ئەر پەلێ کتێبی گازرەداروو ویەرینوو ئەدەبیاتوو ئێرانی دەیمێوە میاڤمێ بە دوێ ناما کە وێشا تەنیای تۆ ئەدەبیاتیوی گرسنا و با بە ئامیانەویروو شۆنۆ وێشا!!.هەڵبەت وەڵینشا دماو بەرویروو یەکەمیش نەتاڤاش بەرێ هازدارێ پێشکەش کەرۆ بەڵام دمایینشا تا دمایین ساتەکاو ژیوایش سەرتەڵ مەنەوە!.ڕەنگا بنەڕەتیتەرین نوونگەو وار لوای وەڵینی و سەرلوای دماینی بیەی ئا ژەنا بیێبا کە پاڵشانە ژیوایشا دابۆشا سەر. نیما یووشیج و ئەحمەد شاملوو دوێ هۆنیارێ ئەنەئاورێ و بنەڕەتبڕێ کە فرەو هۆنیاراو شۆنۊ وێشا چەم بڕانە بەرەکاشا و کەراشا بە چۆڵەچراڤەشا. چێویوی سەلەمیان پەی سەرکەوتەی بنیادٚمیوی کەسێو یام تاقمێو شۆنەماشا هەنە و تووڵەڕاو ترۆقی پەی ئانیشا مەبڕیۆ مەر بە پاڵپشتی ئا کەسە ویربەرزا.
نیما یووشیج هۆنیارێو کە هۆنیێ کلاسیکەش تێکە دا و بی بە ئەرەمەرزنەروو شێعرێ نۆی فارسی. شاملوو، فرووغە ،ئەخەوان سالێس، سۊهراب سێپێهری بیێ بە شۆنکەوتێش. نیما بە ئەفسانە کە مانیفستوو شێعرێ نۆیچ بێ وێش بە ئەدەبیاتوو ئێرانی ئەژناسناش. بەڵام شۆنۆ ئەفسانەی نەتاواش ڕەوتوو وێش درێژە دۆ. ئەگەر بلمێنە ژیوایش بەرگنۆ یەکەم جار عاشقوو کناچێوێ بۆ وەروو جیاوازی مەزهەبی کناچێ شووش پنە نمەکەرۆ، چن ساڵێ شۆنیشەرە ئەڤینوو کناچێوێ دێهاتیێ بە نامێو سەفوورا گێرۆش بەڵام ئیجارەیچە کناچێ چنیش نمەی پەی شاری تا عالیێ جەهانگیرێ مارۆ کە واڵەزاو جەهانگیر سووڕئێسڕافیل یەنە. عالیێ مامۆستاو وانگای بیێنە و نیمایچ مامۆستاو وانگاو سەن لوویی بۆ و مازۆش جیا. دەس مدٚۆ هەرمانە ئەدەبیەکاشەوە ئینە بۆ نوونگەو ولە و بۆڵەو عالیێ کەچی کار مەکەرۆ!. نیما وەروو جەنگەمرینگێو یانەی پا جۆرە کە مشۆ دڵ مەدٚۆ هەرمانەکاشەوە و مەبۆ هۆنیاریوی ترۆق کەردٚە!. ژیوەنی ئەحمەد شاملووی چەپەوانەو ژیوای نیمایا، شاملوو وەڵێنە چنی ئەشرەفوالملووک ئیسلامی و تووسی حایێری ئێزدێواج کەرۆ و سەرکەوتە نیا و ساڵۆ 41ی چنی ڕیتا ئاتانێس سەرکیسیان ئەژناسیا بە ئایدا ئاشنا بۆ و تا دمایین هەناسەکاو ژیوەنیش پێوەرە مژیوا. شاملوو چاوەختەنە چنی ئایدای زەماوندٚە کەرۆ بەرویرێ هۆنەریێش وسناینێش! ئایدا مەینە ژیوەنیش بۆ بە هەساریوی درۆشیا. جە بارەو شۆنەماو ئایدای ملوو ژیوایشەرە چنی وەڵاکریاو فێردۆسی ماچۆ هەرچی منویسوو پەی ئادٚێن و بۆنەتی ئادٚێ،چنی ئایدای ئا ئێنسانە کە هەرگیز ژیوەنیمەنە نەیۆسەبێمەوە یۆستمەوە!. ئەر عالیێ پەی نیمای و ئایدا پەی شاملووی نەبیەیانێ چارەنویسوو هیچکامی پاسە نەبێ کە نویسیا!.

نویسەر: ئۆمید حەبیبی/ نۆدشە

سەرچەمە: پەلیانەو نویسەری جە فەیسبوکەنەهۆرگیریان