جە ئەرەیاوناێوەنە حەریۊ جە حیزبوو دێموکراتوو کورڎسانوو ئێرانی، کۊمەڵە (ڕێکوزیاو کورڎسانوو حیزبوو کۊمۊنیستوو ئێرانی)، پارتوو ژیوای ئازاڎوو کورڎسانی (پژاک)، سازمانوو خەباتوو کورڎسانوو ئێرانی، پارتوو ئازاڎیی کورڎسانی (پاک) و کۊمەڵەو زەحمەتکێشاو کورڎسانی داواشا کەرڎێنە، ڕۊو ٢٥وو خەرمانانی جە ساڵیاڎوو دەسپەنەکەرڎەی سەرەورڎای "ژەنی، ژیوای، ئازاڎی"ینە مانگێرتەی سەرتاسەری بلۊ ڕاوە و چا ڕوەنە دوکان و بازاڕەکۍ وزیارە و هاموەڵاتۍ سەروو قەبرەو گەشمەرڎا سەرەورڎاکەی  بدا.

گردوو ئەرەیاوناکەی پێسنەن:

بانگەوازوو حیزب و لایەنە سیاسییەکاو وەرکەوتوو کورڎسانی

پەی مانگێرتەی گردینوو ٢٥وو خەرمانانی

کۊمەڵە کۊشەراو خەڵکوو کورڎسانی!

خەباتکارە سیاسییا و مەدەنییا!

٢٥وو خەرمانانوو ١٤٠١، ژینا ئەمینی-یە کناچە کورڎە گەنجەو سەقزی شاروو تارانینە  بە پەلامارەو هێزە دەسشان و سەرکوتکەرەکاو ڕێژێمی گیانش بەخت کەرد. نامۍ (ژینێ) پێسە سەروو قەبرەکێشۊ نویسییا، بییە بە "ڕەمز"وو  ئەرەپڕایۍ جەماوەریی وەرفراوانی، کە کورڎسانۊ بە درووشموو "ژەنی، ژیوای، ئازاڎی" دەسش پەنە کەرد و فرەش نەخواینا سەرتاسەروو شار و مەنتێقەکاو ئێرانی و بەروو وەڵاتیش گێرتۊ و جە درێژەشنە بە "شۊڕشوو ژینێ" و "شۊڕشوو ژەنی، ژیوای، ئازاڎی"ی نامێش بەرە کەرڎە.

شۊڕشوو ژینۍ جەماوەریتەرین و درێژتەرین سەرەورڎای و ناڕەزایەتیین، کە تاوابۊش دەسەڵاتوو کۊماری ئیسلامی وزۊ چێروو پەرسۍ و هەنگامە پەی نیایقەبرەو ئی ڕێژێمە سەرکوتکەرەیە بنیۊ. ماوەو یەک‌ساڵی ویەرڎەینە و جە ڕەوتوو ئی شۊڕشەینە جمیەری ئازاڎیوازانەو خەڵکوو ئیرانی بەگردی و خەڵکوو کورڎسانی بەتایبەتی دژ بە ڕێژێمی زاڵی ملوو ئێرانیرە، قۊناغی تازە و جەماوەرییش ئەزموون کەرڎەن و هەنگامەی  قەوەتەش نیێنە، کە مرڎای و گێڵایۊش پەی نییا. دەوری خاس و وەرەچەموو ژەنا جە سەرمەشقبییەی ئا شۊڕشەینە گلێرگەو ئێمەش جە ڕووەو کۊمەڵایەتییوە یەک هەنگامی گەورە وست وەڵۍ و ئاسۊو سەرکەوتەیش ڕۊشنتەر کەرڎۊ. گەنجۍ چەوپەڕوو گیانبازینە پەی ژیواێوە ئازاڎی و عارەزوومەندی فیداکاریی کەموێنە کەرا.

جە ساڵوەگێڵای دەسپەنەکەرڎەی شۊڕشوو ژینێنە یاگۍ وێشەنە بە نیشانۍ بەرزئرمانای یاڎ و ویرەوەریی گەشمەرڎاو ئی شۊڕشە تازەیە و ڕێزوەنەنیای جە قوربانییا و زیندانییە سیاسییا و زیندەئرمانای جمیەری سیاسی، بەشکۊوە پێوای ئی یاڎە مەزنە سیاسی و کۊمەڵایەتییەیۊ بلمۍ. چی پێوەندییەنە دماو چند جار دیدار و ڕاوێژی سیاسی، ڕۊو چوارشەممەی، ١٥وو خەرمانانوو ١٤٠٢ی ڕۊجیاری، حیزبە سیاسییەکاو وەرکەوتوو کورڎسانی:

- حیزبوو دێموکراتوو کورڎسانوو ئێرانی

- کۊمەڵە (ڕێکوزیاو کورڎسانوو حیزبوو کۊمۊنیستوو ئێرانی)

- پارتوو ژیوای ئازاڎوو کورڎسانی (پژاک)

- سازمانوو خەباتوو کورڎسانوو ئێرانی

- پارتی ئازاڎوو کورڎسانی (پاک)

- کۊمەڵەو زەحمەتکێشاو کورڎسانی

 سەروو ئی خاڵاو واری ڕێکۍ کەوتێ؛

١- پەشتیوانیجە  داواو کۊشەراو گلێرگەی مەدەنی و ڕێکوزیا سه‌ربه‌وێکا پەی ڕێزگێرتەی و بەشداریی چالاکانەی جه ساڵڕۊو شۊڕشوو "ژەنی، ژیوای، ئازاڎی"ینە.

٢- ئەرەیاونای ڕۊو ٢٥وو خەرمانانی، پێسە ڕۊو مانگێرتەی گردینی گردوو کورڎسانینە. چی ڕوەنە گردوو دووکان و بازاڕ و ناوەندەکاو هەرمانۍ و ئیدارەکا وزیارە، سەرسەعبوو ئا ڕوەیە (٢٥وو خەرمانانی)، جه‌ماوه‌روو خه‌ڵکوو کورڎسانی سەرڎای قەبرەو ژینای جوانەمەرگۍ و سەرجەموو گەشمەرڎا و گیانبەختکەرڎاو شۊڕشوو" ژەنی، ژیوای، ئازاڎی" شار و دەگایەکاو کورڎسانینە کەرا و چەپکەولیی ڕێز و وەشەسیای سه‌روو مەزارەکاشاوە بنیارە و ڕاوڕسموو ڕێزوەنەنیایش پەی کەرا.

٣- داوا وەنەو سەرجەموو خەڵکی ئازاڎیوازوو ئێرانی (ژەنا، گەنجا، کرێکارا، مامۊستایا و خانەنشینا، ژیوگەپارێزنا و نه‌ته‌وه‌بندەسەکا سەرتاسەروو ئێرانینە کەرمۍ، کە پەشتیوانی وەنەو مانگێرتەی خه‌ڵکوو کورڎسانی کەرا و بە مانگێرتەی گردینی، به گردلاێوەش نیشانە بدا، که شۊڕشوو" ژەنی، ژیوای، ئازاڎی" تا یاوای به ئامانجەکاش پاسە درێژه‌ش هەن.‌

٤- داوا وەنەو گردوو کۊشەرا و خەباتکارا، هێز و لایەنه وەڵێکەوتەیوازەکا بەروو وەڵاتیوە کەرمۍ به گرد نۊعێوە  پەشتیوانی جە مانگێرتەی گردینوو ٢٥وو خه‌رمانانی کەرا و چا ڕووەنە وێنیشانەدای و ڕاپیمای جه‌ماوه‌ری کەرا و سەرنجەو کۊمەڵاو خه‌ڵکوو ئینساندۊسوو دنیۍ پەی پەشتیوانی جە شۊڕشوو ژینائەمینیۍ کێشا.  

٥- حه‌رکام جە حیزب و لایەنە سیاسییەکاو کورڎسانی به‌شدارۍ چی ئەرەنیشتەینە، پەشتیوانی و بەشداریی وێشا جە مانگێرتەی ڕۊو "٢٥وو خه‌رمانان"ی و ڕاوڕەسمەکاو سەروو  قەبرەو گیانبەختکەرڎاوە ئەرەبیاونا.

چوارشەممە ١٥وو خەرمانانوو ١٤٠٢ی ڕۊجیاری– ٦وو سێپتامبروو ٢٠٢٣

س.ز