عومەر ئۆجالان پەرلەمانتارو دەم پارتی ٢٣/١٠/٢٠٢٤ دماو ٤٤ مانگا چنی ڕابەر ئاپۆی چەمنەکۆتەیش کەرڎ. دیڎارەکە هەم جە ڕای گرڎیی و دلێینەینە و هەم جە ئاستی مېیاننەتەوەیینە دەنگش داوە. ڕابەر ئاپۆ جە ڕاو برازاکەیشۆ پەیامێوەش پەی ڕای گرڎیی کیاست و واتش: " ئیمرالینە گۆشەگیری بەردەواما، ئەگەر هەلومەرج بڕەخسیۆ، هێزی تیۆری و پراکتیکی ئانەیم هەن کە ئی پرۆسەیە جە زەمینەو جەنگیۆ فاڕووە پەی بواری سیاسی و یاسایی."

یووە جە سەرمەشقەکا هەڵمەتەو 'ئازادی پەی عەبدوڵا ئۆجالانی، چارەسەری سیاسی پەی کێشەو کوردی'، لۆڕێنس فێلمان ڕیێلە، پەرلەمانتارەی سۆسیالیستەو سویسرای جە پەرلەمانی فیدراڵینە، دیڎار و پەیامەکەو ڕابەر ئاپۆیش پەی ئاژانسوو فۆراتی هۆرسەنگنا.

'هۆرگێرتەی زانیاری سەرو عەبدوڵا ئۆجالانی فرە گرنگا'

لۆڕێنس فێلمان ڕیێلە، پەرلەمانتارەی سۆسیالیستەو سویسرای، دیڎارەکەو ڕابەر ئاپۆی فرە گرنگا و واتش: "دماو 44 مانگا جە گۆشەگیریی رەهای، ئی دیڎارە یاگۍ سەرنجینە، چونکی جە مانگەو ئادارو ٢٠٢١یوە عەبدوڵا ئۆجالان ڕاش پنە نەڎریان دیڎار چنی کەسوکارەکەیش ئەنجام بڎۆ. بەتایبەتی نەتاوانیچش پارێزنەرەکاش بوینۆ". ئێمە مزانمۍ ئی گۆشەگیرییە نیگەرانی جە بارەو ئاژەی دەروونی و تەندروسی عەبدوڵا ئۆجالانیۆ وەش مکەرۆ.

عەبدوڵا ئۆجالان کە بە شێوێوە ئاسایی مافو ئانەیش هەن ئازاد بۆ، ماوەو ٢٥ساڵان جە زینانەنە ئینا چێرو گۆشەگیریۍ ڕەهاینە. هەرپاسە مزانمۍ کە (CPT) سەردای ئیمرالیش کەردەن، بەڵام هەڵای چا بارۆ گوزارشتەی دماینەو ۋێش وەڵا نەکەردێنۆ و پەی بەربڕیەی پەیلواکاش سەبارەت بە مەرجەکا گۆشەگیری ئۆجالان دەسەڵات و تواناکێش بەکار ناردێنۍ. دلۍ ئی هەلومەرجانە دیڎارو ئۆجالانی چنی برازاکەیش ئاژێوە تازە و گرنگا.

ئایا ئی ڕووەدایە نیشانۍ ئانەینە کە دەسەڵاتدارا بەتایبەتی ئەردۆغان چنی عەبدوڵا ئۆجالانی دەسشا بە دیالۆگی کەرڎەن؟ ۋەرو ئانەی عەبدوڵا ئۆجالان هەڵای دلۍ گەلوو کوردینە خاوەن کاریگەریێوە گۆرە و کەسایەتیێوە سەرەکییا جە پرۆسەو ئاشتی و چارەسەرینە. ئایا ئینە ئەوەڵجارا ئی هەوڵە مڎریۆ؟ ئایا عومەر ئۆجالان پېسە ئەندامێوە بنەیانەی یان پېسە نوێنەرو دەم پارتی چنی عەبدوڵا ئۆجالانی کۆبیەنۆ؟ گرنگ ئانەنە مشۆم وەش وینێبیمۍ: ئینە ئاماژێو ئەرێنییا."

'عەبدوڵا ئۆجالان ئینا هەوڵو ئانەینە ڕا پەی ئاشتی و چارەسەری بکەرۆوە'

پەرلەمانتارە فێلمان ڕیێلە ئاماژەش بە پەیامەکەو ڕابەر ئاپۆی کەرد و ئەرەیاۋناش؛ پەنەوازا دۆڵەتو تورکیای جوابو ئی پەیامیە بڎۆوە. بەپەیلواو من عەبدوڵا ئۆجالان جە ڕاو پەیامەکەیشۆ سەبارەت بە گفتوگۆی و ئاشتی گەرەکشا دۆڵەتو تورکیای وزۆ کۆششۆ، عەبدوڵا ئۆجالان سەرەڕاو ئانەی کە ئینا زینانەنە بەڵام لاو گەلوو کوردیۆ ئاکتەرێوە گۆرە و قارەمانا. ڕەنگە ئاژەو ناسەقامگیری جەهانیچ فاکتەرێوە بۆ پەی ئی گلێرۆبیەیە: ڕەنگە تورکیا چێرو فشارینە بۆ. پەی نموونەی جەنگو بەینو ئیسرائیلی و فەلەستینی فرە یاگۍ نیگەرانییا و چانەینە بۆ بە مەڵامەتوو ئانەی کە پشێوییەکا دلۍ تورکیای زیاتەرۍ بکەرۆ بەڵام پەنەوازا بزانمۍ ئایا ئی گلێرۆبیەیە بەردەوام بۆ یان نا، هەرپاسە ئەنجامێوە عالش چنە گنۆوە یان نا، گرڎ هەوڵێوە پەی چارەسەری ئی جەنگە درێژخایەنەیە ئەنجامێوە عالش بۆنە. ۋەرو ئانەی ئی جەنگە نە ئینا مەسڵەحەتو گەلوو کوردینە نە ئینا مەسڵەحەتو تورکیاینە."

'هێزو عەبدوڵا ئۆجالانی ئاشکرا بی'

پەرلەمانتارە فێلمان ڕیێلە بانگەوازیەکەو سەرۆکو مەهەپەی دەوڵەت بەغچەلیش هۆرسەنگنا و واتش: "داواو دیڎاری چنی عەبدوڵا ئۆجالانی هێزو سەفەربەری عەبدوڵا ئۆجالانی و کوردا نیشانە مڎۆ کە سەرەڕاو فشاری و سەرکوتکەردەی هەڵای بەردەواما و مەبەزیۆ.

مزانمۍ کە سوپاو تورکی هرووژم مکەرۆ سەرو سوریای و عێراقی هەرپاسە مزانمۍ کە گەرەکشانە نوێنەرا ۋەرنیشتی کە هەوڵو ئەرەمەرزنای گلێرگێوە ئاشتیانەی و یەکسانی مڎا، ئاستەنگ بکەرۆ. پا جۆرە هەوڵ مڎۆ هەرێمەکەی وزۆ چێرو کۆنترۆڵو ۋێشۆ. سەرەڕاو ئا فشار و سەرکوتکاریی و ئاستەنگیا، گەلوو کوردی و کوردا دیاسپۆرای بەتایبەتی جە مانگۆو ئۆکتۆبەرو ساڵۆو ٢٠٢٣ێوە پەی ئازادیی عەبدوڵا ئۆجالانی بەردەوام چالاکی ئەنجام مڎا. بێگومان ئی چالاکیۍ دەنگشا دانۆ. بەدڵنیاییوە ئی ئاژە پاسشەکەردەن کە دۆڵەت و ئەردۆغان هەڵوێسەکاشا فاڕانە."

'ئامانجی سەرەکی مشۆم ئازادی عەبدوڵا ئۆجالانی بۆ'

فێلمان ریێلە پەرلەمانتارەو سویسرای جە دمادمایی هۆرسەنگنایەکاشەنە ئەرەیاۋناش؛ دیڎارەکە چنی ڕابەر ئاپۆی کافی نییا، بەڵکم مشۆم ئامانجی سەرەکی ئازاڎکەردەیش بۆ و واتش، کاتو ئانەی ئامان هەڵمەتەی مېیاننەتەوەیی پەی ئازادیی عەبدوڵا ئۆجالانی ۋەرفراوانتەر بکریۆ. فرە گرنگا یاڎ وزیۆوە؛ عەبدوڵا ئۆجالان ئاکتەرێوە گۆرەن جە چارەسەری کێشەو گەلوو کوردینە و پەنەوازا هێزە دیموکراسیەکۍ چا بارۆ سەفەربەری دەس پنە بکەرا. چونکی ئینە جە هەمان کاتەنە بە ماناو سەفەربەری پەی سەربەخۆیی گەلوو کوردین."