سازیی پەخش و چاپو (زایەڵە)ی جە شارۆو مەریوانی دوێ کتێبێ تازێش بەنامەکێ (ڕازێ هەورامانی) و (گوژمانە)ی چاپێ و پەخشێ کەردێوە و ڕەوانێ کتێبخانەکێ هەورامانی و کوردستانی کەردێوە کە وەڵاوگەکە بەئی جۆرە دێنێش ئەشناسای و زیانیاری جەبارەشانەوە دێنێ:

نامێ بەرهەمی: ڕازی هەورامانی (1)
بابەت: کۆمەڵە ڕازێ
کۆکەردەیۆ و نویستەیۆ: 27 دڵسۆزاو فەرهەنگی
ئامادٚە کەردەی و گوڵچنی و سەرپەرشتی چاپی: ڕەحیم ڕەحمانی
ئەرکی ماڵی: سنۆقوو وارانی
ئی کتێبه‌ 43 ڕازێنێ که‌ 27 کەسا پێسەو دڵسۆزی پەی فەرهەنگی، کۆ کەردێنێوە و به‌ زه‌حمه‌توو کاک ڕه‌حیم ڕه‌حمانی ئاماده‌ کریانێ و هامنوو 1400 ئێنتشاراتوو زایه‌ڵه‌ی چاپ که‌ردێنێ.
ئی کتێبە سەروو ئەرکوو سنۆقوو پاڵپەشتی جە نویسەراو هەورامانی (واران) چاپ بیەن.
ئی ڕازێ بەشێوەنێ چا فەرهەنگە دەمواچ یان شفاهیە کە دلێو زەینەو خەڵکیەنە پارێزیێنێ و سینە بە سینە و نەوە بە نەوە یاوێنێ پی نەسڵی. ئیسەیچ بە ئامادە کریای و چاپ بیەیشا پەی هەمیشەی جە فۆتیای نەجاتشا بی.
ئی ڕازێ هەمانێوە کەرەسەی خاونێ پەی کەسانێو گەرەکشا بۆ دماتەر سەرشا هەرمانە کەرا و لەیەکدایۆ و هورسەنگنایشا بۆ.
سنۆقوو وارانیچ تا ئیسه‌ پەی چاپوو پۆلێو کتیبا ئەرکش کێشان و زەحمەتش  وستەن سەروو شانەو وێش.
تاومێ بە سانای و وانایۆ بەرهەموو نویسەرەکاما جە ڕاو پارێزنای و گەشەدای بە فەرهەنگەکەیما هەنگامێوی گەورێ هورگێرمێ.

نامێ بەرهەمی: گوژمانە
نویسەر: رئوف موحەمەدپور
بابەت: کۆمەڵێو بابەتێ سەروو نەوگەرایی جە  شێعرەنە
ساڵەو چاپی: چاپوو ئەوەڵی 1397 // چاپوو دووهەمی 1398 // چاپوو یەرەمی 1400

ئەژناسێوی کۆتا؛

کتێبوو گوژمانەی یەرێ بەشێن: 
بەشوو ئەوەڵی؛ یەکەم بەیانیەو شێعرەی نەوەی هەورامیانێ. وەروو ئانەی چەنی ڕوەتێوی دەیان ساڵەو شێعرەی نەوەی هەورامیێ، هیچ بەیانیێوەش نەبێ، ئی بەشە تاوانش بە پرەنسیبی سەردەمیانە و ئاوانگارد، کەلێنێوە پەڕ کەرۆوە.
بەشوو دووهەمی؛ باس ولەیەکدایۆ بووتیقای ئەدەبی و باسی تیئوریکی و ئێساتیکایی سەروو نەوگەرایی جە شێعرەنە.
بەشوو یەرەمی؛ ئەوەوانایۆ شێعرەو یەرێ دەفتەرە شێعرا، پێسەو ئەوەوانایۆ دلێ دەقیانەی.