سوپاو تورکی ئەرەگیری ٩ بارەگێ سەروازیێ تازێش وەشێ کەردێ
بۆنەو هجوومەکاو دەوڵەتی ئەرەگیروو تورکیوە، پەی سەرووو دهۆکی ١٨٤ بنەیانێ ئاوارێ بیێنێ، سوپای ئەرەگیرەو تورکی ٩ بارەگێ سەروازیێ تازێش هەرێمەکەنە وەشێ کەردێنێ.
بۆنەو لەشکرکێشیی دەوڵەتوو تورکیوە سەروو سنووروو پارێزگاو دهۆکیوە، ١٨٤ بنەیانێ یانە و ماواو وێسانە دەربەدەرێ بیێنێ و باخ و باخاتشا جیا ئاستەن، هاموەخت ٩ بارەگێ سەروازیێ مەنتێقەکەنە دەولەتوو تورکی وەشێ کەردێنێ و هێچ لایەنێوی ڕسمییچ وەراوەروو ئا کردەوا هەڵوێستش نەبییەن.
هجوومەکاو دەوڵەرت ئەرەگیروو تورکی عاسمان و زەمینۆ، پەی ئەرەگیری بو لکنای خاکوو پانیشتوو کوردسانی بە تورکیایوە بەردەواما، خەڵکی هەقەتینوو یاگەکێچ ناچارێ مکریا یاگێ وێشا جیا بازا و ئاوارێ شارەکا با.
١٥ـو حوزەیرانوو ئێساڵیوە، دەوڵەتیئەرەگیروو تورکی بە هەزارا سەروازێ و تانکێ و زرەپۆشێوە هجوومە ئەرەگیرکارییەکێش پەی سەروو پانیشتوو کوردسانی بەتایبەت، سنوورو دهۆکی دەس پەنە کەردێنێ، ئینەیچ بییەن بە مایێ زەرەری بە ئەرەنیشتاو مەنتێقەکەی و چۆڵبییەی دەگایەکا و فرسەتوو وەشکەردەی بارەگای سەروازی چا یاگانە.
تەنیا جە هجووم و ئەرەگیرییەکاو ئی دماییوە، ١٨٤ بنەیانێ سنووروو دهۆکینە ئاوارێ کریێنێ و باخ و یانەشا جیا ئاستەن و بە پاو زانیارییەکاو ڕۆژنیوزی ٨٣٠ دۆنمێ زەمین و باخ جیا ئازیان.
دەوڵەتوو تورکی ئەرەگیری بە ئەنقەس و زانایی بوردومانو یاگێ ئەرەنیشتەی خەڵکی مکەرۆ و چی هجوومانە، دەوڵەتوو تورکی حەر یۆ جە دەگایەکاو "دەرگەلێ، موسابەگی، شێلازە، بشیلێ، میسکا" جە کانی ماسێ دورووبەروو بەرواریی باڵاینە سنوورو پارێزگاو دهۆکیش بە هێزی سەروازیی چۆڵ کەردەن گریوە بە هجوومەکاو دەوڵەتوو تورکی ئەرەگیریوە ١٧٠ دەگێ چٶڵێ کریێنێ و ٦٠٢ دەگێ تەرێچ تەرسەو چۆڵکەردەیشا ئینا سەر.
هەرپاسە ٩ بارەگێ سەروازیێ تازێش چا یاگە چۆڵکریایانە وەشێ کەردێنێ، بە گردیوە دماو ٢٠١٥ـیوە تا ئیساتێ، دەوڵەتوو تورکی ٧٤ بارەگێ سەروازیێش بە هامکاریی پەدەکەی پانیشتوو کوردسانینە کەردێنێوە.
سەبارەت بە ڕێژەو سۆچنای پووشی ودارسانەکا، بە پاو تەسەورەکاو ڕێکوزیاو سی پی تی ئەمریکی، ڕاو شۆنیرەلوای ئەرەنیشتاو ئا مەنتێقاوە ورشگێرتەن، تەنیا چی لەشکرکێشیینە نزیکەو ٦٨ هەزار دۆنما زەمینی بۆنەو بوردومانە بەردەوامەکاو دەوڵەتی ئەرەگیروو تورکیوە سۆتێنێ.
یاگێ واتەینە بۆنەو هجوومەکاو دەوڵەتی ئەرەگیرکەروو تورکیوە، سەرەتاو ئێساڵیوە تا ئیساتێ ١٣ هاموەڵاتێ مەدەنیێ گەشمەردێ و ١١ بریندارێ بیێنێ، سالەی وەڵینەیچ، ٣٣ هاموەڵاتێ مەدەنیێ گەشمەردێ و ٢٢ بریندارێ بیێنێ.
جگە ئا هجووم و بوردوماناو دەوڵەتوو تورکی بێ پارێزکەردەی پەی سەروو پانیشتوو کوردسانی دەسش پەنە کەردەن، هەڵای حکومەتوو عێراق و حکومەتی سەرشیەو هەرێم کاردایوەشا نیشانە نەدان و ئیندانەشا نەکەردەن و بێدەنگێنێ.
