وەرپەرسێوی یەنەکەی پەی پەدەکەی: پێسەو کەرکوکی هەولێریچ هورمگێرمێوە
وەرپەرسیوی یەنەکەی ئەرەیاوناش، نەک پێسەو پەدەکەی بە سواری تانکوو بەعسی، بەڵکوم بە یاسا و بە پشتیوانیی خەڵکی پێسەو کەرکوکی، هەولێریچ هورمگێراوە، واتیچش پەدەکە چا شارەنە کەمینەن.
ڕۆو جومعەی پشتیوان سادەق وەرپەرسوو مەکتەبوو ڕێکوستەی پەدەکەیب هەولێرەنە، ئاگەنگوو ساڵیادوو حزبەکەینە پەیامێوەش وەڵا کەردۆ و واتش:" ئانێ واچێنێ هەولێری هورمگێرمێوە ، بە حەیاتشا چەمشا نمەگنۆ پەنەش و با بلانە مەریخەنە هورش بگێراوە ئندا چی خاکە جوانەنە نمەویناش".
وەراوەروو ئا په‌یامه‌ینە، لوقمان وەردی وەرپەرسوو مەڵبەندوو ٢٤و ڕێکوستەی ڕاپەڕینوو یۆبییەی نیشتمانی کوردسان (یەنەکە)ی ڕانیەنە پێسە جوابوو پشتیوان سادەقی وەرپەرسو مەکتەبوو ڕێکوستەی پەدەکەیش هەوڵێرەنە داوە" ئێمە مەریخۆ نمەیمێ پێسەو شمە کە مەریخوو سەروو دەبابەکاو بەعسیوە ئامایدێ پەی هەولێری".
ماچۆیچ:"ئێمە پێسەو کەرکوکوو قودسوو کوردستانی بە پشتیوانیی خوای، کۆمەڵاو خەڵکوو کوردستانی بە هێزوو یاسێ مەیمێوە و باوشی مکەرمێوە بە قەڵاو منارەیرە ، نەک پێسەو شمە کە بە هێزوو دەبابەکاو سەدامی هەولێرتا گێرت، ئیساتێچ دماو ساڵاێوە فرەی چا ئەرەگیرییە، دلێ سەنتەروو شاروو هەولێرینە، وەراوەروو یەکێتی و هێزەکای تەریوە هەڵای کەمینەندێ."
وه‌ردى ئاخرۆ واتەنیچش:" وەنەتا نمەگێرمێ، چونکوم مزانمێ شۆکەو سەرکەوتەی شاهانەو یەکێتی کەرکووکەنە وەرمش زڕنێندێ و مشۆم پا خیاڵاتەوە بخڵافییەیدێ، هۆشتا نەشۆ ڕۆ ڕۆش ئینا شۆنیوە، ئارۆ منازدێ وێتارە سەبای بە وەرمیچ نمێ وەرمتا".
