بەشێوە فرەو هاموڵاتیا و ڕۊشنۋیرا سیناریۆ تازەکەو پەدەکەی جە بارەو سۊچنای بازاڕەکا هەولێری و دهۊکی بە خیانەتێوە تازەو ئا حزبەیە و هەوڵێوە پەی ڕەوایەتیدای بە ئەرەگیریەکا دۆڵەتو تورکی نامېش بەرا.
دماو ئانەی پەدەکە هەوڵشدا جە ڕاو سیناریۆیەکەیۆ لایەنە کورڎەستنیەکا بە سۊچنای بازاڕەکاو هەولێری، دهۆکی و کەرکوکی تۆمەتبار بکەرۆ، هەر زوو هاموڵاتیا و رۆشنۋیرا ئا سیناریۆشا بە سویا و بەهانێوە پەی هرووژمە ئەرەگیریەکاو دەوڵەتو تورکی ئەرەگیری بە نامۍ کەرد.
چا بارۆ عەزیز رەئوف نویسەر و مامۆساو زانشتگەی جە پەلیانەو ۋێشەنە جە فەیسبوکەن رووە جە پەدەکەی نویستەنش: "سیناریۆكەتا فرە ناڕاس و ناشرین بۍ، چی چركەساتەنە كە توركەكۍ تا قوڵایی خاكوو هەرێموو کورڎەسانی ئامێنۍ، شمەیچ هاموەخت چنی هەنگامەی ناشرینەو ئەرەگیرانە، سیناریۆی ناڕاس وەش مکەردۍ كە دڵنیانا کە ۋێچتا باوەڕتا پنەش نیا."
ئاماژەش پانەیچ کەردەن، جە هەنگامېوەنە فرە سەرسامەنا بە پەدەکەی ئاڎیچ ئانەن "ئا جەرائەتە چێشا جە شمەنە هەن پاسە بە ئاشكرا خەڵك و ئەنداما ۋێتا بە گێل و گەمژە بزاندۍ و پاسە ۋیربکەردێوە كە خەڵك و لایەنگراتا باوەڕتا پنە مکەرا، ئی ڕووقایمیە چێشا جە گرڎوو دنیێنە هێز و گروپۍ بێنۍ بانۍ بە كەواسوورو ۋەر لەشكری و لاو كەمیۆ هێز و گروپۍ بېنۍ كە دژ بە برایاو ۋێشا با، بەڵام باوەڕم نیا جە تاریخەنە هێز بیەبۆ پېسە شمە چنی ئی گرڎ زام و قەیران و نەهامەتیا سەرو گەلەكەیتارە ئارڎەن، جورئەت بكەردۍ شۊن پاو توركارە بلدۍ و یاگە پۆساڵەكاشا بسەردێوە، پانەیچ نەمردۍ برا كوردەكاما جە سەرنیشتوو کورڎەسانی بە سیناریۆی ناڕاس و باوەڕپنەنەکریا تاوانبارۍ بكەردۍ".
ئا نویسەرە تۆمەتبارکەردەی شۆڕشگێڵنا گەلوو کوردی بە ئەنجامدای سۊچنای بازاڕەکا جە ڕاو سیناریۆی ناڕاسی، بە کردەوێوە ئانڎە قیزەون نامۍ بەردەن کە جە دنیانە هامشێوەش نییا و جە دمادمایی نویستەکەیشەنە ئەرەیاۋنانش: پەدەکە جە خیانەتکەردەینە بێتامش کەردەن".
لاو ۋێشۆ عەلی کەریمی نویسەر و سیاسەتمەدارو کوردی بە تنی رەخنەش جە سیناریۆکەو پەدەکەی گێرتەن و نویستەنش: " بەیدۍ و شەرم مەکەردۍ بەئاشکرا و بێشەرمانە واچدۍ؛ بیمۍ بە کۆیلۍ دلۍ کۆمارو کوردکوژو تورکیاینە، سناریۆ و گێلکەردەی وەسێن".
هاموەخت ئومێد بەرۆشکی رۆنامەنوویس و یۆ جە زیڼانیە سیاسیەکا وەڵتەرو بادینانی نویستەنش: "وەشکەردەی سیناریۆی ورەتەی خاکی جە ۋیرو خەڵکی نمەبەرۊوە".
هاموەخت جە تۆڕە کۆمەڵایەتیەکایچەنە سیناریۆ تازەکەو پەدەکەی رووبەڕوو رەخنەی و گاڵتە پنەکەردەی بیەنۆ و هاموڵاتیا سەرو ئانەی کۆکېنۍ کە ئا سیناریۆ بە پلەی یوەم پەی شارایۆ و رەوایەتیداین بە لەشکرکێشی و ئەرەگیریەکا دەوڵەتو تورکی، جە لێوەتەریچۆ هەوڵێوە پەدەکەین پەی دما وستەی هۊرچنیەی، بەمەڵامەتوو تەرسەو ئا حزبەینە جە جەدەسدای بەشێوە فرە جە دەنگەکاش.
