ئەنجوومەنی بەڕێوەبەری کۆنگرەی نەتەوەیی کوردستان (کەنەکە) سەبارەت بە هێرشەکانی دەوڵەتی ئێران بۆ سەر کۆڵبەران ڕاگەیاندراوێکی بڵاو کردەوە.

لە ڕاگەیەندراوەکەدا وتراوە کە کۆڵبەری کارێکی مەترسیدار و پڕ ئازارە، بە هەزاران کەس لە ڕۆژهەڵاتی کوردستان بە هۆی نەبوونی هەلی کار و کەمتەرخەمی بەرپرسانی ڕژیم ناچارن پەنا بۆ کۆڵبەری ببەن.

کەنەکە ڕایگەیاند؛ حکوومەتی ئێران لە لایەک هەوڵی پەراوێزخستن و برسیکردنی کۆمەڵگای کورد دەدات و لە لایەکی دیکەش وەک بەشێک لە سیاسەتی کۆمەڵکوژیی سیستماتیکی، کۆلبەران کە بۆ بژێوی ژیانیان و بنەماڵەکانیان پەنا دەبەنە بەر ئەم کارە مەترسیدارە، بە ئامانج دەگرن.

لە درێژەی راگەیاندراوەکەدا هاتووە، "بە هەزاران کۆڵبەر گیانیان لەدەستداوە، دەیان هەزار کەس بریندار بوون و بە دەیان هەزار بنەماڵەش زیانیان بەرکەوتووە. بەپێی ئاماری تۆڕی مافەکانی مرۆڤ لە کوردستان، لانیکەم 48 کەسی کۆلبەر". لە ماوەی ساڵی ڕابردوودا کوژراون و 427 کەسیش برینداربوون، تەنیا لەماوەی 70 ڕۆژی ڕابردوودا لانیکەم 17 کەسی کۆلبەر و کاسبکار کوژراون."

کەنەکە وەبیری هێنایەوە کە تا ئێستا هیچ کەسێک لەسەر کردەوە دڕندەکانی دادگایی نەکراوە و وتی: "کاسبکاران و کۆلبەران هیچ مەترسییەک بۆ سەر هێزە چەکدارەکانی ئێران دروست ناکەن و ئەوان تەنها دەیانەوێت بژێوی ژیانیان پەیدا بکەن. بەڵام هێزەکانی ڕژیم وەک ئەوە وایە دەیانەوێ ڕاو بکەن، هێرش دەکەنە سەر کۆلبەران و ڕاستەوخۆ تەقەیان لێدەکەن و دەیانکوژن.

بەپێچەوانەی بەڵێنە زۆرەکانیان کە بۆ چارەسەرکردنی کێشەی کۆلبەران داویانە، حکوومەتی ئێران لە دوو ساڵی ڕابردوودا توندوتیژیەکانی دژی کۆلبەران زیاد کردووە. هیچ پاساوێک بۆ ئەم هێرش و کوشتنانەی خەڵک نییە. بەم هێرش و کوشتنانە سیاسەتی دوژمنکارانەی کۆماری ئیسلامی ئێران لە دژی گەلی کوردستانە بەڕێوە دەچێت.

ئێمە وەک کەنەکە ئەو هێرشە دڕندانەیە شەرمەزار دەکەین و داوا لە حکوومەتی ئێران دەکەین ئەرک و بەرپرسیارێتی خۆی لە پاراستنی گیانی گەلدا جێبەجێ بکات. بەم بۆنەیەوە جارێکی تر بۆ قوربانیان ڕەحمەت دەنێرین و سەرەخۆشی لە کەسوکاری قوربانیان دەکەین و هیوای چاکبوونەوە بۆ برینداران دەخوازین."