ئەدێ- ئینساناو شەممەی پەی زانای چارەنویسوو قەومە بێسەروشۆنکریایەکاشا و دادگاییکەردەی تاوانبارا حەفتەو ١٠١٢ینە مەیدانوو گەڵەتەسەراینە چالاکییشا کەرد. ئەدایاو شەممەی ولی و ڕسموو بێسەروشۆنەکاشا  ورگێرتێ و ئی حەفتە وەنەو چارەنویسوو عەبدولرەحمان دەمیرییشا پەرسا کە ١٧ و ئابوو ١٩٩٥ مەنتێقەو  مەهسێرتوو مێردینینە بێسەروشۆن کریا. هامسەرۆکوو کۆمەڵەو مافەکاو ئینسانی (ئیهەدە) ئەرەن کەسکین و فرێوە بەشدارێ بێنێ. چالاکییەکەنە واڵێ فەرهاد تەپەی، عایشە تەپە قسێش کەردێ.

عایشە تەپە ئەرەیاوناش تاوانبارێ جیای دادگاییکەردەی مپارێزنیا، واتش: "پرۆسەو دادگاییکەردەی پەی ئاشکراکەردەی چارەنویسوو بێسەروشۆنا و سزادای وەرپەرسا نەکریا، ڕا جە بەرکەوتەی ڕاسییەکە گیریا".

تەپە ئاماژەش پانەیە کەرد کە دماو ٢٩ ساڵا بێسەروشۆنبییەیش ئارۆ پەی عەبدولرەحمان دەمیری کوێ بیێنێوە،  ئەرەیاوناش ئەدا و برێوە  دەمیری بە حەسرەتەو زانای هەواڵوو عەبدولرەحمانیوە مەردێ. ئاماژەش پانەی کەرد عەبدولرەحمان  ١٧و ئابوو ١٩٩٥ سواروو پاسێوە بییەن تا مەهسێرتوو مێردینیوە بلۆ ئەدەنە، قۆسەروو مێردینینە پۆلیس پاسەکەی مردنۆ، عەبدولرەحمان دەمیریشا پاسەکەنە وەزنارە وبێسەروشۆنشا کەرد، شایتحاڵێ بە کەسوکارو دەمیریشا وات، گێرتەنشا و بەردەنشا پەی بنکەو جەندرمەو شاڤالەتی. وەختێ ئەداش ملۆ واگە، پەنەش ماچا " پا نامێوە کەسما نەگێرتەب".

تەپە داواش وەنە وەرپەرسا کەردە، پەرسایۆێوی جیددی وەنەو پەرسەو عەبدولرەحمانی بکەرا، جەختش کەردۆ کە چند ساڵێن پەی دەمیری و قەومەکاشا داواو دادپەروەریی مکەرا و داواش کەردە بەپاو یاسا میاننەتەوەییەکا مامەڵە بکەرۆ.

دمایی پەی یادکەردەیوەی کەسە بیشەروشۆنکریایەکا، ولی مەیدانی تەوقدریاو  گەڵەتەسەراینە نریێرە.