ئەندامەو کۆنسەو سەرۆکایەتی گرڎینەو کەجەکەی، زلار ستێرکە، ئەرەیاۋناش، ماوەو ٥٠ ساڵان ئەرەکۊشای پەی بیەی، شوناس، کولتوور، سیاسی، سەروازی، ئابووری و کۆمەڵایەتی ملۊڕاوە و واتش: "لاوکەمیۆ پی جۊرە ژیۋای جە کورڎەسانەنە قیمەت و ماناش پېڎا کەرد. باوەڕی گەلوو کوردی ئیساتۍ ئیتر باوەڕ بە ژیۋایۍ ئازاڎییا. گرڎوو ئا هەڤاڵا کە ئیساتۍ جە مەڕەکا مڎرامانینە ئەرەکۊشای مکەرا، شۊنکۊتۍ زیلانۍ، گوڵانۍ و سەماکانۍ.

ئەندامەو کۆنسەو سەرۆکایەتی گرڎینەو کەجەکەی زلار ستێرکە بەشدارەو 'بەرنامەی تایبەت'و ستێرک تیڤی بۍ و جوابوو پرسیارەکا گوڵان ئاڤرێلێش دێوە.

زلار ستێرکە باسش جە کێشەو گەلوو کوردی کەرد و واتش: "جە لایەنی نەتەوەیی، ئابووری، ئشناسنامە، سیاسی، سەروازی، کۆمەڵایەتی، ڕێکوستەیی، پەروەردەیی، زانستی و کەسایەتیوە پېسە گەلوو کوردی گرفتما هەن. ڕابەر ئاپۆ کەسێوەن کە چارەسەریش پەی گرفتەکاو ئێمە خوڵقنا و ئی چارەسەریەشە پەرە پنەدا. ئەگەر ڕابەر ئاپۆ نەبیۍ، پېسە گەلوو کوردی کە ڕووبەڕوو کۆمکوژی بیەنۆ، ئایا تاوێنمۍ دۆسیێوە پاسە هێقم ڕێکبوزمۍ و پەرەش پنە بڎەیمۍ؟ ئینە مژاروو گفتوگۆین. پۊکەی ڕابەر ئاپۆ کریا ئامانج. ئێمە ئانڎە بە ئاسانی نەیاوایمۍ بە ساڵەو ١٩٩٦ی.

دژمن جە ٦و ئایارو ١٩٩٦ ینە پەی دلېنەبەردەی جەستەیی سەرۆک ئاپۆی هرووژمێوە تیرۆریستیش کەرد. ترۊمبێلێوە بەبۆمبچنیا ۋەروودەم و ئا ئەکادیمیاینە کە ڕابەرایەتی چنەشەنە مەنێوە تەقاوە. مەرام چی هرووژمەیە ئانە بۍ کە گەلوو کوردی حەرپېسە وەڵتەری بێ سەرۆک مەنۆوە. پەیلوا سیاسییەکۍ سەرۆک ئاپۆی فرە قوڵېنۍ، فرە بەعالی دژمنی مشناساوە. ئی زانستە جە سەرۆکایەتی، کادر و جەنگاوەرا جمیەرەکەینە وەڵۍ کۊت. بەمەڵامەتوو تەکبیرەکا ڕابەر ئاپۆی و جمیەرەکەیۆ ئی هرووژمە پوچ کریاوە."

زلار ستێرکە ڕۊسنش کەردۆ کە گەشمەرڎە زیلانە جەنگەوانێوە دووە ساڵۍ بۍ و واتش: "هەڤاڵ زیلانە ماوێوە فرە جە کەشەنە گەریلایەتیش نەکەردەبۍ. بەڵام کەسێوە زانا و وڵاتپارێزنە بۍ. چالاکییەکەو هەڤاڵ زیلانۍ تەنیا سەروازی نەبۍ. زیلانە پا زانیاری و ئیرادەی کە جە ڕابەر ئاپۆی و تەڤگەری ئازاڎیوە هۊرش گێرتەبۍ، قەرارو چالاکیی فیدایش دا. جە بواری سەروازینە چالاکیێوە فرە ستراتیجییا. تاکتیک و ستراتیجوو ئا سەردەمیشە جە جەنگی گەریلایینە دیاری کەرد، حەرپاسە ڕاش پەی فرەو چێوا کەردۆ. کردەوێوە فرە مبارەک و گەورە بۍ. ئی چالاکییەو هەڤاڵ زیلانۍ چا سەردەمەنە بی بە جوابێوە گرنگ.

حەرپاسە چالاکییەکەو هەڤاڵ زیلانۍ جە ڕوو ئایدیۆلۆجی و کۆمەڵایەتی و سیاسی و ئەرەکۊشای ژەناوە هۊرچەرخنایۍ گەورە بۍ. زیلانە چەمکوو دژمنیش جە گرڎ لېوە کەرد ئامانج. مشۊم نرخنای و شیکاری فرە قووڵ پەی هەڤاڵ زیلانۍ و چالاکییەکەیش بکەرمۍ. هەڤاڵ زیلانە بە هەڵوێسوو ۋێش کاریگەریش سەرو گرڎ لێوە نیارە. هەزاران گەنجۍ کوردی ڕێبازو زیلان-ێشا گێرتەنە وەر. هەڤاڵ سەما یوجە شۊنپاو هەڤاڵ زیلانێش هۊرگێرت، ئاڎە جە زیڼانوو چاناکالایاینە چالاکیی مکەرۆ و جە نامەکەشەنە ماچۆ وەشڵەی منیچ هامشێوەو زیلانۍ هامڕێم چالاکیێوە قەوەتم کەردۍ. زیلانە جە چالاکییەکەشەنە گرەوش جە مەردەی بەردۆ. ئیتر جە کورڎەسانەنە هێڵۊو بەینوو ژیۋای و مەردەی کاڵ بیۆ. ئیتر ماناو ژیۋای نەمەنە بۍ، ژیۋای تەنیا جە ئاستی بایۆلۆجینە بۍ. ژیۋای بە ئەرەکۊشایۆ مانا مۋینۆوە. مرۆڤەکۍ پەی مانا بەخشای بە ژیۋای ئەرەکۊشای مکەرا.

ئێمە ٥٠ ساڵېن ئەرەکۊشای پەی بیەی، شوناس، کولتوور، سیاسی، سەروازی، ئابووری و کۆمەڵایەتی مکەرمۍ. لاو کەمیۆ پی جۊرە ژیۋای جە کورڎەسانەنە ماناش پنەدریا و قیمەتش پۆ ۋێشۆ دی. جە سایەو ڕابەر ئاپۆی، زیلانۍ و سەمای، ویرۆکەو بایگەلدی، لەیلۍ و هەڤاڵا تەریۆ ژیۋای ماناڎار بی. ئیساتۍ ژیۋای مرۆڤەکا بەقیمەتا. باوەڕی گەلوو کوردی ئیساتۍ باوەڕین بە ژیۋایۍ ئازاڎیی. گرڎوو هەڤاڵاما کە ئیساتۍ جە مەڕەکا مڎرامانینە ئەرەکۊشای مکەرا، شۊنکەوتۍ زیلانۍ، گوڵانۍ و سەماکانۍ.

ئەندامەو کۆنسەو سەرۆکایەتی گرڎینەو کەجەکەی، زلار ستێرکە، جە دما دمایی قسەکاسەنە واتش: "پارېزنای ڕابەر ئاپۆی پارېزنای گەلوو کوردین. پارېزنای ڕابەر ئاپۆی پارېزنای ژیۋایۍ ئازاڎین. سەرۆکایەتی ژیۋای گەلوو کوردیش ژیوناوە. خاوەنداری کەردەی جە ڕابەر ئاپۆی ئەرکێوە بنەڕەتییا. هەڤاڵ زیلانە جە  نامەکەیشەنە ماچۆ؛ ئەرکوو پارېزنای گەلوو کوردی و سەرۆکایەتیما ئینا سەرو شاناوە. جە سەیەو سیستەم و پارادایموو ڕابەر ئاپۆیۆ، دۆسۍ و هامڕایا کوردا جە گرڎ لېوە جیهانیوە زیاڎشا کەردەن.

بە سەرمەسقایەتی دۆساما هەڵمەتەو ئازاڎیی فیزیکی ڕابەر ئاپۆی دەسش پنەکەردەن. پەنەوازا گەل و ژەنی پەیوەس پینەی ئەوەکۊڵیای بکەرا. مشۆم جە گرڎ ڕوێوە گرڎ کەسێ بەشدار بۆ چی هەڵمەتېنە. حەرپاسە مشۊم بەشداری جە جمیەرەکەنە ئانڎەی تەر زیاد بۆ. ڕا بڎەیدۍ با ڕۆڵەکېتا شکس بە مەردەی بارا، چی متەرسدۍ؟ چی هەڵمەتېنە بەشداری ژەناو کوردی فرە گرنگا. ژەنی جە هەڵمەتەکېنە جە ئاستی مېیاننەتەوەیینە دەورو سەرمەشقی مگێڵنا. سڵام جە ئەرەکۊشای و مانیایشا مکەرو، بەڵام پەنەوازا ژەنی جە هەڵمەتەکێنە زیاتەر بە ڕەنگ و نامۍ ۋێشاوە بەشدارۍ با. پەنەوازا جە ئاستێوە خۆسەرەنە دروشمەکاشا ڕۊشن بکەراوە، حەرپاسە ئارگیومێنتەکاشا بنیاڎ بنیا. حەرپاسە پەنەوازا سەرکۊتانە چالاکییەکاشا پەرەپنە بڎا. جارێوەتەر سڵام چا دۆساما مکەرو کە هەڵمەتەکېشا بەرەو وەڵۍ بەردێنە. داوا مکەرو ڕێبازو هەڵمەتەکۍ دۆڵەمەنتەر بکریۆ و چالاکییە کاریگەرەکاشا درێژە پنە بڎا."