چالاکیی ئێشکگری بۆ ئازادیی جەستەیی عەبدوڵا ئۆجالان رێبەری گەلی کورد لە ٢٥ی حوزەیرانی ٢٠١٢ەوە لە لایەن دەستپێشخەریی "ئازادی بۆ ئۆجالان" لە شاری ستراسبۆرگی فەرەنسا دەستیپێکردووە و ماوەى ٤٦٣ هەفتەیە بەردەوامە.

چالاکییەکە لە گۆڕەپانی بەردەم دامەزراوەکان و رێکخراوەکانی ئەوروپا بەڕێوەدەچێت و هەموو هەفتەیەک لەلایەن دەستەیەکی جیاواز لە کوردان و دۆستەکانیان لە ئەوروپا بەڕێوەدەچێت. چالاکییەکە ماوەى ٩ ساڵە بە بەردەوامی بەڕێوەدەچێت و درێژماوەترین چالاکیی کوردانی ئەوروپایە.

ئێشکگرییەکە ئێستا لە هەفتەى ٤٦٣هەمیندایە و چالاکیی ئەم هەفتەیە لەلایەن دەستەیەک لە شاری دویسبورگی ئەڵمانیاوە بەڕێوەدچێت. چالاکوانە ئێشکگرەکان هەموو رۆژێک لە کاتژمێر ٠٧:٣٠ تاوەکو ١٦:٠٠ لە ئێشکگریدان. ئێشکگرانی ئەم هەفتەیە بریتین لە خەبات تاش، ئیسماعیل مینکارا و جەمیل تۆک.

خەبات تاش بە ناوی دەستەکەیانەوە لێدوانێکی دا و سڵاوی لە بەرخودانی مێژوویی گەریلاکانی ئازادیی کوردستان لە دژی داگیرکەریی دەوڵەتی تورک لە کوردستان کرد و رایگەیاند، سەرکەوتن بۆ گەلی کوردی خۆڕاگر و بەرخودێرە.

خەبات تاش باسی ئەوەیکرد، لە هەر چوار لای جیهانەوە گەلی کورد بۆ ئازادیی خۆی شەڕێکی گەورە بەڕێوەدەبات و وتی، ئێشکگریی ئازادیش لە ناو ئەو تێکۆشانانەى کورداندا گرنگترین چالاکییە لە ئەوروپا.

چالاکوانی ئێشکگر خەبات تاش رایگەیاند، گەلی کورد لە رێگەى ئەو چالاکییە مێژووییەوە، کە ٩ ساڵە لە ئەوروپا بەڕێوەدەچێت ئەوەى نیشانداوە، کە ژیانێکی بێ رێبەرەکەیان قبوڵ ناکەن.

خەبات تاش ئاماژە بەوەکرد، لە ئایاری ١٩٨٣ محەمەد قەرەسونگور و ئیبراهیم بیلگین شەهید بوون و بەو بۆنەیەوە یادی شەهیدانی مانگی ئایار دەکەمەوە و یادیان بەرز رادەگرم.

تاش رایگەیاند، ئامانجی محەمەد قەرەسونگور پێکهێنانی یەکێتیی نەتەوەیی کوردان بوو و پێکنەهێنانی یەکێتیی نەتەوەیی تاوەکو ئێستاش کێماسی و کەموکوڕییەکی گەورەیە.

خەبات تاش باسی ئەوەیکرد، سەرکەوتنی کوردان لە دژی دەوڵەتە داگیرکەرەکان تەنها بە یەکێتیی نەتەوەی بەدی دێت و وتی، پارتی دیموکراتی کوردستان (پەدەکە) لەمپەر و رێگری یەکێتیی نەتەوەییە و دەبێت حسابی ئەو رێگرییەى بە گەلی کورد بدات.

تاش سڵاوی لە چالاکیی مانگرتنی زیندانیانی سیاسی و بەرخودانی مێژوویی گەریلا کرد و داوی لە گەلی کورد کرد راپەڕن.

ژ.ت