نامێ و ڕسموو ٤١٦ ئەندامە چەتاو داعشی وەڵا کریاوە، کە تورکیا بە هامکاریی پەدەکەی ڕوەکاو ئایندەینە  پانیشتوو کوردستانینە منیۆشارە.

هجوومەکاو تورکیای پەی سەروو خاکوو پانیشتوو کوردستانی بەردەوامێنێ. ڕێبازی تازەو تورکیایچ ئاردەی هێزی بەکرێگیریاین پەی پانیشتوو کوردستانی.

پەلیانەو (سپی میدیا)ی نامێ و ڕسموو ئا چەتە داعشاشە وەڵا کەردۆ، کە قەرارا تورکیا بە هامکاریی پەدەکەی پانیشتوو کوردستانینە دژوو گەریلاکاو ئازادیی بدۆشا جەنگ.

بەپاو هەواڵەکەی ئی هێزێ عەفرینەنە ئاریێنێرە و بە قەراروو دەوڵەتوو تورکی و بە جلوبەرگوو سوپاو تورکیوە ماریا پانیشتوو کوردستانی.

پەلیانەکە جە کۆو ٨٠٠ چەتا، نامێ و ڕسموو ٤١٦ چەتاو داعشیش وەڵێ کەردێنیوە، کە قەرار پاسەن دەوڵەتوو تورکی بە هامکاریی پەدەکەی چی ڕوانە پانیشتوو کوردستانینە بنەدارێشا کەرۆ.

بەپاو پەلیانەکەی، فرەو ئی چەتا جەنگوو گێرتەی عەفرین و سەرێکانی و گرێسپی-ینە بەشدارێ بیێنێ و بە پاو هەواڵەکەی هەڵای چندین چەتێ عەفرینەنە ماریارە و ئامادێ مکریا. 

یاگێ باسینە، وەڵتەرێ قسەکەروو یەنەکەی، سەعدی ئەحمەد پیرە ئەرەیاونابێش زیاتەر جە ٣٠٠ تیرۆریستاو داعشی ئاریێنێ هەرێموو بەرواریی باڵای.

متاودێ نامێ و ڕسموو چەتەکاو داعشی کە بە پی دی ئێف وەڵێ کریێنێوە چێنە بویندێ.