هرووژم و ئەرەگیریەکۍ دەوڵەتو ئەرەگیرو تورکی پەی سەرو خاکو پانیشتوو کورڎەسانی بەردەوامێنۍ، لایەنە سیاسیەکۍ پانیستوو کورڎەسانی و حکومەتو عێراقی بێدەنگۍ و بێ هەڵوێسێنۍ ئینەیچ بی بە مەڵامەتوو نیگەرانی و ناڕازیبیەی گەلی. چی بارۆ هامسەرۆکەو تەڤگەری ئازاڎیی هەرێموو گەرمیانی شەیماعەدنانە پەی ئاژانسوو هەواڵوو فوراتی (ANF)ی قسێش کەردۍ.

' مشۆم هرووژم و ئەرەگیریەکۍ تورکیای شەرمەزار بکریا و بێدەنگی بماڕا'

شەیماعەدنان-ە ئاماژەش پانەیە کەرد کە دەوڵەتو تورکی ئەرەگیری جە هەر چوار پارچەو کورڎةسانی کۆمکوژی و قڕکەردەی ژیۋگەی ئەنجام مڎۆ و واتش: "دەوڵەتو تورکیای ڕوانە خەڵکی مەدەنی جە ناوچەکا بادینانی، دەگایەکا پانیشتوو کورڎەسانی بە مەرام مگێرۆ و بۆمبۋارانشا مکەرۆ. بە گرڎ جۆرۍ گەرەکشا گەلوو کوردی دلێنەبەرۆ. بێگومان تەرسەو تورکیای جە فکر و باوەڕی کوردین، ماوەو ٢٥ ساڵان ڕابەرو گەلوو کوردی عەبدوڵا ئۆجالانی جە پیلانگێڵنیێوە مېیاننەتەوەیینە گیریان، تەرسیش جە فکر و تێزەکا ڕابەرو گەلوو کوردی هەن و گەرەکشا جە کەسایەتی ڕابەر ئاپۆینە گەلوو کوردی دلۍنەبەرۆ."

واتیچش: "چی ساڵا دماینە دەوڵەتو تورکیای هرووژمەکێش زیاتەر پەی سەرو پانیشتوو کورڎەسانی چڕ کەردێنۍ. ڕوانە خەڵکی مەدەنی گەشمەرڎۍ با و جە کەشەکا کورڎەسانینە چەکی قەڎەغەکریا بەکار بەرۆ. وە مشۆم ئی هرووژم و ئەرەگیریۍ دەوڵەتو تورکیای شەرمەزار بکریا و بێدەنگی بماڕیۆ.  دەوڵەتو تورکیای ڕوانە عیلاقەکاش زیاتەرۍ مکەرۆ چنی حکومەتو هەرێموو کورڎەسانی جە هەمانکاتەنە چنی دەوڵەتو عێراقی هەوڵو ڕێککەوتەی مڎۆ."

'٣٠ ساڵێن حکومەتو هەرێموو کورڎەسانی خزمەت بە مەرامەکا تورکیای مکەرۆ'

هەرپاسە شەیما ئەرەیاۋناش، بەمەڵامەتو ڕێککەوتەی ٥٠ ساڵەو ئابووری جە مابەینو حکومەتو پانیشتوو کورڎەسانی و تورکیای بیەن بە مەڵامەتۍ کە دەوڵەتو تورکی ئەرەگیری زیاتەر پاوانوازی بکەرۆ و کەرتو کشتوکاڵی کورڎەسانی لاواز بکەرۆ و واتش:"پانیشتوو کورڎەسانی پەڕ بیەن جە کاڵا و شمەکی تورکی، ئا  واردۍ دەوڵەتو تورکیای مکیانۆشا پەی پانیشتوو کورڎەسانی خراپێنۍ و تەندروسۍ نیەنۍ، یۆ چا مەڵامەتا کە ئیساتۍ ڕێژەو نەوەشی جە خەسەخانەکانە ڕوانە ئینا زیاڎبیەینە مەڵامەتەکەش بەکارئاوردەی واردەی تورکییا. پەنەوازا گەل هوشیار بۆ و وارڎە و شمەکی تورکی بەکارنارۆ چونکی تورکیا مەرامش ئانەنە بە هەرشێوازێوە بۆ کورڎی دلێنەبەرۆ."

واتیچش: "جە ماوەو ٣٣ ساڵا دروسبیەیشۆ حکومەتو هەرێمی بە تەمامی کۊتەن خزمەتو دەوڵەتوو تورکی و خزمەتوو مەرامەکا دەوڵەتوو تورکی مکەرۆ. ئیساتێچ جە ڕاو میدیای و فیلمە تورکییەکاوە ئامان دلۍ گلېرگەو کوردی و کاریگەریش سەرو زاوڵا و تاکو کوردی نیانەرە. مەبەس چینەیچ دلێنەبەردەی کلتووری کوردیین، تێکدای پەیوەندییە کۆمەڵاتییەکان و دلێنەبەردەی جوانان."

' ئانەی جە ۋەرا ۋەرو چەتەکا داعشی و دەوڵەتوو تورکینە مردانۆ تەنیا گەریلاکۍ ئازاڎیێنۍ'

ئانەیچش ئەرەیاۋنا کە ڕوانە بە هەزاران تەنکەرۍ نەوتۍ ڕەوانەو تورکیای مکریا ئینەیچ ئانڼە ئیسفادەش پەی تورکیایا، پەی پانیشتوو کورڎەسانی و گەلەکەیش نیا و پی جۆرە بەردەوامە بیە: "سەرەڕاو  بەپیتی خاکو کورڎەسانی بەرهەمو دلێینەیش کەما و ساغ نمەبۆوە ۋەرو ئانەی فرەتەرین بەرهەمو هاوردەی بەرهەمی تورکیا مێنە پانیشتوو کورڎەسانی ئینێچ مەرامۍ دەوڵەتو تورکینۍ پەی دلێنەبەردەی گەلوو کوردی و خاکو پانیشتوو کورڎەسانی. یۆتەر جە مەرامەکا تورکیای زیڼەکەردەیۆ میساقی میللییا، ١٠٠ ساڵێن پەیماننامەو لۆزانی دمایس پنە ئامان، بەڵام پاسە بەرگنۆ کە دمایش پنە نامابۆ و تازەکریابۆوە. چونکی تورکیا کەرکوک، هەولێری بە شارو ۋێش مزانۆ. جە ڕاو زیڼەکەردەیۆ میساقی میللیوە گەرەکشا کورڎەسانی ئەرەگیربکەرۆ."

جە دمادماینە ئاماژەش پانەیە کەرد کە دەوڵەتو تورکی ۋێش داعشش وەشکەرد و جە هەر شۊنێنە گەرەکش بۆ ئەرەگیرش بکەرۆ سەرەتا داعشی بەکارمارۆ و واتش: "جە ساڵەو ٢٠١٣ پەی ٢٠١٥ داعش هرووژمش کەرد سەرو پانیشتوو کورڎةسانی جە گوڵاڵە (جەلاولا) و کەرکوک و خورماتوو، ئا ناوچۍ کە کۊتۍ چێرو دەسەڵاتو داعشی و ئانەی ۋەرگیریش کەرد و خێزانەکێش پارێزنۍ گەریلاکۍ ئازاڎیی بێنۍ. جە ئیساتێچەنە ئانەی جە ۋەرا ۋەرو هرووژم و ئەرەگیریەکانە مردانۆ هەر گەریلان."