ساڵەو ٢٠١٤چەتەکۍ داعشی هرووژمېوە ۋەرفراوانشا پەی دلېنەبەردەی و کۆمکوژکەردەی گەلوو کورڎی و کورڎەسانی ئەنجامدا چەتەکۍ داعشی گلېرگەو ئێزیدی و گەلوو ۋەرنیشتیشا ۋەرچەما گرڎوو دنیێوە کۆمکوژ کەردۍ جە هەمان کاتەنە هەڕەشێوە گۊرێشا پەی سەرو جیهانی وەشکەرد. بەڵام هیچ هێزێوە جە جیهانەنە نەتاواش دژوو ئا چەتا گژیۆ و جیهانی جە مەترسی ئا دڕندا ڕزگار بکەرۆ. گەریلاکاو ئازاڎیی بە سەرمەشقایەتی ژەنا کۊششکاری دژوو چەتەکا داعشی جەنگشا کەرد و مرۆڤایەتیشا جە کۆمکوژی ڕزگار کەرد.

بۊنەو دەیەمین ساڵیاڎو هرووژم و چەتەکا داعشی پەی سەرو مەخمووری، ژەناو کەمپو گەشمەرڎە ڕوستەم جودی (مەخموور)ی جەبارەو ئا ڕوواوە، قسێشا پەی ئاژانسوو هەواڵوو فوراتی کەردۍ.

ژەناو کوردی چەتەکۍ داعشیشا ماڕۍ

مەدینە هلالییە، جە سەرەتاو قسەکاشەنە بەڕێزۆ گرڎوو گەشمەرڎا سەردەمو هرووژمەکا داعشیش یاڎۍ ئاوردۍ و واتش: " چنی وەڵابیەیۆ داعشی جیهان تەماشەکەر بۍ و تەنیا پەکەکە ڕووبەڕووشا مرداوە. کناچۍ و کوڕەکێما ۋەرەنگارۍ داعشی بیێوە و ماڕێشا. چەتەکۍ داعشی واتەبێشا نمەبۆ جە لایەنو ژەناوە کوشیانە، ژەناو کوردیچ دماو ئی قسا هێزو ۋێشا ۋەرفراوانتەر کەرد، جە ئەرەکۊشای و دلێنەبەردەی داعشینە، ژەناو کوردی دەورێوە گۊرەشا گێڵنا. نموونەی ۋەرچەمە گەشمەرڎۍ ئارین میرکانەنە. ئەردۆغان بە بنیاڎنیای چەتەکاو داعشی گەرەکش بۍ ئێمەی کوردی ڕووبەڕوو کۆمکوژی بکەرۆوە بەڵام ژەناو کوردی جە دژوو ئەردۆغانی و چەتەکاش مڎرامانۍ تاریخیشا خۆڵقنا  و واتشا: "پەی ئازاڎیی گەلەکەیما گیانوو ۋێما بەخشمۍ."

حەرپاسە عەزیزە تەیمورە یووەتەرە جە ژەناو مەخمووری قسێش کەردۍ و سەرنجش وست سەرو ئەرەکۊشای ژەناو کوردی و واتش: " ژەناو کوردی بە گرڎوو هەرەکەتیشاوە دژ بە چەتەکا داعشی جەنگ و ئەرەکۊشایشا کەرد. دڕندەیی داعشی ۋەرا ۋەر بە ژەنا شەنگالی تووڕەیی و قینێوە گۊرێش جە دڵوو ژەنا کوردینە وەشکەردە. ۋەروو ئانەی چەتەکۍ داعشی تەرسێوە گۊرێشا وەشەکەردێبۍ گرڎ کەسۍ نەتاوۍ ۋەرا ۋەر بە چەتەکا مردۆوە. بەڵام سەرەڕاو ئی تەرس و خۆفە گۊرۍ ژەنا شۆڕشگێڵنۍ کوردی پەروەردە کریۍ بە ڕێباز و فەلسەفەو ڕابەر ئاپۆی، هەم جە مەخموور و شەنگال و هەم جە ۋەرنیشت و شۊنەکا تەریچەنە بە تنی جوابوو چەتەکاشا داوە، نموونە هەڤاڵ دەنیزە کە جە بەرەکا وەڵێوە جەنگینە دژوو داعشی تا دما نەفەس جەنگش کەرد و گەشمەرڎۍ بی."

هێڤیدار خەلیلە یووەتەرەنە چا ژەنا مەخمووری ئاماژەش پانەیە کەرد کە چەتەکۍ داعشی گەرەکشا بۍ جە ڕاو جەنگی دەروونییوە کاریگەری بکەرا سەرو گلېرگەی و واتش: "ژەنا شۆڕشگێڵنۍ پەکەکەی بە هەڵوێسی تاریخی ۋێشاوە دژوو چەتەکا داعشی هێزو ژەنا کوردیشا نیشانەو گرڎوو دنیۍ دا و سەرو دەسوو ئا ژەنە شۆڕشگێڵنا کە بەدیلێوە قورسشا دا چەتەکۍ داعشی کە بیۍ بە مەڵامەتوو دەسدرێژی، بڕفانای و کۆمکوژیی ژەنا و گەلا مەنتیقەکەی دلېنەبریۍ."