سەبارەت بە ئاژەو ژەنا و جوانا جە گلېرگەو پانیشتوو کورڎەسانینە و ئەرەکۊشای جوانە ژەنا دژوو ئەقڵیەتی پیا سالاری، ژەنی ویستوو سەرمەشقیشا هەن جە گرڎوو بوارەکانە، هەریووە جە بەرشیا بەشوو ئەرەیاۋنای نیان محەمەڎە و فەرمانبەرە شەهلا کەریمە پەی ئاژانسوو هەواڵوو فوراتی (ANF)ی قسێشا کەردۍ.

'ژەنی هەنگامۍ سەرکۆتۍ منیا'

نیان محەمەڎە ئاماژەش پانەی کەرد، جوانۍ دەوری گۆرەشا هەن جە وەڵێوستەی گلێرگەینە و پیجۆرە واتش: " جوانۍ دەوری گۆرەشا هەن جە وەڵێوستەی شاری و وڵاتینە چونکی ویرۆکەی تازە و توانای فرێشا هەنە، گەر باسوو دەورو ژەنا جە گلېرگەنە بکەرمۍ موینمۍ جە بوارە جیاوازەکانە دەوری کاریگەرشا هەن و پەرەیچ بە تواناکاشا دریان. هەنگام پەی سەرکۆتەی منیا.

سەرەڕاو ئینیشایچ ئاستەنگی هەن بەڵام نمەبۆ ئی ئاستەنگیۍ بانۍ بە ڕاگیر ۋەردەموو تواناکا ژەنانە، چونکی ژەنی ئێمە ئانڎە قەوەتێنۍ متاوا گرڎوو ئاستەنگییەکا بماڕا."

جە دمادمایی قسەکاشەنە نیان محەمەڎە باسش چانەیە کەرد پەنەوازا جوانۍ و ژەنی گرنگی بە مژارو ۋەنایۆ بڎا بەمەبەسوو هوشیاری، واتش: "چن ۋەنایۆی پەی ژەنا گرنگ بۆ پەی پیایایچ هەرپاسە گرنگا. سینەما و ۋەنایۆی پەی ژەنا مبۆ بە مەڵامەتوو ئارامی و هوشیاربیەیۆ."

' جوان دەوری گرنگش هەن جە بنیاڎنیای گلێرگەینە '

دماتەر شەهلا کەریمە جەبارەو دەورو جواناوە جە گلێرگەنە قسێش کەردۍ، واتش: "جوان دەوری گرنگش هەن جە گلێرگەنە پەی بنیاڎنیای هەر بوارێوە جە بوارەکا گلېرگەی و جوان متاوۆ بۆ بە کۆڵکۍ ئا بوارەیە و متاوۆ فاڕیای وەش بکەرۆ. پەنەوازا جوانۍ پەرە بە تواناکاشا بڎا، زانیارییشا زیاڎ بکەرا و ۋێشا ڕۆشنۋیر بکەرا هەتا بانۍ بە تاکێوە بەرهەمدار جە گلێرگەنە."

جە دمادمایی قسەکاسەنە شەهلا کەریمە واتش: "فاڕیای جە گلێرگەنە بە جوانی مکریۆ، چونکی جوان ئایینڎەو گلېرگەین گەر جوانۍ برەو بە تواناکاشا بڎا متاوا جە ئاینڎەیچەنە نەوێوە عال بیاونا پنە. گەر بتاومۍ هامکارۍ جوانا بیمۍ ئانە گلېرگێوە سەرکۆتە و ئاینڎێوە عالتەرما مبۆ."