هونەرمەند چۆپی فەتاح، لە بارەی بەشداربوونی لە ئاهەنگی پیرۆزکردنی نەورۆز لە بناری قەندیل، پەیامێکی ڤیدیۆیی بڵاوکردەوە.

لە پەیامە ڤیدیۆییەکەدا هونەرمەند چۆپی فەتاح لەگەڵ کچەکەیدا دەردەکەوێت و دەڵێت: نەورۆزی ئەمساڵ لە قەندیل دەبین.

هەروەها بانگەوازی لە گەل دەکات بەشداریی ئاهەنگەکە بکەن و رایگەیاند: "لە ئێستاوە پیرۆزباییتان لێدەکەین، بە هیوام هەمووتان لەوێ ببینین".

بۆ نەورۆزی ئەمساڵیش، بناری قەندیل باوەش بۆ گەل دەکاتەوە و ئاهەنگی گەورەی نەورۆز بە بەشداری چەندین هونەرمەندیی ناوداری کورد و گرووپی میوزیکی و بەشداری گەل لە هەر چوار پارچەی کوردستانەوە، لە کاتژمێر ١٢ـی ڕۆژی ٢١ـی ئەم مانگە بەڕێوەدەچێت.

پێشتریش  تارا حسێن، هاوسەرۆکی گشتیی تەڤگەری ئازادیی کۆمەڵگەی کوردستان، بانگەوازیی لە گەل کردبوو، لە ٢٠ و ٢١ـی ئەم مانگەدا بەشداریی لە پیرۆزکردنی جەژنی نەورۆزی بناری قەندیل بکەن.

راشیگەیاند: لە نەورۆزی ڕابردوو بۆ نەورۆزی ئەمساڵ گەلی کورد کۆمەڵێک قۆناغی هەستیاری تێپەڕاند، تێکۆشان و دەستکەوتی مەزن هەبوون، لە هەمان کاتدا قوربانی گەورە درا، نەورۆزی ئەمساڵ دەکەوێتە ناو مانگی پیرۆزی ڕەمەزانەوە، بۆیە بانگەوازییمان بۆ هاوڵاتییانی باشوور و پارچەکانی دیکەی کوردستان و کوردانی دەرەوەی وڵات، ئەوەیە نەورۆزی ئەمساڵ لە قەندیلی سەربەرزەوە پیرۆز بکەن.

باسی لە گرنگی بەشداربوون لە نەورۆزی بناری قەندیل کرد و وتی: واتای خۆی هەیە، نابێت هیچ شتێک ببێت بە بەربەست لەبەردەم لاواز دەربازبوونی ئەم نەورۆزە، ئامادەکاریی بۆ بەربانگی ڕۆژی ٢٠ـی مانگ کراوە، هەروەها شەوەکەشی ئاهەنگی تایبەت بەرێووەدەچێت.

هـ .ب