تەژەکە-ئە بەیاننامێوی نویسیاش وەڵا کەردۆ واتش: "چوارچوەو هەڵمەتەو 'ئازادیی پەی ڕابەر ئاپۆی، چارەسەری پەی کێشەو کوردی'، هەڵمەتەو کیانای ناما پەی سی پی تی، کە ١٩و نیسانیوە دەسش پەنە کەردەبێ، ماوەو کەمتەر جە یەرێ مانگانە، بە بەشداریی فرەو ژەنا وەڵاتە جیاوازاوە، هەڵمەتەکێ کریا و تەمامیا."

بەیاننامەکەو تەژەکە-ئەی ئینەنە: 

"دەوڵەتی فاشیستی تورکی ٤١ مانگێن ڕاش بە بنەیانە و پارێزنەراو ڕابەر ئاپۆی نەدێنە  چەمپەنەکەوتەیش چەنی بکەرا و پێسە  نادادپەروەریێوە مکەرۆ، کە هەرگیز جیهانەنە وێنەش نییەن. سیاسەتوو گۆشەگیری دژی ڕابەر ئاپۆی پیسەو درێژەپنەدەروو سیاسەتوو کۆکوشی مکریۆ. ئەردۆغانی دیکتاتۆر ئامانجش ئانەنە بە هجووومی ئەرەگیرکاری و کۆکوشی دمایی بە تەڤگەروو ئازادیی کوردی بارۆ، بەڵام ئینە مبۆ بایسوو  دماییئامای وێش. مدرامانوو گەریلای و کۆشیای دیموکراتیکوو گەلوو کوردی ئی پلانێشە پووچەڵە کەردێنۆ. پارادایموو ڕابەر ئاپۆی کە سەروو بنەمای دیمۆکراتیکی، ئازادیی ژەنێ و ئیکۆلۆژیی ئەرەمەرزیان، بییەن بە یاگەدارێوە بە سیستموو سەرمایەداری کە ڕووبەڕوو قەیرانێوی گەورەی بییەنۆ. 

ئەرەمەرزیا میاننەتەوەییەکێ دروێ مکەرا

دیکتاتۆر ئەردۆغان ئامانجش ئانەن زیاتەر دەسەڵاتو و وێش وەرکەوتوو دلێڕاسەینە بنێ پەنە بوزۆ و حکومەتەکەیش پەی هەمیشەیی سەروو پایاوە بازۆ، هەرپاسە پێسەو سەرکردێوە ئینا هەوڵێ بەدیئاردەی وەرمەکاو عوسمانیی تازەی و گەرەکشا نامێش تارێخەنە بمەنۆوە. پەی ئا وەرمەیە جەنگ، کۆکوشی، کۆچبەری، گێرتەی و تندوتیژیی دژوو ژەنا و دەسدرێژی مەنتێقەکەنە مکەرۆ و ئەرەگیرکاری و ئاژاوەگێڵنی مفاڕۆوە پەی یاگێ ئەرەنیشتەی خەڵکی. وەڵاتێ و ئەرەمەرزیا دێموکراتیکەکێ، کە یانێ سەروو بنەماو دیموکراسیی بنیات نریێنە، وەراوەروو ئی سیاسەتە کۆکوشیانە بێدەنگیی کەرا، ئینەیچ نیشاندەروو ئانەینە کە پەشتیوانیی ئی سیاسەتە کۆکوشییاو دیکتاتۆر ئەردۆغانی مکەرا.

هێزە میاننەتەوەییەکێ وەرپەرسێنێ جە سیاسەتوو کۆکوشیی دژوو گەلوو کوردی وگۆشەگیریی ڕەهای سەپیا سەروو ڕابەرایەتیمارە. سی پی تی بەجۆرێوە چەنی ئی سیاسەتە کۆکوشیا کۆکا و بەروو بازنەو هەرمانەکاشۆ مدران، پێویسا سی پی تی  پەی دماییئاردەی بە گۆشەگیری ڕەهای ئیمرالی هەنگامەی پێویسە بنیۆ و ڕاپۆرتێ پەیوەندیدارێ بە ئیمرالییوە بوزۆ وەروو دەساو گەلاو جیهانی. ئی ئەرەمەرزیا کە ئینا چێروو وەرپەرسیی ئەنجومەنوو ئەوروپاینە، مشۆم هەرمانە و وەرپەرسییەکاش پێسەو وێش بیاونۆ یاگێ و ڕا نەدۆ سیاسەتە گڵیاوەکاو دەوڵەتوو تورکی پێسە بەردەوام بۆ.

زیاتەر جە ٢٠ هەزار ژەنا نامێشا پەی سی پی تی ڕوانە کەردێنێ

پێسەو جمیەروو ژەناو کوردوو ئەوروپای، ١٩و نیسانینە، چوارچوەو هەڵمەتەو "ئازادیی پەی ڕابەر ئاپۆی، چارەسەر پەی پرسەو کوردی"، هەڵمەتەو "نامەکیانای پەی سی پی تی"یما دەس پەنە کەرد. ئێمە بە بەشداریی هەزارا ژەنا فرەو وەڵاتاوە هەڵمەتەکێما کەردە و تەمامناما. ئێمە پەی ماوەو ٣ مانگا بەردەوامێ بێنمێ جە هەڵمەتەو کیانای نامانە، چی ماوەنە زیاتەر جە ٢٠ هەزار ژەنا نامەشا پەی سی پی تی کیانا، ژەنی هەرمانەکاو سی پی تی-یشا یادێ وستێ و داواشا کەردە، هەرمانەکاشا پێسەو وێش بکەرا. هەرپاسە داوا کریان پێویسا دەمودەس دمایی بە گۆشەگیریی سەروو ڕابەر ئاپۆی بێ و ڕاپۆرتێوە سەروو بارودۆخ و تەندروسیی بەڕێزیشا پەی ڕای گردینی ئاشکرا بکریۆ. جارێوی تەر داوا جە سی پی تی مکەرمێ، هەرمانکاو وێشا بکەرا، ئندا مشۆم وێشا جوابوو تارێخی بدانێوە.

پێسە جمیەروو ژەناو کوردوو ئەوروپای، چوارچوەو هەڵمەتەو "ئازادیی پەی سەرۆک ئاپۆی، چارەسەر پەی پەرسەو کوردی" بە هەڵمەت و چالاکیی تازە بەردەوامێ بیمێ. ئێمەی ژەنا ئازادیی ڕابەر ئاپۆی بە ئازادیی وێما مزانمێ و تا ئازادیی بەڕێزیشا بەردەوامێ بیمێ جە کۆشیای.

ژەناو کوردی سەرەوردای مکەرا

هەمان وەختەنە جەنگ و هجوومە ئەرەگیرکارییەکێ، کە حکومەتی فاشیستوو تورکی بە هامکاری و خیانەتەکاو پەدەکەی خاکوو پانیشتوو کوردستانینە مکەرۆش بەتندی شەرمەزار مکەرمێ. حکومەتی فاشیستی تورکی لایێوە هجوومی ئەرەگیرکاری مکەرۆ و لایێوە تەرۆ  سروشتوو کوردستانی مسوچنۆ؛ گردوو ئینیشا بە ئاراستەو کۆکوشیی ئیکۆلۆژی مکریا. گەلوو کوردی و بەتایبەت ژەناو کوردی پێسەو هەمیشەی دژوو ئا هجووما مدراوە.

سەروو ئی بنەمێ چوارچوەو هەڵمەتەو "ئازادیی پەی سەرۆک ئاپۆی، چارەسەر پەی پەرسەو کوردی"، داوا جە گردوو گەلەکەیما، بەتایبەتی ژەنا مکەرمێ پەرە بە کۆشیای وێشا بدانە و دژوو هجوومە ئەرەگیرکەرییەکا مدرامانشا وەرفراوانتەر بکەرا."