دەسەو ڕووبەڕووبییەیوەی چەرمەکەردەیوەی زەڕی و هامکاریی تیرۆروو سەر بە ڕژێموو سوریای، لیستی تازەو نامێ کەس و لایەنە تۆمەتبارەکا بە هامکاریکەردەی تیرۆری و چەرمەکەرەیوەی زەڕیش وەڵا کەردەنۆ و ئەردۆگانی سەرۆککۆماروو تورکیایچ ئینا ڕیزبەندى یوەمینوو لیستوو هامکاریی تیرۆرییەنە.

بەپاو لیستە تازەکەو ڕژێموو سوریای، هەرکەس و لایەنێوە هامکاریی چەکدارىی دژ بە ڕژێموو ئەسەدی و حکومەتەکەیش بکەرۆ پیسەو تیرۆرستی ئشناسیان و نامێ چندین کەسایەتی و سەرۆکوو وەڵاتاش چەنەن. جە ڕیزبەندى یوەمو ئی لیستەینە رژێموو سوریای، نامێ ڕەجەب تەیب ئەردۆگانی، سەرۆککۆماروو تورکیای و ئەحمەد داودئۆغڵۆ سەرۆکوەزیرانى وەڵینوو و سەرۆکوو ئیسەو پارتوو ئایندەو تورکیای ئامێنێ. 

وەڵاکەردەیوە لیستوو ئی ناما لاو ڕژێموو ئەسەدی و حکومەتەکەیشۆ ئینا وەختێوەنە، کە پەرسەو هەردووە وەڵاتا بارەو ئاساییکەردەیوەی پەیوەندییەکاشا و کۆبییەیوەی ئەسەدی و ئەردۆگانییا، وەڵێچەنە ئەردۆگان خوڵکەو بەشار ئەسەدوو سەرۆکوو سوریایش پەی وەڵاتەکەىش ئاشکرا کەردە، بەڵام ئەسەد پاشگێرتەرە سەروو ئانەیە کە وەڵێ حەر هەر کۆبییەیۆێوەنە  چەنی سەراو تورکیای، پەنەوازا سوپای ئەرەگیرکەرەو تورکی خاکوو سوریایەنە بکێشیۆوە.