جەنگەوانا ئازاڎیی کورڎەسانی جە مانگەو تەمموزینە فرێوە جە مەنتیقەکانە جە گابار، زاپ، حەفتانین هەتا خواکورک گورزەی قورسەشا ۋنەو دەوڵەتو ئەرەگیرکەرو تورکی شانێنە. گەریلا کە جە مانگەو تەمموزینە سەرکۊتەی گۆرەشا بەدەسئاوردەن، هێز و مۆڕاڵوو ۋێشا جە کۊششکارا مڎرامانوو ١٤و تەمووزی ڕۆچۍ مەردەی هۆرمگێرا. گەشمەرڎۍ هەرەکۆڵ و ئەکین جە گابارەنە، بەندا، دەستینا و باران جە کاتۆنە بە نیشاندای غیرەتوو ئازایۍ گۊرەی سەرکۊتەیشا بەدەسئاورد. گەشمەرڎۍ نەواڵ، دژوار و ژیانە جە مەتینانە جە ۋەرا ۋەرو گرڎوو هرووژمەکا سوپاو ئەرەگیرەو تورکینە پاشەکشەشا جە هەڵوێسوو ۋێشا نەکەرد و خاکی پیرۆزو ۋێشا پارێزنا. جگە چانەیچ قارەمانیەتی و فیداکاری جە زاپەنە بە سەرمەشقایەتی گەشمەرڎە سیداری ڕەنجێوە فرە دریا. چا ڕووەی کە لوۍ پەی سەرو کەشەکا کورڎەسانی تا دما هەناسەشا، قەولەکەشا نماڕا و بیۍ بە ئامیانوو سەرکۊتەی و حەق کەردەیۆ.

دەوڵەتو تورکی بەردەوام دژوو گەریلای و گەلا مەنتیقەکەی تاوانەو جەنگی ئەنجام مڎۆ. تاوانەو جەنگی پاشێلکەردەی یاساکا جەنگین کە جەلە پەیماننامە مېیاننەتەوەییەکا پېسە پەیماننامەکا ژنێفینە دیاری کریان. متاومۍ نمونێوە چا تاوانە جەنگییە بارمێوە پېسە؛ هرووژمی ئەنقەس دژوو هاموڵاتیا مەدەنی، بەکارئاوردەی چەکی قەڎەغەکریای، ئەشکەنجەدای و هرووژمۍ تەرۍ فرۍ هامشێوۍ. سوپاو تورکی فرەو ئا تاواناسە کەردێنۍ. ئەگەر تەنیا یۆ چا هرووژما جە وڵاتێوە تەرەنە ڕووەشا دابیۍ، بێگومان سزای دارایی و دیپلۆماسی سەرشەرە سەپیۍ. بەڵام جە کورڎةسانەنە ئا یاسۍ ڕەوایشا نییا. تاکە یاسا جە کورڎەسانەنە ئەرەکۆشای و ڕووبەڕوو بیەیۆ ئەرەگیران.

سوپاو تورکی ئەرەگیرکەری دژوو هەرێمەکاو پارێزنای مەدیای بە کەڵک هۊرگێرتەی جە چەکی کیمیایی و بۆمبی ئەتۆمی تاکتیکی و تەقەمەنی قەڎەغەکریای زیاتەر جە ٥٢٠ هرووژما زەمینی و ئاسمانیێش کەردێنۍ. هەرپاسە بەرکۆتەن کە کاریگەری ئا چەکا بەشێوێوە هەمیشەیی و بەردەوام مەنۆوە. نەوەشی و کارەساتی سروشتی تیکێوەنۍ چا کاریگەریا. ئیساتۍ جەنگ جە هەرێمەکەنە بەردەواما و سوپاو تورکی بانگەشەو ئانەی مکەرۆ کە ئاڎ جەنگەکەی بەرۆ ڕاوە، بەڵام جگە چا تاوانا هیچ بەڵگێوەتەر نییا کە دیار بۆ سوپاکێش جەنگ بکەرۆ. سوپاو تورکی جە کورڎەسانەنە پەنا پەی شێوازی ناڕەوای و نامرۆڤانەی پېسە کوشتەی، قڕکەردەی و تاڵانکەردەی و دلێنەبەردەی مبەرۆ. خاسا چنی ئی سوپۍ ڕاسەوخۆ جەنگوو گەریلای نمەکەرۆ و پەیچێشی پەنا پەی ئی جۆرە هرووژما مبەرۆ؟ ئینەیچ پا مەعنێنە کە سوپاو تورکی ئەرەگیرکەری جە بەرەکا جەنگینە تەسلیمو چالاکییەکا گەریلای بیەن.

چالاکیۍ ستراتیجیۍ ملاڕاوە

هێزەکا گەریلای هرووژمەکێشا جە دژوو ئەرەگیرا چڕتەر کەردەنۆ. جە ماوەو مانگێنە ٢٠٥ ئۆپەراسیۆنۍ زەمینی و ئاسمانیێش کەردێنۍ. بە تایبەتی چالاکییەکۍ پېسە وستەیرەو درۆنە جەنگکەرەکا و ٢ هەلیکۆپتەرا لواڕاوە. بە مەعنێوەتەر جە مانگەو مڎرامانینە چالاکیی قەوەت و کاریگەر لواڕاوە. ئی چالاکیۍ هیوێوە گۊرەشا لاو گەلیۆ وەشکەرد، ئیراڎەو مڎرامانیش قەوەتتەر کەرد. هرووژمە ئاسمانییەکۍ گەریلاکا دژوو سوپاو فاشیستی کاریگەریێوە دەروونیش سەرو سوپۍ و لایەنگرەکاش چنەکۆتەنۆ. چونکی گەریلا جە هرووژمە ئاسمانییەکانە قەراردەریشا پارێزنان و گرڎوو ڕاو جا ئەمنیەکێ ئەرەگیراشا هۊرشێونێنۍ. لایەنێوە تەرو ئی چالاکییا، سروشتوو ستراتیجیی چالاکیەکان. گەریلاکۍ بە تاکتیکە قەوەتەکاشا فرەو وەختی سەرکۊتەی ستراتیجی ۋێشا و حەرپاسە تەسەورەکۍ جمیەرو ئازاڎییشا سەلەمنان.

گەریلا تیڤی بە ڕۊشنی گرڎ چێوێش بەبەڵگۆ تۆمار کەردەن پەی ڕای گرڎیی گەلی وەڵاس کەردەنۆ. ئی دیمەنۍ جە میدیا دلێینەی و جیهانییەکانە وەڵۍ کریێنۍ. بەڵام سەرەڕاو ئینیشایچ دەوڵەتو تورکی ئینا هەوڵوو ئانەینە حەقەتینەکا بشارۆوە. مزانمۍ گرڎوو سەروازەکا تورکی جە گولانە تا فەرماندەکێشا تەماشەو ئی دیمەنا مکەرا. بە پەنهانی یان ئاشکرا شۊنیرە لوای پەی وردەکارییەکا ئا چالاکییا مکەراهەرپاسە فرە عال مزانمۍ کە چڼە حەسرەتوو ئانەیشا هەن کە سوپێوە فەداکارە و بەتواناشا بۆ کە بە هیچ جۆرۍ دەسشا نمەگنۆ.

جە مانگەو تەمموزینە چالاکیۍ سابۆتاژۍ فرۍ و کاریگەرۍ جە هەرێموو مەتیناینە کریۍ. چی چالاکیانە فرەو کەسا سزادریۍ. دلێشانە عەبدوڵا جەم دەمیرکان کە جە ناوەندو فەرماندەیی جمیەرو ئەرەگیرینە جە زاپ و مەتینانە ئەرکدار بۍ سزا دریا. بە مەعنێوەتەر ئی ناوەنڎە کریا مەراموو چالاکییە سابۆتاژەکا. جە ئاکامەنە تووشوو شکسێوە گۆرەی ئامێنۍ.