سوپای ئەرەگیرکەرەو تورکی دووێ خاڵێ وشکنایی سەروازیێش بەینوو دەگایەکاو بازێ و بێریزانێ و بەینوو بێریزانێ و کانی بەلاڤێنە هەرێموو بەرواریی باڵاینە مەنتێقەو ئامێدیینە نیێنێرە و شناسنامەو هاموەڵاتا کۆنترۆڵ مکەرۆ.
سوپای ئەرەگیرکەرەو تورکی دووێ خاڵێ وشکنایش نیێرە
سوپای ئەرەگیرکەرەو تورکی دووێ بازگێ سەروازیێش بەینوو ەگایەکاو بازێ و بێریزانێ و بێریزانێ و کانی بەلاڤینە هەرێموو بەرواری باڵاینە ئامێدینە، کە سنووروو بەینوو حکومەتی ناوەندیی عێراقی و هەرێموو چێروو کۆنترۆڵوو پەدەکەیەنێ نیێنێرە و شناسنامەو هاموەڵاتا بازگەکانە کۆنترۆڵ مکەرا. نزیکەو ٢٠٠ مەترا وەڵی و دمای یاوای بە خاڵەکاو وشکنای، وەربەسی ئاسنین لاو ڕاس و چەپیوە نریێنێرە. هەرپاسە خاڵاو وشکنایەکانە بلۆکیێ چیمەنتۆییێنێ گەورێ لاو ڕاس و چەپوو ڕێکێوە نریێنێرە. دەوڵەتی ئەرەگیرکەروو تورکی سەروازاو خاڵەکاو وشکنای بنکەکاو ئا مەنتێقەیوە مارا.
پەی یوەم جاری خاڵێ وشکنای منریارە
سوپای ئەرەگیرکەرەو تورکی ٢٥و ئایارو ١٩٨٣ بە هێزێوی نزیکەو ١٠ هەزار کەسا و بە بەزنای ٥ کیلۆمەتراو بەینوو زاخۆی و ئامێدییوە، یوەم لەشکرکێشییش پەی سەروو پانیشتوو کوردستانی دەس پەنە کەرد. ماو ئی هجوومەیوە تا ئارۆ هجووموو ئەرەگیرکەرا بەردەوامییش هەن. بەڵام ئینە ئەوەڵ جارەن کە سوپای ئەرەگیرکەرەو تورکی یاگە سنوورییەکاو عێراقینە، کە ئینێ چێروو کۆنترۆڵوو پەدەکەینە و نزیکەو ٣٥ کیلۆمەترا بەینوو سنوورەکاو کۆمارو تورکیایوە دوورا، بنکێ سەروازیێ منیۆرە و بۆ ئەوەڵ جارەن بە سەروازێ و کەرەسێ سەروازییێوە خاڵیوی وشکنایی سەروازییە دلێو سنوورەکاو عێراقینە وەش مکەرۆ و شناسنامەو هاموەڵاتاو عێراقی و هەرێموو کوردستانی کۆنترۆڵ مکەرۆ.
چا وەختۆ ئی دۆخە ئاشکرا بییەن، تا ئیساتێ هیچ قسێوی حکومەتوو عێراقی و پەدەکەی نییەنە چی بوارۆ، ئی هەرمانێ چە جە ڕای گردینەو عێراقینە و چە جە ڕای گردینەو پانیشتوو کوردستانیوە ناڕەزایەتیی جیددیش وەنە کەوتەنۆ.
سوپای ئەرەگیرکەرەو تورکی داواو هامکاری جە هاموەڵاتا مکەرۆ
سەروازە ئەرەگیرکەرەکانی تورکی شناسنامەو هاموەڵاتا موشکنانێ و داواو هامکارییشا وەنە مکەرا، نویسیا مدا پا هاموەڵاتا، کە بازگەکارە مویەرانە و پی هەرمانێشا بەئاشکرا سیخوڕیی سەروو خەڵکوو مەنتێقەکەیوە مکەرا و گەرەکشانە خەڵک یاگەکاشا چۆڵ بکەرا. ئیساتێنە ٦٠٪وو خەڵکوو مەنتێقەکەی ڕووەشا کەردێنە دهۆک و جە نیایرەی خاڵە وشکنایەکا ڕازیێ نییەنێ.
پەدەکە هەڕەشێ وەنەو هاموەڵاتا مکەرۆ
بە پاو سەرچەمە هەرێمییەکا، یەکەکاو سەر بە پەدەکەی هەڕەشێ وەنەو خەڵکی مکەرا، کە باسوو جموجووڵەکاو سوپاو تورک نەکەرانە مەنتێقەکەنە.
هەرپاسە مەنتێقەو دارستانوو دەوروبەروو دەگاو دەرگەلینە هەمان مەنتێقە سوپای ئەرەگیرکەرەو تورکی سۆچنان، هیزیوەن ئایرەکە بەردەواما.
