ڕێکوزیاو دەزگایەکاو زوانی کوردی سرەکاو سەرنیشتوو کوردسانی و تورکیاینە پارکوو برجا بەلەکوو شەرناخینە جەمێ بیێوە و پەی دەسپەنەکەردەی خەباتوو زوانی و دژوو فشارەکاو سەروو زوانی، نەخشەڕاشا ئاشکرا کەرد. نوێنەروو پارت و ڕێکوزیایەکا بەشدارێ بێنێ و درووشمێ و پانکارتێ بەرزێ کریێوە.  ئەرەیاونیا هامبەشەکە هامسەرۆکوو کۆمەڵەو زوانی و چاندوو برجا بەلەکی، جاهید ئاکلی واناوە.  
گۆشەگیری هوربگێردێ و ڕاو دیالۆگی بکەردێوە
ئەرەیاونایەکەینە وچیا: "بەڕێز عەبدوڵا ئۆجالان ڕاو خەتێ یەرەمێوە، کە پێسەو سیستموو مۆدێرنیتەی دیموکراتیکی و سیستموو نەتەوەی دیموکراتیکی نامێش مبەرۆ، ڕاو چارەسەری پەی ئینسانیەتی موزۆ وەڵێ بەروو جەنگیوە، بەڵام بەداخۆ ئانەی یەرێ ساڵێن ئینا گۆشەگیریینە و هیچش بارەوە نمەزانیۆ، ئینە پاشێلکەردەی مافی و یاسێن و گۆشەگیریی بەڕێز ئۆجالانی ڕاسیینە گۆشەگیریی بەهایەکاو نەتەوەو کوردی و ئینسانین. فیکروو بەڕێز ئۆجالانی فرە گرنگا پەی چارەسەروو قۆرتەکاو کوردسانی، تورکیای و ەرکەوتوو دلێڕاسەی و جیهانی. پەوکای وەروو ئی سەبەبا پەنەوازا دەمودەس دمایی بە گۆشەگیری بێ و ڕا پەی دیالۆگی بکریۆوە".
ئاماژە پانەیە کریان جیای دیالۆگی دەسەڵاتی فاشیست تورکیانە قڕوو ژەنا و گەلوو کوردی ئاادیوازی مکەرۆ جە ڕووەو جەستەیی و کولتووریوە.  چی دمایایچۆ دژو زوانی و چاندی و هونەری و هورپڕای و گۆرانییە کوردییا فشار و هجوومێ و گێرتەی پیادە مکەرۆ. دەوڵەتوو تورکی هەوڵێ مدۆ زوانی کوردی جە گلێرگەی دوور بوزۆوە و تەوقەش بدۆ. 
"زوان جەستەتا، خاوەنداریی جە جەستەیت بکەرە"  
جەخت کریاوە کە زوان پایێ سەرەکییەنە پەی ئینسانی و گلێرگەی و نەتوەکا و پێسەو نانی و ئاوێ زەروورا، وچیا:" بەڕێز ئۆجالان دەسنیشانش مکەرۆ، ئاستوو وەڵێکەوتەی بگلێرگەی بەندا بە زوانیوە ڕاو قسە نامیەکێشۆ" زوان جەستەن، خاوەنداریی جە جەستەیتا بکەردێ" تیشکە موزۆ سەروو گرنگیی زوانی ئەدایی. بەڵێ زوان خودوو ژیوایا، پەوکای هجوومەکێ پەی سەروو زوانی تاوانی ئینسانیێنێ،پەی نەتەوەو کوردی ئینە ڕاسیێوە بنەڕەتی و حاشاورنەگیرا".
چی چوارچوەنە ڕێکوزیێ و دەزگایەکێ جەخت چی خاڵا مکەراوە:
* کۆشیای و خەبات پەی هۆشیاریی زوانی کوردی چا یاگەنە کەە کوردش دڵینە مژیوۆ ڕاو چالاکییە نۆعاو نۆعاوە.
* دژوو حەر جۆرە پەشتگۆشوستەێوە کۆشیای خەباتی سەربەوێ و گردین تا زوانی کوردی بۆ بە زوانوو بازاڕی و سیاسەتی و  ئەرەمەرزیا گردینەکا و گردوو بوارەکاو ژیوای.  
*وەڵاکەردەیوە سەدا هەزار وەڵاکریاوا و پانکارتێ و لافیتێ و تابلۆیێ کوردیێ پەی هۆشیاریی زوانی کوردی دلێ سیاسەتمەدارا و نویسەرا و ڕێکوزیایا و پیشەوەرا و هەرمانکەرا و گردوو لایەنە کوردییەکانە و گەلوو کوردینە.
* گرد یاگێوەنە قسەکەردەی و نویستەی و وانایوە، شیعرێ و گۆرانیێ و هورپڕای بە جلێ کوردیێوە. 
* کۆبییەیوە ڕووبەڕوو چەنی گرد دەگا و جادە و گەڕەکێوە و مەکتەبێوە و یانێوە کوردی. 
* گرد یاگێوەنە کەردەی وۆرکشۆپی پەی هۆشیاری و فێرکەردەی زوانی کوردی  پەی زارۆڵا و ژەنا و گەنجا و گردوو بەشەکاو گلێرگەی. 
* هەرمانکەردەی سەروو میدیای دیجیتاڵیوە دەربارەو زوانی کوردی.  
*وەڵاکەردەیوە کوڵە ڤیدوا دەربارەو زوانی کوردی میدیای دیجیتاڵەنە.
* پەی پەروەردەکەردەی بە زوانی کوردی و ڕسمیکەردەیش خەباتی فرەلایەن و کۆشیای دیموکراتیک بکریۆ.  
* داوا وەنەو پارت و شارەوانییەکا و سەندیکا و پلاتفۆرم و ڕێکوزیا و دەزگا و لایەنە کۆمەڵایەتی و ئابووری و هونەر و کەلتووری و ڕۆشنویری و پیشەییەکا و ژەنا و گەنجا و وەڵاتپارێزنا و شۆڕشگێڵنا و دیموکراتەکا مکریۆ، گرد حەوڵێوە بدانە پەی پارێزنای و وەڵێوستەی زوانی کوردی.
* کۆشیای پەی ورگێرتەی گردوو  فشار و تەوقە و گۆشەگیری و هجووم و قەدەغە و پەراوێزوستەێوە پەی سەروو زوانی کوردی، گێرتەیرەوەروو ڕای دیپلۆماسیێ دلێێ و میاننەتەوەیێ و وەڵاکەردەیوە کۆشیای و خەباتوو زوانی کوردی گردوو کوردسانینە و تورکیانە و ئەورووپانە و جیهانەنە.
ئاخرۆ داوا وەنەو گردلاێوە کریێنە، گرد یاگێوە بکەرا بە فێرگە و مەکتەب و زانکۆی کوردی، تا گرد لاێوە فێرێ زوانی کوردی بانە و گرد کوردیوە بۆنە بە مامۆساو زوانی کوردی. 
ئەرەیاونایەکە بە درووشموو "زوانما بییەیمانە" و "زوان شکۆو ئێمەن" و هورپڕای دماییش ئاما.