هامسەرۆکەو لەقوو ئامەدوو کۆمەڵەو پەشتیوانی جە بنەیانەو زیندانییا (TUAY-DER)، یەتەر ئەرەلە پەی ئاژانسوو هەواڵوو فورات (ANF)ی قسێش کەردێ و ئاماژەشپانەیە دا کە گۆشەگیریی ئیمرالی تەنیا وابەسەو کەسێوە نییەن، بەڵکوم گردوو گەلوو کوردیش وستەن چێروو کاریگەریی وێشۆ. دەوڵەتوو تورکی گەرەکشەن ڕاو سیاسەتوو گۆشەگیرییوە ئیرادەو گەلوو کوردی بماڕۆ و هەوڵەکاو دیموکراتیکبییەی جەبار بەرۆ و واتش:" گۆشەگیریی سەروو بەڕیز ئۆجالانی بییەن بایسوو تووڕەیی و نیگەرانیی بەشیوە فرەو گەلوو کوردی، ئی دۆخە نەک بەتەنیا سەروو گەلوو کوردی بەڵکوم کاریگەریی نەرێیش سەروو بەشە کۆمەڵایەتییەکا کەردەن، بەتایبەت ئا لایەنێ کە ئامانجشا بنیاتنیای دادپەروەریی کۆمەڵایەتین."

'زیندانەکێ فاڕیێنێ پەی ناوەندێوی ئەشکەنجەدای'

ئەرەلە ئاماژەش پانەیە دا گۆشەگیری ئیمراڵینە و زیندانەکای تەروو تورکیاینە بییەن بایسوو پاشێلکەردەی مافەکاو ئینسانی و واتش:" بارودۆخوو زیندانییا ڕۆ بەڕۆ خراپتەر مبۆ. بەتایبەت گیریایە سیاسییە کوردا، کە گردوو مافەکاشا پاشێلێ مکریا و سزاو دیسپلینیشا ملەرە مسەپیۆ. ساڵەو ٢٠٢٣ێنە زیاتەر ١٦٠٠ زیندانییە نەوەشا زیندانەکانە هەنێ. ٦٠٠شا نەوەشیشا قورسەن و ئینەیچ ئانەیە نیشانە مدۆ کە زیندانەکێ فاڕیێنێ پەی ناوەندێوی ئەشکەنجەدای."

بەردەوامیی قسەکاشنەنە ئەرەلە ئاماژەش پانەیە دا ئێشالەنە پێسەو کۆمەڵەو پەشتیوانی جە بنەیانەو زیندانییا (TUAY-DER)و ئامەدی، گرد حەفتێوە وەڵێ زیندانەکانە چالاکیی زیاتەر مکەرا و واتش: "ئی چالاکیێما پەی ماڕای گۆشەگیریێنێ سەروو بەڕێز ئۆجالانی و گردوو زیندانییە سیاسییا، چی ڕووەیچۆ پەشتیوانیی گەلەکەیما کاریگەریی فرەش بۆ."

ستەمێوەن کە کاریگەرییش سەروو گرد لاێوە هەن

ئاخروو قسەکاشەنە ئەرەلە داواو خاوەنداریکەردەیش جە کۆشیای دادپەرەوەری، ئاشتی و مافەکاو ئینسانییش کەردە و واتش:" سیاسەتەکاو گۆشەگیری ئامرازوو ستەمکەردەینێ، کاریگەرییش سەروو گرد لاێوە وەش کەردەن، پەنەوازا دژوو ئی ستەمی بمدرمێوە. پەی فەراهەمکەردەی ئاشتی و دادپەروەری دەنگما بەرز بکەرمێوە. ئانەیچما فکر نەشۆ  ئرمانای بێدەنگی بە ماناو هامکاریی ستەمین. ئەگەر پێوە بکۆشییەیمێ ئانە ڕاو ئازادی و دیموکراسی مکەرمێوە. داواش وەنەو گەلەکەیما و ڕای گردینی میاننەتەویی مکەرمێ  دژوو گۆشەگیری و ستەمی پێوە بکۆشیەیمێ پەی دادپەروەری و ئاشتی دەنگما بەرز بکەرمێوە."