٧ حزب و هێزی سیاسی لە ڕاگەیاندراوێکدا کۆمەڵکوژییەکەی نەورۆزی جندرێس-یان شەرمەزارکرد و سەرەخۆشییان لە بنەماڵة و کەسوکاری قوربانییەکان کرد. لە ڕاگەیەندراوەکەدا هاتووە، کۆمەڵکوژییەکەی نەورۆز لە جندرێس بەڵگەیەکی دیکەی پێشێلکارییە لە ناوچە داگیرکراوەکان، کە چەتەکانی دەوڵەتی تورک لەسەر بنەمای ناڕاست ئەنجامی دەدەن.

لە ڕاگەیاندراوەکەدا سەرەخۆشی لە بنەماڵە و کەسوکاری قوربانیانی ئەو کۆمەڵکوژییە کرا و داوا لە پێکهاتەکانی گەلی سوریایش کراوە، کە خۆپیشاندانی پشتیوانی بۆ دانیشتوانی ناوچە داگیرکراوەکان ئەنجام بدەن.

لە ڕاگەیاندراوی ئەو حیزب و لایەنانەدا داوای ئەم خاڵانەی خوارەوە کراوە:

١ - داوا لە کۆمکاری عەرەبی دەکەین، کە بە ئەرکی خۆی هەستێت، کۆمەڵکوژییەکە بخاتە بەرنامەی کۆبوونەوەی داهاتووی خۆیەوە.  هەروەها ڕێگری لەو ڕێکخراو و دەزگایانە بکرێت، کە لەلایەن دەوڵەتی تورک داگیرکەرەوە پشتیوانیان لێدەکرێت و کار بۆ گۆڕینی دیمۆگرافیای ناوچەکانی سوریا و بە تایبەتی ناوچە کوردییەکان دەکەن.

٢ - پێویستە ئەنجومەنی ئاسایش لێکۆڵینەوەیەکی خێرا و بێگەرد لەبارەی ئەو کۆمەڵکوژییەوە ئەنجام بدات، بکوژان و ئەو کەسانەی دەستیان لەو کۆمەڵکوژیەدا هەیە بدرێنە دادگا.

٣ - پێویستە نەتەوە یەکگرتووەکان بەرپرسیاریەتی خۆی بەجێبهێنێت و دەوڵەتی تورک ناچار بکات کۆتایی بە داگیرکارییەکانی لە ناوچەکانی سوریا بهێنێت.

٤ - بۆ گەڕانەوەی سەلامەتی خەڵکی عەفرین بۆ گوند و شارۆچکەکانیان، پێویستە کار بۆ هەڵوەشاندنەوە و تێکشکاندنی ئەو پلانانە بکرێت، کە کار بۆ گۆڕینی دیمۆگرافیای عەفرین، سەرێکانی و گرێسپی و هەموو ناوچە داگیرکراوەکان دەکەن.

ئەو حیزب و لایەنانە داوایان لە گەلی سوریا و هەموو هێزە وڵاتپارێزەکان کرد، کە جەژنی نەورۆز بە جەژنێکی نیشتمانی و سوری بزانن.

ئەو لایەنانەی ڕاگەیاندراوەکەیان بڵاوکردووەتەوە بریتین لە:

-  پارتی سەرەتا سوریا

-  بزووتنەوەی گۆڕانی دیموکراتیک (دەستەی تەنسیق)

-  شەپۆلی گۆڕان و ئاشتی

-  بزووتنەوەی چاکسازی - سوریا

-  بەرەی نیشتمانیی سوریا

-  پارتی نیشتمانیی کۆمەڵایەتی

- پارتی یەکێتیی دیموکراتیک (پەیەدە).

ژ.ت