١٥و تەباخی، بە سەرمەشقایەتی فەرماندە عەگید (مەعسوم کۆرکماز)ی ڕۆو ١٥و تەباخ (ئاب)و ١٩٨٤ جە ناوچەو شەمزینانی، یووەم گوللۍ پەکەکەی ڕوەو دووژمنا و ئەرەگیرکەرا کورڎەسانیرە تەقا. چا بارۆ چالاکی سیاسی ئاری عزەدین پەی ئاژانسوو هەواڵوو فورات (ANF)ی قسێش کەردۍ.

'١٥و تەباخی هەنگامێوە گۆرێنە جە تاریخوو گەلەکەیمانە'

ئاری عزەدین ئاماژەش پانەیە کەرد ئا پارت و ڕێکوزیا کوردیۍ کە جە تاریخوو گەلەکەیمانە بێنۍ مەدەنیۍ و ئاشتیوازۍ بیێنۍ. گەرەکشا بۍ جە ڕاو دیموکراسییوە گرفتەکا کورڎی و کورڎةسانی چارەسەر بکەرا بەڵام وڵاتا ئەرەگیرکەری بە قڕکەردەی، ئەنفال کەردەی و زیڼانی کەردەی جوابشا دێنێوە پی جۆرە دوا: "دماو ٥٠ ساڵا جە کپکەردەی و تاونایۆ کورڎی جە سەرنیشتوو کورڎەسانی، جە ساڵەکا ٧٠ کا پی لاوە جەمۍ جوانۍ ژڵېوەو پەکەکەی جە سەرنیشتوو کورڎسانینە وەش مکەرا، پەی بەدەسئاوردەی مافەکا گەلوو کورڎی، جە سەرەتانە بە شێوێوە مەدەنی و دیموکراسی خەبات بە بنەما مگېرا بەڵام ڕووبەڕوو عەزیەتکەردەی و زیڼانیکەردەی باوە.

 هەرپۊکەی جە ١٥و ئابینە پەکەکە قەرارو خەباتی چەکڎاری مڎۆ. هەنگامێوە فرە کاریگەرە بۍ چونکی چا سەردەمەنە گەلوو سەرنیشتوو کورڎەسانی ڕووبەڕوو چەوەسنایۆ فرەی بێوە. پەکەکە بی بە پاڵپەشتۍ گۆرە پەی کورڎی و کورڎەسانی. جە سەرەتانە پەکەکەیچ خەباتی مەدەنی و دیموکراسی و کۆمەڵایەتی کەرۍ بەڵام فرێوە جە کادر و ئەندامەکاش ڕووبەڕوو ئەشکەنجەی و زیڼانی و گەشمەرڎەبیەی بێنێوە. پۊکەی قەرارو خەباتی چەکڎاری هامشان بە خەباتوو دیموکراسی پەی ۋەرگیریکەردەی جە گەلوو کورڎی و کورڎةسانی بیەن، ئینە جە ئەساسەنە ویستوو گەلوو کورڎی نیا پۊکەی ناچارین جە ۋەرا ۋەرو ئەرەگیرکەردەی کورڎەسانینە خەباتی چەکڎاری بکەرا."

'پەکەکە هیواو هەر چوار پارچەو کورڎەسانیا'

ئاری عزەدین ئەرەیاۋناش، خەباتوو چەکڎاری پەکەکەی گەلوو کورڎی بەرۆنە قۆناغێوەتەر پەی پارێزنای گەلوو کورڎی و کورڎەسانی جە ئیساتێچەنە ئەنجامەکێش دیارێنۍ و واتش: "گەر ئێمە هۆرسەنگنایۍ بکەرمۍ پەی ئا پارتا کە جە ۋەرنیشت، ۋەرکۊت و پانیشتوو کورڎەسانینە وەشۍ بیێنۍ، خەباتی چەکڎاریشا کەردەن بەڵام تەنیا جە ناوچێوەنە و سنورێوەنە بیەن. بەڵام پەکەکە گەلوو کورڎی بەرۆنە قۆناغێوە تەر و بۆ بە ئامیانێوە پەی ئانەی جە هەر چوار پارچەو کورڎەسانینە پەشتیش پنە بینیۆ. جە جەنگوو ڕووبەڕووبیەیۆ چنی تیرۆریسەکا داعشی هێزەکۍ پارېزناو گەلی، جە هەر شۊنێنە گەلوو کورڎی مەترسیش سەربیۍ چا ئاماڎۍ بێنۍ.

ئینەیچ جیاوازی بەینوو پەکەکەی و پارتەکا تەریا هەڵبەتە خەبات و مانیایی ئاڎیشا بەکەم نمەگێرمۍ بەڵام خەباتوو ئاڎیشا ناوچەیی بیەن. خەباتوو پەکەکەی گرڎوو سنوورەکا ماڕۆ و کناچۍ و کوڕا هەر چوار پارچەو کورڎەسانی جە سەنگەرێوەنە کوۍ مکەرۆوە کە ئینە جە تاریخەنە کەم ۋێنەن. جە ئیساتێچەنە پەکەکە بیەن بە هیوا پەی هەر چوار پارچەو کورڎەسانی."

جە درێژەو قسەکاشەنە ئاری عزەدین باسش چانەی کەرد شۆڕشوو پەکەکەی جە ڕاو ئایدۆلۆژییوە گەلش ئاشنا کەردەن بە گرفتەکاش کە جە ڕاو سیستەمو سەرمایەداری و دەوڵەت نەتەوەکاوە تووشش بیەن، و واتش: "یۆتەر جە بەرکۊتەکا ئی شۆڕشیە، شۆڕشوو ژەنی، ژیۋای، ئازاڎییا. کە بیەن بە دروشمەو سەر زۋان و هەر چوار پارچەو کورڎەسانی کە ئی جمیەرە خاوەنداریش مکەرۆ."

جە دمادمایی قسەکاشەنە ئاری عزەدین واتش: "مبارەکبایی جە ڕابەر ئاپۆی مکەرمۍ، ڕابەر ئاپۆ تەنیا ڕابەرو گەلوو کورڎی نیا بەڵکم ڕابەرو گەلان. نمونەو ئی حەقەتینەیچە ئانەن کە هەزاران کەسۍ جە نەتەوە جیاوازەکانە خەبات و ئەرەکۊشای چی ڕێبازەنە مکەرا. ڕابەرئاپۆ ڕاسا بەجەسڎە زیڼانی کریان بەڵام فکرو ئاڎی زیڼانی نەکریان. ئازاڎیی جەسڎەی گرنگا تا زیاتەر برەو پی ڕێبازیە بڎۆ. پېسە چنی وەڵتەر داواو ئازاڎیی ڕابەر ئاپۆیما کەردەن جە ئیساتێچەنە داوا جە گەلوو کورڎی و ئازاڎیوازا مکەرمۍ جە گرڎوو وڵاتا دنیۍ داواو ئازاڎیی ڕابەرئاپۆی بکەرا. هەرمانەو ئێمە پەی ئازاڎ کەردەی ڕابەر ئاپۆی بەردەوام مبۆ و ڕێبازەکەیش بەردەوام مکەرمۍ."