک ئاماژە پانەیە مکەرۆ کە چرەسەروو قەیرانەکا بە دیموکراتیکبییەی و ئازادیی ژەنێ مویەرانێ و ئینەیچە بە ئیسفادەو گەلاو عێراقی مەڕیۆوە و ماچۆ:' ئی پڕۆژە یاسا سەبارەت بە هامسەرگیریی کناچە ٩ساڵا پەرلەمانوو عێراقینە بە ماناو قوربانیداینە بە چارەنویسوو گەلی و ژەناو عێراقی پەی بلۆکی فاشیستی هەرێمێ، ئەنجاموو مدرامانوو گەلوو کوردی و ژەنا و ئینسانی گردوو جیهانینە داعش مەڕیا، ئا ئامانجە کە داعش هەرێمەکەنە بەدەسش نارد،ئی جارە هەوڵێ مدریانە ڕاو هامپەیمانیی تورکیا-پەدەکەیوە قڕوو گەلوو عەرەبی و کوردی و ژەنا بکەرا."
داوا جە حکومەتوو عێراقی مکەرۆ، کە خاوەنداریی جە بەرژەوەندیی گەلاو عێراقی وژەنا بکەرۆ.، ماچۆ:" جیای ئانەیە چەنی بلۆکی فاشیستی ڕێکێ بگنا، پەنەوازا سیاسەتی دیموکراتیکی بە بنەما بگێرا و پڕۆژە یاساو هامسەرگیریی زارۆڵە ٩ساڵا بکێشناوە."
داوا جە ژەنا و جمەرە فێمێنیستەکا و ڕای گردینیی دیموکراتیکی مکەرۆ، پەشتگیری جە کۆشیای ئازادیی ژەناو عێراقی بکەرا و یۆبییەی گەردوونی و کۆشیای هامبەش دژوو هامسەرگیریی زارۆڵا فروان بکەرا".
