دیارە لەم چەن ماوەی دواییدا دەوڵەتی داگیركەری تورك بەبیانۆی شەڕكردن لەگەڵ پەكەكە بەقوڵایی بیست كلیومەتر هاتووەتە نێو خاكی باشوری كوردستانەوە. ئەم یەك دێرە كە بەئاسانی و سەرانسەر خوێندمانەوە مێژوویەكی بەدرێژایی چەند هەزار ساڵ لەناوخۆیدا شاردووتەوە كە ئەگەر بەدروستی شرۆڤە بكرێ زۆربەی كێشەكانی كورد بەدەر دەكەوێ ـ یان چارەسەر دەبێ!، بەڵام بۆ شرۆڤەكردنی مژارێك ـ ئەویش مژارێك وەك كێشە كورد ـ پێویست مرۆڤ یەكەم جار پرسیار لەخۆی بكا. دیارە پرسی مرۆڤ هەرچەندە قووڵ و بەرفرە بێ، وەڵامەكەش كە وەری دەگرێتەوە بەهەمان گرانییە.

بۆیە ئەركی سەرشانی هەر تاكێكی كوردە ـ لەهەر گۆشە و قوژبنێكی دنیا ـ تا ئەم پرسیارانە لەخۆی بكا:

پەكەكە كێیە و لە چ كەسانێك پێكدێ؟

پەكەكە بۆ چ مەبەستێك شەڕ دەكا؟

پەكەكە حزبێكی كلاسێك وەك حزبەكانی پێشووە یان فكر و ڕامانی جوداتری هەیە؟

بیردۆزی پەكەكە تەنیا بۆ باكوری كوردستانە یان پەیوەستە بەهەر چوار بەشی كوردستانەوە؟

بۆ تەواوی دنیا لەبەرامبەری پەكەكە ڕاوەستاون و دژی ئەو پرۆپاگەندە دەكەن؟

پەكەكە تەنیا لەناو خاكی باشوری كوردستانە؟

خاكی هەر چوار بەشی كوردستان مڵكی باب و باپیری چ حیزب و لایەنێكی سیاسییە؟

ئایا ئێمەی كورد ـ وەك داگیركەران دەڵێن ـ دەتوانین وەڵاتی خۆمان بەش بەش سەیر بكەین؟

لەدەستپێكدا پارچەبوون لەمێشكدا دروست دەبێ یان لەخاكدا؟

ئایا كوردستان لەناوچوار وڵاتدا دابەش كراوە یان تا ئێستاكەش لەژێر چاوەدێری داگیركەری رۆژئاوا"غەرب" ـ لەپیش هەموویاندا بەریتانیا ـ دایە.

بەراستی كێشەی ـ یان كێشەكانی ـ كورد تەنیا بەبەشێكی وڵات سنوردارە یان هێرش كردن بۆ هەر پارچەیەك ـ یان هەر تاكێكی كورد لەهەر جێگایەكی دنیا ـ لەڕوانگەی داگیركەرانەوە وەك یەك دێتە هەژمار؟

كێشەی ئێمەی كورد كێشەیەكی بیردۆزی ـ فكرییە ـ یان كێشە نەبوونی دەوڵەتی نەتەوەییە؟

ئایا بەهەبوونی دەوڵەتی نەتەوەیی كێشەی گەلی كورد چارەسەر دەبێ؛ ئەگەر چارەسەر دەبێ بۆ چی هەمیشە وڵاتانی دنیا ـ بەتایبەت رۆژهەڵاتی ناوین ـ لەناو ئاڵۆزیدان؟

كاتێك ئێمە دەڵێین دەوڵەت چ واتایەك لەهزر لەمێشكی مرۆڤ دا دروست دەبێ؟

بۆ دەبێ لەناو دنیادا كوردستان ـ بەهەژماری پەنجا میلیۆن كەس ـ تەنیا وڵاتێك بێ چوار بەش كرا بێ؟

ئەو داگیركارییەی ئەمڕۆ دەوڵەتی داگیركەری تورك بەرێوەی دەبا، بەردەوامی هەمان پیلاننامەی ریفراندۆمە، كە نیوەی زیاتری خاكی باشور ـ لە بیست و چوار كاتژمێردا ـ دانا، نییە؟ یان دووبارەكردن و رادەستكردن و ڕاكردنی هەزاران پێشمەرگە لەشەنگاڵ، كە كەمتر لەچوار ساعەت دەیان هەزار كەس، كە بەگولەباران و سەڕبڕین و كچ دزین و منداڵ كوشتن و دەستدرێژی و كۆمەڵكۆژی و سووتان و تاڵانكردن و ڕاونانی كۆمەڵگەی ئێزیدی دوایی هات، نییە؟

خەیانەت بەگەل بە چ واتایەكە و فرۆشتنی خاك چییە؟ ئایا مردنی رۆژانەی پێنج هەزار كەس چارەنووسی كوردە؟

لەقۆناخێكی ئاوا هەستیاری مێژوودا كە هەر دەوڵەتێك هێرش دەكاتە سەر گەلی وڵاتێك ئەركی گەل و مرۆڤایەتی چییە؟

چ جیاوازییەك لەنێوان بێدەنگی و هاوكاری هەیە؟ چۆن دەوڵەتێك دەتوانێ بێ هیچ ئاگاداری و رەوایەتیەێك!! لەپێش چاوی تەواوی دنیا هێرش بكاتە سەر گەلێكی دیكە كە تەنانەت نەكرێتە رۆژەڤی هیچ راگەیاندنێكی دنیا؟ چ جیاوازیەك لەنێوان شەڕی رووسیە و ئۆكرانیا، ئیسرائیل و غەزەدا، لەگەڵ داگیركردن ـ یان فرۆشتنی ـ باشور هەیە؟

بۆ دەبێ لەئەوپەڕی دنیا چكولەترین روداو بكرێتە رۆژەڤ و بەرۆژانە شرۆڤە لەسەری بكرێ، بەڵام بۆ لەبەرامبەر لەشكەركشی لەسەر كوردستان و داگیركردنی لەناو داگیركردندا لەكەس هیچ مەتەقێك دەرنایە؟

ئایا رۆژهەڵاتی ناوین بەناوەندی كوردستان سەرلەنوێ دابەش دەكرێتەوە؟ بەراستی دیسان بەشێكی تری باشور فرۆشرا یان داگیركرا؟

كاتێكدا سێ بەشی وڵات تووشی ئاڵۆزی عەسكەری بووە چە گەرەنتیەك هەیە ئەمجارە هێرش نەكرێتە سەر رۆژهەڵات؟

ئایا دەستدرێژی ـ تەجاوز ـ تەنیا بەجەستەی مرۆڤ دەكرێ یان سووتانی دارستان و ژینگە و رەز و باخ و دوكان و ماڵی خەڵكی مەدەنی و دامەزراندنی بنكەی عەسكەری و دانانی خاڵی پشكنین و هێرش و لێدان و سووڕانەوەی بیست و چوار كاتژمێری فرۆكەی شەڕكەر و فرۆكەی بێ فرۆكەوانی دەوڵەتی داگیركەری تورك لەباشور، تاڵانكردنی گشتی ژێرخانی ئابوری و فرۆشتنی بەهەزارانترین نرخ و برسی راگرتنی سیستەماتیكی خەڵكی مافدار و دەستبەسەركردنی رۆژنامەوانان و وڵاتپارێزان و رادەستكردنی چالاكوانان بەدادگایەكی وڵاتێكی تر و تیرۆری بێ لێپرسین و لێكۆلێنەوە لەژنانی ئازادیخوازی ئەم نیشتیمانە نابێتە دەستدرێژییەك كە هەزاران جار لەدەستدرێژیی جەستەیی قیزەونترە؟

ئایا كێشەی گەلی كورد بەدەوڵەتە زلهێزەكان و هەژەمۆنگەراكان ـ وا خۆیان وەك پێغەمبەری ئاخرزەمان نیشان دەدەن ـ چارەسەر دەبێ ـ یان دەیكەن!! یان هەر ئەو دەوڵەتانەن كە بەدرێژایی مێژوو ـ بۆ بەرژەوەندی خۆیان ـ لەژێر ناوی دین و مەزهەب و تەریقەت و شێخ و ئاغا و بەگ و عەشیرە و زاراوە و چاند و هەزاران شتی جوداتر كوردانیان لە بەرامبەر بە یەك راگرتووە و پرسی كوردیان قووڵ و قووڵتر كردووتەوە.

هێزی مێشك و بیرەوەری كورد تا چ ئاستێك مێژووی ئاڵۆزی خوی دێنێتەوە بەرچاو؟

چ پەیوەندییەك یان بەرژەوەندی ـ لەنێوان دەوڵەتی داگیركەری تورك و ناتۆدا هەیە كە دەهێڵێن بەپێشكەوتووترین چەك و تەكنیكی نوێی سەردەم و بەچەكی قەدەغەكراو ـ لەئاستی نێودەوڵەتیدا ـ "ناوەكی ـ كیمیایی ـ تێرمۆباریك ..." هێرشی گەریلاكان ـ كە هەر منداڵی ئەو گەلەن ـ بكا؟

دنیای هۆڤ و دڕندەی ئەمپریالیزم تۆڵەی چی وەها بێ ئەخلاقانە و بێ بەزەییانە لەكورد دەكاتەوە؟

هەزاران پرسی دیكە بەو ڕەنگە رۆژانە مرۆڤی كورد دەتوانێ لەخۆی بكا. ئەگەریش بمانەوێت وەڵامی تاك بەتاكی ئەو پرسیارانە بدەینەوە سەدان لاپەڕەش تێر ناكا چۆن ڕا و بیروبۆچوون جیاواز بۆ هەر پرسێك هەیە، بەڵام كامیان لەحەقیقەت و راستی نزیكترن؟

گوتنێكی رێبەر ئاپۆ هەیە كە دەڵێ؛"كورد نە دەمرێ و نە دەژی"، ئەگەر چاو لەو گووتنە بكەین وتەیەكی دوو ئالیتە و ناكۆكە، بەڵام ئەگەر بەوردی گۆی بۆ ڕاگرین راستیەكی تاڵ دەرئەكەوێ.

راستە كورد هەر كاتێك داگیركەران بەمەبەستی قڕكردن و لەناوبردن هێرشیان كردووەتە سەری بە شێوەیەكی هەستیار و قارەمانانە خۆی پاراستووە. لەخاكی خۆی هەڵنەهاتووە و خۆی لەبزربوون رزگار كردوە، بەڵام هیچ كاتێكیش بەشێوەیەكی ئاسایی و ئاسوودە نەژییاوە. نەیتوانیوە ـ یان بە پێویستی نەزانیوە! ـ یەكگرتنێكی نەتەوەیی دروست بكا. بەشێوەیەكی كلاسیك و فئودال ماوەتەوە و خۆی لەپۆلیتیكا و گۆڕانكارییە سیاسییەكانی سەردەم دوور ڕاگرتووە. ئەم شێوە ژیان و بیركردنەوە كۆی سەر یەك بووە تا لەگەلانی دنیا جێ بمێنێ و ئەمڕۆ بووەتە گرێیە كوێرە كە خۆشی نازانی سەرەكەی لەكۆێیە؟

ئەگەر مرۆڤ ـ بەهەر هۆكارێ ـ مێژووی خۆی نەزانێ و مێشك و هزری ئاڵۆز بێ زەحمەتە بتوانێ شتەكان لەیەكدی جیا بكاتەوە و باش و خراپی خۆی بزانێ. رەوشێك پێش دێ كە بەكوردی و كرمانجی پێی دەڵێن سەرلێشێواوی!!.

جارنا لەناو مێژووی كورداندا گەلێك رێبەری دڵسۆز و پێشەنگی قارەمان لەدایكبووە و رۆڵی سەركرداییەتیان گێڕاوە و گەلیان لەدەوری خۆكۆ كردووە. كەسانێك كە خۆیان لەبەرامبەری كێشەی كوردا بەرپرس دیوە و تا دوایین هەناسەی ژیانیان؛ بەبێ هیچ دوو دڵێیەك خەباتیان كردووە و گیانی خۆیان بەخشیوە، بەڵام كێشەی كورد تەنیا بەهەستیاری و دڵپاكبوون چارەسەر نەكراوە و ناشكرێ. رزگاری تەنیا بەبەكارهێنانی چەك و شەڕی پارتیزانی مسۆگەر نابێ. راستە پاراستنی رەوا مافی هەر بوونەوەرێكە، بەڵام لەسیاسەتدا تەنیا بەشێكە كە دەبێ ئەویش بەدروستی بەكار بێ.

لێرەدایە كە رۆڵ و گرنگی و جیاوازی رێبەر ئاپۆ و سەرهەڵدانی پەكەكە دەردەكەوێ و خۆی دەنوێنێ. لە مێژووی پەكەكەدا چەندین جار ئاڵۆگۆڕی بنەڕەتی دروست بووە. واتا بەرز و نزمی خۆی لەكات و دەمدا بووە. رەوشت یا هەڵسوكەوتێك هەڵە و كەم و كۆرت بووبێ دەستی لێ بەردراوە و رەخنەدایین خۆی لەبەرامبەر گەل داوە و هەوڵی پڕكردنەوەی داوە. سیاسەتێكیش كە بەرژەوەندی كوردی تێدا بووبێ ـ ئەگەر بەقەد دەنكە جۆیەكیش بوو بێ ـ بەهیچ شێوازێ دەستی لێ هەڵنەگرتووە و لێی پاشگەز نەبووەتەوە و فیداكاری و گیانبازی بۆ كردووە و قۆربانی بۆ داوە.

دوای رفاندنی و پیلانگێڕی نێونەتەوەیی لەسەر رێبەر ئاپۆ تەواوی دنیا چاوەڕوانی لەناوچوونی پەكەكەیان ـ وەكو حیزب و بزوتنەوەكانی پێشووی كورد ـ دەكرد، بەڵام بەپێچەوانەوە، پەكەكە هیچ نەرووخا؛ بەڵكو رۆژبەرۆژ خۆی بەهێز و بەرفراوانتر و تۆكمەتر كرد. پتر خۆی بەرێكخستن كرد و خۆی گەیاندە ئاستێكی گەردوونی كە هەر گەلێكی بن دەستی دنیا راستی خۆی تێدا ببینێتەوە. بەڵام بۆ وەها بەخێرایی لەچاوترووكانێكدا!! تێشكمان خستە سەر رێبەرتی و مێژووی پەكەكە؟ رێبەر ئاپۆ وەك هەر تاكێكی كورد گەلێك پرسیاری ورد و دروشتی سەبارەت بەخۆی و چۆنیەتی ژیان و گەل و خاك و ئاو و فكر و چاندی كوردستان وروژاند و بەپێچەوانەی زۆرینەی گەلی كورد خۆی لەو پرسیارانە نەبوار و لەتەمەنی منداڵییەوە دەستی بەلێگەڕین و لێپرسین كرد. پشتی لێوردبوونێكی زۆر پەكەكەی لەسەر دوو وشە دامەزراند.

"كوردستان داگیركراوە". لەسەرەتای ئەم نووسینەدا گەلێك پرسیار هاتە ئاراوە كە بەهەر جۆرێك شرۆڤە بكرێ وڵامەكەیان دەبێتە ئەو دوو وشەیە. بۆیە هەر تاكێكی كورد دەبێ لەبەرانبەری داگیركردنی باشور بێدەنگ نەبێ. فاشیزمی ئاكەپە و خەیانەتی بنەماڵەی بارزانی گەیشتووەتە دوایین هەناسە و پەلەقاژەی خۆیان و وەك  ورچی بریندار هێرشی هەر لایەك دەكەن بۆ ئەوەی چركەساتێك بەتەمەنی حكومەتی قیزەونی خۆیان درێژ بكەن.

هەركات گەل بەهەر هۆكارێك لەشۆڕش دووركەوتووەتەوە داگیركەران زیاتر جەسارەتیان بەخۆیان داوە و زیاتر گەلیان خستووەتە ژێر زەخت و زۆر و گۆشارەوە. كاتێكیش گەل رابووە و لە مافی خۆی هاتووەتە دەست داگیركەریان تێكشكاندوە و راویان ناون.

لێرەدا رۆڵی گەلی كورد بەخاوەنداری كردن لەشۆڕشی پەكەكە دەتوانێ تەواوی ئەم پیلاننانە پووچەڵ بكاتەوە. ئەوەی راستیەكە كە رۆژێك هەر تاكێكی كورد پێ دەگات.

هـ. ب