یارڎیدەرەو گروپو رێکوزو کۆنفڕانسوو جیهانی پێگەو ژەنا جە ئەوروپا زەمان مەسعودیە جە نامێوەنە ئاماژەش بە ئاژەو ژەنا زیڼانی جە ئێرانەنە کەردەن و داواش کەردەن دەموودەس وەریشە مورادیە، پەخشان عەزیزیە و شەریفە محەمەدیە ئازاڎۍ بکریا.
زەمان مەسعودیە یارڎیدەرەو گروپو رێکوزو کۆنفڕانسوو جیهانی پێگەو ژەنا جە ئەوروپا نامێوەش سەبارەت بە ئاژەو ژەنا زیڼانی جە ئێرانەنە بە تایبەتی وەریشە مورادیە، پەخشان عيزیزیە و شەریفە محەمەدیۍ وەڵاکەردۆ.
چی نامەیەنە کە جە لایەنوو ژمارێوە رێکوزیاو داکۆکیکاری جە مافەکا ژەناوە جە ئەوروپایچەنە وەڵاکریانۆ، سەرنجو رای گرڎی جیهانی پەی سەرو ئاژەو ژەنە چالاکوانا جە ئێرانەنە کێشۆ، کە بەمەڵامەتوو چالاکیەکاشاوە جە بوارو مافەکا مرۆڤینە زیڼانیۍ کریێنۍ.
جە نامەکەنە جەخت چانەیە کریانۆ کە بەرکەردەی سزای قورسۍ و سزاو جە قەنارەدای پەی چالاکا پېسە شەریفە محەمەدیۍ و پەخشان عەزیزیۍ و هەرپاسە تۆمەتبارکەردەی وەریشە مورادیۍ بە بەغی (یاخیبیەی چەکڎاری) سەرو بنەماو تۆمەتۍ درۆیینۍ و هۊربەسیۍ، ئامانج چنەشا سازکەردەی کەشو تەرسۍ و تۆقناین جە گلێرگەو ئێرانینە.
زەمان مەسعودیە جە نامەکەشەنە سەرەڕاو بەربڕیەی نیگەرانی قووڵو ۋێش جە بارەو ئاژەو ژەنا زینڼانی کریایۆ جە ئێرانەنە داواش کەردێنە دەموودەس و بە بێ هیچ شەرتێوە شەریفە محەمەدیە، وەریشە مورادیە و پەخشان عەزیزیە ئازاڎۍ بکریا.
