ڕۆژئاڤا یەك لێكبەستنە: لێكبەستنى كوردبوون و مۆدێلى دیموكراتى؛ نەك وەك دوو ڕەگەزى جیاواز، بەڵكو وەك یەك تاقم كە تێیدا بوونى كورد لە مانا بەرتەسكە ناسیۆنالیستى و تاكڕەوانە دەوڵەتگەراكەى بۆ بوونێكى دیموكرات و پێكەوەیى و خۆسەر تێدەپەڕێت.
ئەو هێزانەى لە سوریا لە جەنگدان لایەنیكەم ئەمانەن: ئەمریكا، ڕوسیا، توركیا، ئیسرائیل، ئێران، میلیشیا ئێرانییەكان، تیرۆریستانى ئەحرار شام، سوپاى نیشتمانیى سوریاى دژە كورد، هێزەكانى سوریاى دیموكراتیى كورد و دەوڵەتى سوریا خۆى بە سەرۆكایەتى ئەسەد. هەر یەك لەمانە بەرژەوەندى و پلانى خۆیان هەیە. ئەمریكا و ڕووسیا نێودەوڵەتین، توركیا و ئیسرائیل و ئێران دەوڵەتى و هەرێمین، تیرۆریستان و میلیشیاكان و هێزەكانى سوریاى دیموكرات نادەوڵەتین. ڕووسیا و ئەمریكا كەمێك دوورتر و توركیا و ئێران و سوریا و ئیسرائیل ڕاستەوخۆتر بەشدارن. لە سوریا تا ئەم ساتە هێزە نێودەوڵەتییەكان جەنگى ڕاستوخۆیان لەگەڵ یەكتر نەكردووە، بەڵام داڕیژەرى سەرەكیى ئەو نەخشانەن كە بە دەقیقى بۆیان جێبەجێ ناكرێت. لە بەرامبەردا بەشى سەرەكى پێكدادانە ڕاستوخۆكان لەنێوان هێزە دەوڵەتى و نادەوڵەتییەكانن: داعش دژ بە سوریا و عێراق، ئیسرائیل دژ بە میلیشیاكان، توركیا دژ بە كورد، تیرۆریستان دژ بە سوریا؛ ئینجا لەنێوان هێزە نادەوڵەتییەكان خۆیاندا بووە: تیرۆریستان دژ بە میلشیاكانى ئێران، ئەمانیش دژ بەوان، هەردووكیان دژ بە كورد و داعشیش هەر دژ بە كورد. بەڵام ئەم جەنگانە چیتر دیالەكتیكى نین کە لە هەر قۆناغێکدا کۆتاییەکیان هەیە. لە فیكرى هیگڵدا ئاغا و كۆیلە لە بنەڕەتدا دوو "من"ن كە لەسەر ئوبێكتێك (با بڵێین لەسەر خاوەندارێتیى پارچە زەوییەك) دەبێت بە جەنگیان. ئەم ململانێیە تا ڕیسكى مەرگ درێژ دەبێتەوە، بەڵام یەكێك لەمانە لەم سنوورەدا دەوەستێت و ناوێرێت یاریى بە ژیانى خۆیەوە بكات، بەڵكو بۆ پاراستنى ژیانى خۆى ڕادەست دەبێت و دان بە سەردەستیى بەرامبەرەكەیدا دەنێت، بەمەش دەبێت بە كۆیلە و براوەكەش بە ئاغا. وەك دەبینین ئەمە بە تەواوی کار ناکات: لای تیرۆریستەکان مەرگ پرسەکە یەکلا ناکاتەوە، چونکە خۆیان مەرگن، بەڵام خەباتگێڕانیش مەرگ نایابنەزێنێت چونکە خۆیان ژیانن. تەنانەت لە جەنگى ئەمریكا-تاڵیبان و ڕووسیا-ئۆكرانیاشدا ئەمە ڕووینەدا. پوتین هەڕەشەى ئەتۆم دەكات و ناتۆش هێڵى سوورى زیاتر دەبەزێنێت.
ماوەى چەند ساڵێكە هەر یەك لەم هێزانە لە ململانێدان تاوەكو گەر نەیشیبەنەوە، نەدۆڕێن و بەشێكى ئەم گرەوانەش لە مەرگدا یەكلا نابنەوە؛ ئەم دۆخى پێكدادانە زۆرانە وایان كردووە بۆچوونەكەى ئەنتۆنیۆ نێگرى و مایكڵ هارت لە كتێبى "مەڵتیتیود"دا تەواو ڕاست بێت: "جەنگى نوێ كۆتاییەكى نییە، پێویستە هێز و تووندوتیژى بە بەردەوامى و بێ پچڕان بەكاربهێنرێت. هیچ لایەنێك ناتوانن ئەم جۆرە جەنگانە ببەنەوە، یان با بڵێێن پێویستە هەموو ڕۆژێك بیبەنەوە". هەموو ڕۆژێك بردنەوەى جەنگ بە واتاى بردنەوەیەكى یەكلاكەرەوە نییە، واتاى ئەوەیە ئەمڕۆ بۆ من و سبەى بۆ تۆ؛ بەم جۆرە براوە و دۆڕاوى شێوازى جەنگى كۆنى نێوان دەوڵەتان نییە، كە لایەك دەیبردەوە و ئەویتر دانى بە دۆڕانى خۆیدا دەنا، بەڵكو، تەنانەت گەر دوو دەوڵەتیش بەیەكدا بدەن (وەك ئێستاى ڕوسیا و ئۆكرانیا/ئەمریكا) جەنگى بێكۆتاییە كە لاوازبوون و باڵادەستى هەر لایەنێك كاتییە و دیسانیش دەست پێدەكاتەوە. لەبەرئەمەیە ململانێى ئیسرائیل و فەلەستین، تورك و كورد، ڕووس و ناتۆ، سوریا، ئەفریقا، عێراق و هتد هەر بەردەوام دەبێت و پێدەچێت بەم زووانە بە وێرانبوونى تەواوەتیى شارستانیەتیشدا تێپەڕێت.
لە ڕۆژئاڤاى كوردستان هێزەكانى هەدەسە هەم بەرامبەر دەوڵەت (توركیا) و هەم بەرامبەر هێزە نادەوڵەتییەكان (داعش، تیرۆریستان، میلیشیاكان، عەشیرەتەكان) بەرگرى لە خۆیان دەكەن. هیچ هێزێكیان وەك ئەوان نەخراوەتە ژێر فشار، چونكە هێزە نادەوڵەتییەكانى دیكە یان خۆیان بریكارى هێزە دەوڵەتییەكانن، یانیش ڕاستەوخۆ پاڵپشتى و هاوكاریان لێ وەردەگرن. بەڵام هەدەسە ئەو هاوكارییانەى كە لە ئەمریكا وەریگرتوون، هەم كەمن و هەمیش واى لێنەكردوون ببن بە پرۆكسى ئەمریكى لە ناوچەكەدا؛ هەر لەبەرئەمەیشە تا ئێستا ئەمریكا دەستەبەریى ئەمنیى بە ڕۆژئاڤا نەداوە و پێناچێت بیشیدات. لەمەش قووڵتر مۆدێلى هەدەسە هەم جیاوازە لە مۆدێلى توركیا كە دەوڵەت/نەتەوەگەرایە تا ئاستى پیرۆزكردنى دامەزراوەى دەوڵەت، هەم جیاوازە لە مۆدێلى هێزە تیرۆریستەكان كە خەلافەت/ئوممەت/شەریعەتە و هەمیش جیاوازە لە مۆدێلى میلیشیاكان كە كۆمارى ئاخوند/تەشەیوع/مەهدییە. هەڵبەت هەر بەم جۆرە مۆدێلى هەدەسە جیاوازە لە ئیسرائیلیش كە هەندێجار دەوڵەتى ڕەگەزپەرستى نەتەوە و هەندێجار دەوڵەت پلەس (ئیسرائیلى گەورە)/ گەلى هەڵبژاردە/مەسیحایە. مۆدێلى هەدەسە خۆسەرى/خەبات/ نەتەوەى دیموكراتى/ فرەییە؛ لەبەرئەمەیە كە هەم توركیا و هەم تیرۆریستان هێندە دژ بە ڕۆژئاڤان و دەیانەوێت بە هەر نرخێك بووە ئەو ئەزموونە لەنێو بچێت. بەم مانایە ئەم دژایەتییە تەنیا لەبەر ئەوە نیە ئەوان كوردایەتیی دەکەن، بەڵكو لەبەر مۆدێلەكەشیانە كە خودى بوونەکەیان (واتە كوردبوون)ـەكەیشیانە؛ كورد وەك ئیمكانى بوونێكى سەربەست و فرە و پێكەوەیى كە جەنگ و سەركوت بنەماكەى پێكناهێنن. ڕۆژئاڤا یەك لێكبەستنە: لێكبەستنى كوردبوون و مۆدێلى دیموكراتى؛ نەك وەك دوو ڕەگەزى جیاواز، بەڵكو وەك یەك تاقم كە تێیدا بوونى كورد لە مانا بەرتەسكە ناسیۆنالیستى و تاكڕەوانە دەوڵەتگەراكەى بۆ بوونێكى دیموكرات و پێكەوەیى و خۆسەر تێدەپەڕێت. ئەمەیش لەبەرئەوەى مۆدێلى دەوڵەت بە واتای "قۆرخكردنى تووندوتیژیى ڕەوا"یە كە كورد بە درێژایى مێژووى نوێ خۆى قوربانیى ئەم تووندوتیژییە بووە. ڕۆژئاڤا نایەوێت تووندوتیژى قۆرخ بكات، نایشیەوێت چیتر قوربانیى ئەم تووندوتیژییە بێت. دەیەوێت یەك "ئاوارتەى ڕاستەقینە" بێت لەنێو دۆخى ئاوارتەى هەمیشەیى جەنگدا. دەیەوێت "خەبات" لە "جیهاد" (كە ئیسلامییەكان ستایشى دەكەن)، بەرگرى لە "كۆمەڵكوژى" (كە ئیسرائیل بە درۆ ناوى بەرگرى لێناوە)، "بەرەنگارى" لە "مەزهەبگەرایى" (كە ئێران بە درۆ ناوى میحەوەرى مقاوەمەى لێ ناوە) جودا بكاتەوە. هەر بەم جۆرەشە "ئاشتى" و "جەنگ"یش (كە لاى ئەمریكا و ڕووسیا تێكەڵ كراون) لێك جیا دەبنەوە.
