ماوەی ١٣ ساڵە دەوڵەتی داگیرکەری تورک، ڕێگا نادات هیچ نوسراوێکی ڕێبەر ئۆجالان بگاتە دەرەوەی زیندان، هەروەها زیاتر لە ٣٣ مانگە خراوەتە ژێر گۆشەگیرییەکی توندەوە و ڕێگە نادرێت نە پارێزەرانی و نە خانەوادەکەی چاویان پێ بکەوێت، ئەمەش دەگەڕێتەوە بۆ ترسی سیستەمی جیهانی لە فکر و پرۆژەکانی ڕێبەر ئۆجالان لەمەڕ ئاشتی و پێکەوەژیانی گەلان، کە تەونی سیستمی دەوڵەت نەتەوە و بەرژەوەندییەکانیان هەڵدەوەشێنێتەوە.

ڕێبەری گەلی کورد عەبدوڵا ئۆجالان زیاد لە ٢٤ ساڵە لە زیندانی تاکەکەسیی-دایە لە دوورگەی ئیمرالی، لە ئاداری ساڵی ٢٠٢١ـەوە هیچ زانیارییەک لەبارەیەوە نازانرێت، هەروەها لە ٧ی ئابی ٢٠١٩ەوە بە بیانووی جیاواز و بە پێچەوانەی یاسا و بنەماکانی مافی مرۆڤ، لەژێر گۆشەگیرییەکی تووند، ڕێگا بە پارێزەرەکانی نادرێت چاویان پێبکەوێت.

کۆتا جار دوای ئەوەی پارێزەرانی ڕێبەری گەلی کورد عەبدوڵا ئۆجالان، چوونە ئیمراڵی و دیداریان ئەنجامدا، لە دوای دیدارەکە پەیامی ئاشتی ڕێبەر ئۆجالان بۆ ڕای گشتی بڵاوکرایەوە و ڕوویکردە جیهان و وتی: "من هەوڵدەدەم ستاتۆ و پێگەیەک بۆ کورد درووستبکەم، وەرن با کێشەی کورد چارەسەر بکەین، لە هەفتەیەکدا من دەتوانم شەڕ بووەستێنم، دەتوانم ئەگەری شەڕ نەهێڵم، بڕوام بە خۆم هەیە و ئامادەم بۆ چارەسەریی."

لێرەوە دەردەکەوێت وەک چۆن گەلەکۆمە نێودەوڵەتییەکەی گلادیۆی ناتۆ لە ١٩٩٩دا، ترس بوو لە فکر و فەلسەفە و پرۆژەکانی ڕێبەر ئۆجالان بۆ ئازادی کوردان و گەلانی رۆژهەڵاتی ناوەڕاست، بە هەمان شێوەش گۆشەگیریی بەردەوام لەسەر ڕێبەر ئۆجالان درێژکراوەی هەمان ترسە و هێزە هەژموونگەراکان لە هەر پەیام و وشەیەک دەترسن، کە لە زیندانی ئیمراڵییەوە بێتە دەرەوە، چونکە دەزانن تێز و پرۆژەکانی ڕێبەر ئۆجالان، ئاشتی و پێکەوەژیانی گەلان بەرقەراردەکات و تەونی سیستمی دەوڵەت-نەتەوە و بەرژەوەندییەکانیان هەڵدەوەشێنێتەوە.

وەک ڕێبەر ئۆجالان لە بەرگرینامەی (دۆزی کورد و ڕێگەچارەی نەتەوەی دیموکرات)دا دەڵێت: "لە ڕۆژهەڵاتی ناوەڕاست پەیوەست بە بابەتی كوردانەوە بۆشاییەك هەبوو، ئێمە ویستمان ئەم بوشاییە لەسەر بنەمای ئازادیی پڕبكەینەوە، دەركەوتنی یەكەممان لەسەر بنەمای ئازادی و دیموكراسیی بوو، ئەمەش بەگوێرەی بەرژەوەندییەکانی سیستەمی جیهانی سەرمایەدار و هەژموونی ویلایەتە یەكگرتووەكانی ئەمریكا، ئینگلیز و ئیسرائیل نەبوو، بگرە پێچەوانەکەی جێگای باسبوو، ئەمەش لەلایەن هەندێک كوردی بەكرێگیراو و دەوڵەت ـ نەتەوە و هەژموونی سەرمایەدارییەوە مایەی قەبووڵكردن نەبوو".

لەسەر بنەمای شیکارییەکەی ڕێبەر ئۆجالان ڕووندەبێتەوە کە هێزە هەژموونگەراکانی جیهان، بەرژەوەندییەکانی خۆیان لەسەر بنەمای، درێژەدان بە شەڕ، ئاڵۆزیی و قەیرانی گەلانی ڕۆژهەڵاتی ناوەڕاست هەڵچنیوە، بۆیە پەیام و تێز و پرۆژەکانی ڕێبەر ئۆجالان، لەمەڕ ئاشتی و چارەسەریی دیموکراسییانە بۆ ڕۆژهەڵاتی ناوەڕاست، بە مەترسی بۆ سەر بەرژەوەندییەکانی خۆیان دەبینن.

ڕێبەر ئۆجالان بە پێچەوانەی سیاسەتی دەوڵەت-نەتەوەی سیستەمی سەرمایەداریی جیهانیی، لەپێناو دەرچوون لە قەیرانە سیاسییەکانی ڕۆژهەڵاتی ناوەڕاست و چارەسەرکردنی کێشەی کورد و گەلانی تر بەڕێگای ئاشتییانە، سیستەمی کۆنفیدراڵیزمی دیموکراتیی پێشکەشکردووە، کە پێکەوەژیانی ئاشتییانەی گەلان بە بنەما دەگرێت و ئەم سیستەمە لە باکوور و ڕۆژهەڵاتی سووریا و شەنگال بەرجەستە بووە، لە هەرچوار پارچەی کوردستانیش بووەتە جێی خواستی خەڵک و کۆمەڵگە.

سەرباری هەموو هەوڵەکانی ڕێبەر ئۆجالان بۆ ئاشتی، بەڵام سیستەمی سەرمایەداریی جیهانیی بەردەوام هەوڵیداوە دەنگی کپ بکات و ڕێگەنەدات پەیامە ئاشتیخوازییەکانی بگەنە دەرەوەی دیوارەکانی زیندان، بۆیە بەردەوام گۆشەگیریی بەسەردا دەسەپێنن و ڕێگەی پێنادەن دیدار لەگەڵ کەسوکار و پارێزەرەکانیشی ئەنجامبدات.

ئەمەش لە کاتێکدایە ڕێبەری گەلی کورد عەبدوڵا ئۆجالان زیاد لە ٢٤ ساڵە لە زیندانی تاکەکەسیی-دایە لە دوورگەی ئیمرالی، هەروەها زیاتر لە ٣٣ مانگە خراوەتە ژێر گۆشەگیرییەکی توندەوە و ڕێگە نادرێت نە پارێزەرانی و نە خانەوادەکەی چاویان پێ بکەوێت، لە دژی گۆشەگیریی توند و بۆ ئازادیی جەستەیی ڕێبەر ئۆجالان لە چوار لای جیهان کەمپەینی ”ئازادیی جەستەیی بۆ ڕێبەر ئۆجالان، چارەسەری سیاسیی بۆ پرسی کورد” دەستی پێ کردووە.

هـ . ب