پازدەی شوبات، گەورەترین خیانەتی نێودەوڵەتی لەمێژوودا دەرهەق بە ڕێبەری گەلان و گەلی کورد کرا. ئۆجالان بەندەوارێکە لە گۆشەی زیندانێکی تاکەکەسی هیچ سنورێک ناناسێت بەتێزو شیکارێکی فەلسەفی و فیزیکی ناکۆکی نێوان مادە و ڕوحیش چارەسەر دەکات.
زۆر بەکورتی
پێش پازدەی شوباتی (ساڵی ١٩٩٩) بەکەسێکی ئاسایی لە ئۆجالان دەگەیشتم ، بەڵام کاتێک پەرتوکەکانی مۆدرنیتەی سەرمایەداریی و دەوڵەتی ڕاهیبی سۆمەرم لەنوسینەکانیدا خوێندەوە ، کەمێک لەجیهانبینیەکانی قوڵبومەوە ، دواجاریش کتابی بونیادی ژیانی ئازاد و فیمینیزم و گفتوگۆی بەرگرینامەکەی ئۆجالان-م لە دیدی فەیلەسوفاندا خوێندەوە ، کەوتمە ناو پرسیار و وەڵام؛
ئایا بۆ دەبێ نوسەرو بیرمەندانی ئەمڕۆی جیهان لە دوورترین کیشوەری دنیا بەندەوار و ڕێبەرێکی کورد بەئێمەی خوێندەواران بناسێنن !!؟
ئەرێ بۆ دەبێ ئێمە بەخۆمان نەیناسین !؟
ئەدی بۆچی زۆربەی سەرکردە و حزبە کوردییەکان و بەناو ڕۆشنبیرەکان یەک (ئەلف و بێ) لەو بەندەوارە تێناگەن و نایانەوێت ئێمەش لێی تێبگەین ...!!؟
ئۆجالان کێیە ؟
لە کوردە ڕەسەنەکانی دەڤەری ئورفایە، کەسێکی بێ ماڵ و حاڵ و بێ پشتیوانی غەدر لێکراوی نیشتیمانێکی زەوتکراوە. ئەگەر ئۆجالان مرۆڤێکی ئاساییە ، بۆچی پەنجاو دوو دەوڵەتی زلهێز لەبەرامبەریدا لەسەر یەک مێز کۆبونەوە ، بەپیلانێکی چەپەڵ لەڕێگەی مادەی هۆشبەرو تۆڕی جاڵجالۆکەی سیخوڕی ، بیست و سێ ساڵە بێبەزەییانە فڕێیانداوەتە دوورگەیەکی هێندە سامناک و سیحراوی دوور لە هەمو پێوەرێکی حقوقیی و ئینسانیی، لەناو تابوتێکی ئاسنی ئینفیرادی بەندیان کردوە ؟!
ئەگەر بەندیەکی ئاساییە و تەنها بەزمانی مرۆڤ قسە دەکات، ئەدی بۆچی بەم حاڵەش چواردەوری پڕ کراوە لەجەلادی ڕاهێنراو ، خوێنڕێژ و بێبەزەیی مەشق پێکراوی سەرسەری !؟ بەچەندین جۆر فشاری دەرونیی و ڕوحیی و جەستەیی ئازار دەدرێ ، وێڕای ئازارەکانیش لەم گۆشەی تەنیاییەدا
ڕووبەڕووی دێوەزمەی وەحشیەت و فاشیەتی مۆدرنیتەی سەرمایەداری جیهان بووەتەوە ،
ڕەخنە لە هەمو چەمکەکانی مۆدرنیتەی سەرمایەداریی و سۆسیالیزمی زانستیی دەگرێت و پێیوایە؛ هەر دوو تئیۆر کلاسیک و پڕ لەکەموکورتین و کەوتونەتە خزمەتی یەکتر، بەم هۆیە ژیانی مرۆڤ و گەلانیان کردۆتە جەهەندەم .
ئۆجالان لەم ڕونگەیە ژیرانە لە فەلسەفەی سۆسیۆلۆژی ئیکۆلۆژی ، ئۆتۆنۆمی ژنۆلۆجی ، ئابوری ، قوڵ دەبێتەوە و هەوڵ دەدات کۆمەلگەیەکی مەدەنی و گەردونی لە ڕۆژهەڵاتی ناوەڕاست و لەسەر ئاستی جیهان بنیات بنێت، مافی گەلان بەشێوازی ئەنجومەنی دیموکراتیی و کانتۆی هەرێمایەتیی و خۆبەڕێوەبەریی لە بازنەی کۆنفیدرالیزمی دیموکراتی بەرجەست بکات و کۆتایی بەو چەمکە قڕێژە وەهەمیانە بێنێت کە لە بەرەبەیانی مێژوودا لەلایەن چینە ڕاهیبەکانی سۆمەرەوە کردویانەتە دەمامکی خوداوەند وەک پاساوێک بۆ چەوساندنەوەی کۆمەڵگا .
بێگومان لەدۆخێکی وادا بۆ شکاندنی ئەم کۆنکرێتە مرۆف پێویستی بە هێز و وزەی ڕوحە ...!
ئەدی ئەو وزە ڕوحیە لە کێوە دێت بەردەوام لەو تابوتە ئاسنینە هێز بە بەر جەستەیەکی ساردو سڕدا دەکاتەوە ،
گەردەلولی چ کوانتەمێکە ئەم هێزە ؟ لەشەپۆلی کامە زەریاوە هەڵدەستێ ، ڕۆژ بەدوای ڕۆژ سەرنجی فەیلەسوفانی جیهان بەلای خۆیدا ڕادەکێشێ ،
هاوسەنگی ئەقلانیەت و مەعقولیەت لەنێوان گشت چەمکەکانی میتۆلۆژی و تیۆلۆژیی و زانست و فەلسەفەدا ڕادەگرێت و هەولیش دەدات ڕوح بەبەر جەستەی مردودا بکاتەوە .
چەند سەیرە ! بەندکراوێکی عەجایب وەک دوا مرۆڤ لە دورگەیەکی تەنیادا خۆڕسکانە سیۆری یاسایەکی حقوقی گەردونی و مەدەنی بەجۆرێک دادەڕێژێتەوە ، پەنجە دەخاتە سەر تەواوی خانە شێرپەنجەییەکان و کێشە کۆنکرێتیەکانی دەولەت کۆمارو ، دەوڵەت پیشەسازیی و ، دەوڵەت بیرۆکراسی و فاشیزم و مالتۆس گەرایی و دەوڵەت خەلافەت و ناسیۆنالیزم و ڕاسیزم ،
هەمو ئەو چەمکە کلاسیکیانە دەرباز دەکات کە بۆ کۆیلەکردنی گەلان لەپێناو بەرژەوەندی دەستەڵات بیناکراون .
ئەوەی من لێی تێگەیشتبم بەندەوارێک لە گۆشەی زیندانێکی تاکەکەسی هیچ سنورێک ناناسێت بەتێزو شیکارێکی فەلسەفی و فیزیکی ناکۆکی نێوان مادە و ڕوحیش چارەسەر دەکات ، هەرگیز پێی وانیە یاساو ڕێساکانی مرۆڤ و ئەم شەڕە کەرە بەسروشتی خۆیان ڕوخساری خودایەک بن کە لە ڕۆژی ئەزەلەوە بەقەدەر کرابێت ...
ئۆجالان پێیوایە؛ ئەوەی دەگوزەرێ تەنها دیماگۆجیەتی فیرعەنەکانی دوێنێ و ئەمڕۆیە، بەردەوام لە هەناوی یەکتر گەورەرە دەبن و هەڵدەکشێن ، هەمو شێوازەکانی یاسا و دەستەڵاتی خۆیان لەگەڵ خودا و ئابوریی و دەستەڵات و دەوڵەت بەتەوحید کردوە بۆ بەکۆیلەکردن و دووفاقی کۆمەڵگای چینایەتیی و پلەداری ....
ئێستا پازدەی شوباتە !
دوای بیست و سێ ساڵ تەنیایی و گۆشەگیری لە دەریای مەڕمەڕە ، کۆمپلۆیە نامەردانەکەی نێودەوڵەتیم بەبیر دێتەوە . بابزانین لەدوای بیست و سێ ساڵ دەربازبوون بەسەر گۆشەگیری ئۆجالاندا ، فیلەسوفانی سەردەمی مۆدرنیتە و هەوادارانی ئازادی خوێندنەوەیان چۆنە لەسەر ئەم بەندەوارە و چەند بەسەرسامی لێی دەڕوانن ....!
زۆریان لەسەر نوسیوە بەڵام من لەو لە مەجالە کورتەدا تەنها بەچەند وشەو دێرێک بۆچونەکانیان بەکورتی دەخەمە پێش چاوتان ....
ئانتۆنیۆ نێگری //
کۆمەڵناس و فەیلەسوفێکی سیاسی مارکسیستی ئیتاڵیە لەبارەی ئۆجالانەوە دەنوسێت ؛ زیندانییەک دەبێتە ئەفسانەیی ...! خوێندنەوەی کتێبەکانی ئۆجالان شتێکی سەرسوڕهێنەر و ناوازەیە ، کەسێک لەزینداندا گۆڕەفشار درابێت و لەژێر باری هەلومەرجێکی دژوار و مەحاڵدا ، ئینجا بتوانێت پەرە بە بیرۆکەیەک بدات هەموو بەربەستەکان تێکبشکێنێت .
ئانتۆنیۆ پێیوایە؛ ئۆجالان بەجۆرێک شێوازی بەرهەمهێنان و ڕێبازێکی مەدەنیی و ئەخلاقی خولقاندوە و ڕیشەی شارستانیەتی تاوتوێ کردوە ، جێگای سەرسوڕمان و تێڕامانە بەو جۆرە باسی مێژووی هیندو زمانە ئاریانیەکانی کردوە کە میتافۆڕێکی یەکجار گەورەیە و پارادیگمایەکی شاراوەیە. پێیوایە ؛ بۆچوونەکانی سەدان فرانسیس فۆکۆیامای پوچەڵ کردوەتەوە کە پێیانوابوو؛ مۆدرنیتە دوایین قۆناغی مێژوی سیستەمی حوکمڕانییە.
ئانتۆنیۆ نێگری پێیوایە: سیۆرەکەی ئۆجالان ڕێبازێکی نوێیەو لەمێژوودا هەستی پێنەکراوە ...
دیڤد گرەیبە
مرۆڤناس و چالاکوانێکی سیاسیە لە لەندەن-ی (بەریتانیا) دەژیی و لەقوتابخانەی ئابوری لەندەن پڕۆفیسۆرە و لە شیکاگۆ-ی (ئەمەریکا) خوێندویەتی دەڵێت ؛ من سەرسامم بەتواناکانی ئۆجالان، بەڵام ئەکادیمییەکان نازانن چ لە بیرمەندێک بکەن کە بەشێک نەبێت لەئەکادیمیای ئەوان ، یان جیاواز بێت لە گەمەی بازاڕی ئەوان .
پێشیوایە؛ هێزێکی قوڵ و جیاواز و سەرسامکەر لە نێوان ئۆجالان و ئەواندا هەیە و زۆر قوڕسە بتواندرێت کارەکانی ئۆجالان پێوەر بکرێت و مەزنترین بزوتنەوەی شۆڕشگێڕی بە شێوەیەکی واقیعی لەبیرەوەری تازەی مرۆڤایەتیدا سەلماندوە.
ڕادها دیسۆزا
ئافرەتێکی بلیمەتی هیندستانە ، لێکۆلەر و پارێزەر و نوسەرە، لە نیوزلەندا و بەریتانیا ژیاوە ٫ دوایین کتێبی کە نوسیویەتی سەرمانشێتەکەی بەم ناوەیە (چی بەسەر مافدا هات؟ ).
ڕادها دیسۆزا، لەبارەی ئۆجالانەوە دەڵێت : کاتێک ئەم پێشەکیە دەنوسم بیر لەوە دەکەمەوە ئەگەر ڕۆژێک لە ڕۆژان لەگەڵ ئۆجالان دابنیشم، بەدەم چا خواردنەوە قسە لەسەر ئەو بابەتانە بکەین کە ئۆجالان لەکتێبێکدا نوسیونی، دەبێ هەستم چۆن بێت ؟! ڕادها دیسۆزا دیسان دەڵێت: تەنها جێگایەک هەیە بۆ ئۆجالان کە بۆچوونەکانی خۆی لەبارەی دەوڵەت و کێشەکانیەوە بگەیەنێتە ڕای گشتیی جیهانێک کە دیموکراسیی و ئازادی تێیادا زیندانی کراوە ، ئەویش کونجی زیندان و دادگایەکی ناعادیلنەیە کە ئۆجالانی تێدا لە خاچ دراوە . پێی سەیرە بۆچوونەکانی لەخاچدراوێک دەبێتە هەڕەشە لەسەر ئاسایشی ئەو هەموو زلهێزانەی کە خاوەنی گەورەترین عەمباری چەک و تەقەمەنین و دەڵێت: ئەوەی مایەی شادییە بۆ من ئۆجالان سەلماندویەتی کە گوتراوە "پێنوس لە شمشێر بەهێزترە". دیسۆزا دەڵێت : من تەنها وەک ژنێکی باشوری ئاسیایی دەتوانم لەم کۆمەڵە وشانەی نوسینەکانی تێبگەم کە وەک سەرچاوەی مێژوو ، ڕووداو ، چیرۆک ، ئارگیۆمێنت و زۆرشتی تر سەرچاوەی مەعریفە هاوبەشەکەمانن لە ڕۆژهەلاتی ناوەڕاست .
پیتەر لامبۆرن ویلسن
نوسەر و وەرگێڕی زیاتر لە پەنجا کتێبە لەبارەی ئەنارشیست و هونەر، دەڵێت : لەم دواییەدا بە ئەزمونێکی دەگمەن و سەیردا تێپەڕیم ئەویش بە خوێندنەوەی کتێبی نوسەرێک کە ناوی عەبدالا ئۆجالانە کە لە ساڵی 1999وە لەزیندانێکی تاکەکەسی لەدورگەی دەریای مەڕمەڕەی تورکیادا گۆشەگیرکراوە. ویلسن دەڵێت: وامدەزانی تەنیا من لەو جیهانەدا بیرم لە میتۆلۆژیای سۆمەریەکان دەکردەوە کە هەر لە منداڵیەوە ئەنارشیست بووم و بایەخم بەدیداری سۆفیەکان دەدا کە ڕاهاتبوون چەقۆ بەڕوومەتیاندا بکێشن ، بەدەست دووپشکیان دەگرت و گلۆپیان دەکرۆشت.
دەڵێت: دەمزانی کورد گەورەترین نەتەوەن لەجیهاندا دەوڵەتیان نییە ، بەڵام پێشتر هەرگیز بایەخم بە پەکەکە نەدەدا، گومانی ستالینزمم لێدەکردن ، لەم دواییەدا بەهەندێ بابەتی دلڕفێن ئاشنابووم ، سەرسام بووم کە ئۆجالان مارکسیزم و هەمووو فەلسەفەیەکی تێپەڕاندوە .
ویلسن شانازیش بەوە دەکات کە پێیوایە ؛ نوسینەکانی ئۆجالان ئیلهامبەخشن ، کەمێکیش لەمارکۆس و مۆرای بۆکچینو لەخۆیەوە نزیکن و سەرسامە بە سیۆریەکەی ئۆجالان کە ئازادی لە خودی تاکدا دەست پێدەکات بەشێوەیەی دیموکراتیک کۆلەکتیڤ هەرەوەزیانە بەرجەستەی دەکات و بەئیرادەی تەواوی کۆمەلگە و ئازادی ژن و فیمینیزمی دەبەستێتەوە ...
فابیان شیدلەر
گەورە بیرمەندی ئەڵمانیا خاوەنی باشترین کتابە لە سەر ئاستی جیهان کە کتابی کۆتایی دەزگا زەبەلاحەکە و مێژووی شکستهێنانی شارستانیەتی جیهانی نوسیوە ، لەبارەی شۆڕشی ڕۆژئاوای کوردستان لە ژێر ناوی ڕۆژئاڤا یان تێپەڕاندنی شارستانیەتێک لەسەروبەندی داڕماندا ، بەدرێژی باسی ئۆجالان دەکات و باس لە هەڕەشەکانی مۆدرنیتەی سەرمایەداری دەکات بۆ سەر تەواوی ئەم هەسارەیە ، تەنها ئومێدێک لە شێوازی تێکۆشانی بزوتنەوەی ئاپۆچیەکان بەدی دەکات لە سوریا و دەڵێت: نەخشە ڕێگا و بزافی شۆڕشی ئازادیخوازانی کورد لە باکوری سوریا نەک تەنها بۆ تێپەڕاندنی ئازادی لەو هەرێمەدا گرنگە ، بەڵکو بۆ تێپەڕاندنی سیستەمی سەرمایەداریش گرنگە، ئەو سیستەمەی کە پێنج سەد ساڵە بەتوندوتیژی وەکو ئامێرێکی زەبەلاح جیهانی وێرانکردوە و هەڕەشە لە سروشتیش دەکات تێکی بدات . بۆیە شیدلەر بەپێویستی دەزانێت ؛ فەلسەفەی ئاپۆ بکرێتە مۆدیلی خۆبەرێوەبەرایەتیی کۆمەڵگە و گەلان و دەڵێت: چاوم لە ئومێدە سیۆرەکەی ئۆجالان بەگەردوونی بکرێت، بەڵکو لەم ڕەشبینیە دەربازمان دەکات ، کە مرۆڤایەتی خستۆتە ناو گێژاو ...
ئاڕنالدۆ ئۆتێگی
تێکۆشەر و زاپایستێکی وڵاتی باسکە و لە زیندانی لۆگڕۆنۆ لە ساڵی دووهەزار و یازدەوە لەبارەی ئۆجالانەوە دەنوسێت و لەبارەیەوە دەڵێت : بۆمن مایەی شانازیە لەکاتێکدا لەْزیندانی لۆگرۆنۆ-ی (ئیسپانیا)دا لە سەر چالاکییە سیاسییەکانم ڕۆژانم تێدەپەڕێنم ، لەو کاتەدا کتابی نەخشە ڕێگا بۆ دانوستانەکانی ئۆجالانم بەزمانی ئیسپانی بەدەست گەیشت ، کە بەداخەوە جگە لە فاشیەتی تورکیا هیچ کەسێک زانیاری لەبارەی ئۆجالانی فەیلەسوفدا نییە .ئاڕنۆلدۆ دەڵێت : سەرەتا دەمەوێت لەلایەن چەپی بێرچالی وڵاتی باسکەوە سڵاوێکی شۆڕشگێڕانە بۆ هەڤاڵ و هاوخەباتم ئۆجالان و گەلی کورد بنێرم . دیسان بەسەرسامیەوە دەڵێت ؛ سەبارەت بە نەخشە ڕێگاکەی ئۆجالان شتێکی زیادم نییە بیڵێم و پێشکەشتانی بکەم جگە لە نیشاندانی ڕێزو خۆشەویستیم ....
دۆنالد ئێچ ماتیۆس
وەزیری کلێسای میتۆدیستە لە زانکۆی شیکاگۆ-ی ئەمەریکا، دکتۆرای ئیلاهیاتی بەدەستهێنناوە ، خاوەنی چەندین کتابە و سەبارەت بە ئۆجالان دەنوسێت: بەندەوارێک بەپەیامێکی پەیامبەرانەوە بەدیدی سیاسەتێکی مەزنەوە لە دورگەی ئیمرالیدا لەدژوارترین دۆخدا ، سەرکردەایەتیی بزوتنەوەی ڕزگاریخوازی کوردەکان دەکات و وزە و تێزە فیکریەکانی دەبێتە مایەی سەرهەڵدانی کوردەکان لەهەمبەر زوڵم و ستەمی ئەردۆغان . وەک ڕابەرێکی بەرپرسیار و ئازا و سەرسوڕهێنەر دەبێتە داینەمۆی شۆڕشگێڕەکانی باکوری سوریا و بەرگری قارەمانانەی کۆبانێ . سەرنجی دنیا ڕادەکێشێتە سەر خەباتی دەستەجەمعی . ئاپۆچیەکان هەموویان ئامادەن لەپێناو کۆنفیدراڵیزمی دیموکراتیکدا بمرن . دڕێژە بە نوسینەکانی دەدات و دەڵێت : شۆڕشی ڕۆژئاوا بەتێرمی ئۆجالان پڕۆژەیەکی خۆڕسک و دیموکراسیی ڕاستەقینە پێشکەش دەکەن و دەوڵەت نەتەوە پێناسە دەکەنەوە ک، دەبنە وەڵامێک بۆ هەموو ئەو ململانێ ناشیرنانەی ڕۆژهەڵاتی ناوەڕاستیان وێران کردوە . دەڵێت ؛ جێگای سەرسوڕمانە ئۆجالان توانیویەتی دیلیەتیی زیندان بگۆڕێت بۆ ئازادی ڕەهایی و عەقڵ ....
ئێکە هارد ساوەرمان
پڕۆفیسۆری ئەلمانی سۆسیۆلۆژ و سیۆریناس دەڵێت: هەرچەند ئۆجالان ڕووبەڕووی هەڕەشەی توند و لەناوبردن کراوەتەوە ، سەرەتا بەلەسێدارەدان حوکم دراو و ئێستاش دوور نییە هەر ئەوە چارەنوسی بێت ، هەرچەند لە دۆخێکی دژواردایە، بەڵام تێڕوانین و توانا نائاساییەکانی شۆک هێنەرن. درێژە بە نوسینەکانی دەدات و دەڵێت : ئۆجالان بە قوڵی ڕووچووەتە ناو مێژووی ململانێی شارستانیەتەوە ، بیرێکی ورد و قووڵ لە بەڵگەنامەی مێژوویێکی کاریگەر نمایش دەکات . سەیرە نیگاکانی سنوری تەنیایی و گۆشەگیری تاکەکەسی دەبڕن ، لەناو بازنەی پاسەوانە سەربازیەکانیشدا دێژە بە جەنگی مانەوەی فیزیکی، ڕوح و جەستە و دەرون دەدات و تێزە فیکریەکانی سەردەکێشن بۆ ژیان و ڕزگاری خەڵکی کوردستان و ڕۆژهەڵاتی ناوەڕاست، بەگشتیش هیومانیزم بۆ هەموو جیهان .
دەڵێت : لەناو جەنجاڵی گەورەکردن و مۆنۆپۆلکردنی بیروڕاکانیدا ڕێگاچارەی خولقێنەرانەی دۆزیوەتەوە ...
نورمان پیشی ئەڵمانی
پڕۆفیسۆری زانستە سیاسییەکان و ئابورییە و سەرنوسەری گۆڤاری وەرزنامەی یاسایە ، زەمانێک ئەندام پەرلەمانی ئەلمانیاش بووە، لەبارەی ئۆجەلانەوە دەنوسێت ؛ دوای ناچارکردن و دەرکردنی ئۆجالان لەسوریا و هاتنی بۆ ئەوروپا ئامانجی سیاسی بەرزکردنەوەی کەیسەکەی گەلی کورد بوو بۆ ئەوروپا . ئۆجالان دەیویست پرسی کورد بەشێوەیەکی فراوان بخاتە پێش پرسی فەلەستین و عێراق ، بۆ ئەوەی پرسی گەلەکەیان لەبیر نەکرێت ، چونکە ئۆجالان پێیوابوو ؛ ئەم پرسە تەنیا پرسی کەسێک نەبوو تا بچێتە چیاکان . بەڵام دواتر لە دوای ڕادەستکردنەوەی بەدەوڵەتی تورکیا ، سەرەتا بڕیاری لەسێدارەدانی چاوەڕوان دەکرا ، لەهەمانکاتیش ناوی پارتەکە بۆ کۆنگرەی ئازادی و دیموکراتی KADEK گۆڕابوو ، هەر دەبوایە ئۆجالان ئەم ڕێڕەوە بگرێتە بەر نەک بۆ ئەوەی خۆی لەسێدارەدان ڕزگار بکات ، هەرچەند بڕیاری لەسێدارەدان لە تورکیا لە جێبەجێ کردنەکەی ئاسانترە ، بەڵام دەشێ پڕۆسەی فڕاندنەکەی لەبەردەم دادگا بە نایاسایی لە قەڵەم بدرێت .....
جۆن هالۆی
پڕۆفیسۆری کۆمەلناسی مەکسیکە، سەبارەت بە ئۆجەلان دەڵێت ؛ لەکاتێکدا کە دەبینین چۆن پارچە پارچە دەبین و زۆرینەمان لەناو سیستەمی سەرمایەداریدا دەتوێینەوە و ئومێدەکان لەدەست دەدەین ، بەشانازیەوە دەمەوێت خۆم هەڵدەمە ناو ئەو پاسەی ئۆجالانی تێدایە بەر لەوەی بڕوات . سەرەتا بەکەسێکی شارەزا لەڕادەبەدەر سەرسامم ، بۆ من گەورەترین شانازییە بەخوێندنەوەی ئۆجالان ئاشنابم و شتێکی بۆ بنوسم کە توانا و هەستیاریەکی ناوازەی هەیە ، لە شەوانێکدا کە تا دێت تاریکتر و تاریکتر دەبن پێویستمان بەم جۆرە تەقینەوەیە هەیە کە ئاسمانمان بۆ ڕووناک بکاتەوە ، هیوامان بۆ دەگێڕێتەوە ، بە شۆڕشی ڕۆژئاوا سەرسامم هیوادارم شوفێری سەرنوسەری پاسەکە ڕێگام پێ نەگرێ کە پێشەکیەک بۆ کتابێکی ئۆجالان بنوسم و پڕ بەدەم هاوار دەکەم؛ بەڵێ بەڵێ بۆ شۆڕشی ئێوە ....
چەندین کتاب و بابەتیان لەسەر ئۆجالان نوسیوە و ئەمەیان چەند دێرێک بوو .
شەرمەزاری بۆ کۆمپلۆی نێودەوڵەتی پازدەی شوبات ، بمرێ فاشیزمی تورک،
ئازادی بۆ ڕێبەری گەلان ئۆجالان
نوسەر و پێشمەرگەی دێرین، قەهار گەزنەیی
٭ لە فەیسبوکی نوسەرەوە وەرگیراوە
هـ.هـ
