ناوەندی چاند و هونەری رۆژهەڵاتی کوردستان لە تەڤ-چاند پرسەنامەیەکی بۆ کۆچی دوایی هونەرمەند جەمیل نەوسودی بڵاوکردەوە و تیایدا لەدەستدانی ئەو هونەرمەندەی بە کۆست و زیانێکی گەورە بۆ هونەر و رەسەنایەتی هەورامان ناوبردووە.
لە پەیامەکەی ناوەندی چاند و هونەری رۆژهەڵاتی کوردستان، کە سەر بە بزوتنەوەی چاند و هونەری ئەوروپا (تەڤ-چاند)ە هاتووە: " کۆچی دوایی نەوسودی زیانێکی گەورەیە بۆ هونەر و ڕەسەنایەتیی هەورامان و کوردستانن و قەرەبووکردنەوەی ئاستەمە".
دەقی پەیامەکە:
هونەرمەند جەمیل ئەحمەدی ناسراو بە (جەمیل نەوسودی) خەڵکی شاری نەوسودی هەرێمی هەورامان، کۆچی دوایی کرد.
جەمیل نەوسودی، هەر لە سەرەتای لاوییەوە تا کۆچی دوایی کرد لە خزمەتی هونەری ڕەسنی هەورامان و کوردستاندا بوو و لە بواری دەنگبێژی و گۆران بەگشتیی و سیاچەمانە بەتایبەتی، بە هونەرەکەی خزمەتێکی گەورەی بە ڕەسەنایەتیی هەورامان و کوردستان کردوە. لەو چوارچێوەیەشدا، خاوەنی سەدان گۆرانی و سیاچەمانەیەی ناوازەیە.
هونەرمەند جەمیل نەوسودی شانبەشانی گەورە هونەرمەندانی دیکەی هەرێمی هەورامان بەتایبەت (عوسمان هەورامی، حەمەحسێن کێمنەیی، شەفیع کێمنەیی) گۆرانی و هونەری ڕەسەنی هەورامییان گەیاندە لوتکە و بە پایەکانی گۆرانی و سیاچەمانەی دێرین و ڕەسەنی هەورامی بەناو دەکرێن. بۆیە کۆچی دوایی نەوسودی زیانێکی گەورەیە بۆ هونەر و ڕەسەنایەتیی هەورامان و کوردستانن و قەرەبووکردنەوەی ئاستەمە.
تەڤگەری چاند و هونەری ئەروپا (تەڤ-چاند) .
ناوەندی چاند و هونەری ڕۆژهەڵاتی کوردستان".
هـ . ب
