گەلی كورد نەورۆز، بەرۆژێكی نوێ و سەرەتایی نوێ لەساڵ دەبینێت. بەڵام لەهەمانكاتدا نەورۆز بۆ گەلی كورد خاوەن پاشخانێكی مێژوویی، سیاسی، كۆمەڵایەتی، رێكخستنی و یەكگرتن و پەیام و بەرنامە و پرۆژەی دەستپێكردنی قۆناخێكی نوێ لەژیانی هاوبەش لەگەل گەلانی دراوسێیە. گەلی كورد ئەمساڵ لەهەموو ساڵانی تر، بەگەرم و گوڕتر جەژنی نەورۆز و سەری ساڵی كوردیان پیرۆز كرد و پەیامی یەكگرتن، پێكەوەژیانی ئاشتیانەی گەلان و ئاڵای بەرخۆدانیان گەشاندەوە. لەهەرقۆژبنێكی كوردستاندا گوند، شار، شارۆچكە، ناحیە و شارەدێیەكاندا بەجل و بەرگی كورد و بەحەماسەتێكی كوردانەوە، شانبەشانی یەكتر بەژن و گەنج و پیری خۆیەوە پەیامیان بەدۆست و دوژمن دا. نەورۆز سیمبۆلێكی نەتەوەیی و پرۆژەیەكی نەتەوەیی و دیموكراتیكی كوردە بۆ پێكەوەژیانی ئاشتیانە و دیموكراتیانە لەگەڵ پێكهاتە و گەلانی تری ناوچەكە و جیهان.

گەلی كورد لەنەورۆزی ئەمساڵدا "٢٧٢٤"ی هەتاوی بەئاشكرا و روون، رایانگەیاند كە كوردان لایەنگری ئاشتی و پێكەوەبوونن لەگەڵ گەلانی تری ناوچەكە و لەدژی شەڕ و ناكۆكی و ناتەبایی و ناسەقامگیرین. هەروەها ئەوەشیان راگەیاند كە گەلی كورد نەتەوەیەكی ئاشتیخوازە، بەپێچەوانەی ئەوەی دەوڵەتانی داگیركەری سەركوردستان هەمیشە هەوڵدەدەن كوردان وەها وێنا بكەن كە گوایە كورد نەتەوەییەكی ئاژاوەگێڕ و جیاخوازە.

لەپەیامەكانی نەورۆزی رۆژهەڵات، ژنان و گەنجان لەریزی پێشەوەی پیرۆزبایەكان بوون و بەبێ سڵمێنەوە بەشەكاندنەوە و بەرزكردنەوەی سیمبۆلە نەتەوەییەكان، مەشغەڵی ئاگریان هەڵكردبوو و پڕ بەگەروو هاورایان دەكرد، بەرخۆدان ژیانەو خۆبەدەستەوەدان مردن. بژی پێكەوەژیانی ئاشتیانە و دیموكراتیانەی گەلان، لەچوارمەحاڵی بەختیاری، لۆرستان، ئیلام و كرماشانەوە بگرە تا ورمێ، خوی، سەلماس، ماكۆ و دەرگای ئەسەندەرە بەیەك دەنگ دروشمی بمرێ فاشیزم و دیكتاتۆری و نا بۆ گرتن و لەسێدارەدان و  حیجابی زۆرە ملێ و فتنەو پارچەكردنیان دەگووتەوە.

دایە شەریفە دایكی شەهید رامین حوسێن پەناهی لەشاری دێولان بەئاگرتێبەردانی پەتی لەسێدارەدان، پەیامی ئەوەی دا كە گەلی كورد، سیاسەتی لەسێدارەدانی رۆڵەكانیان قەبووڵ ناكات و دەبێت لەسێدارەدانی رۆڵەكانی گەلی كورد بەزووترین كات هەڵبوەشێندرێتەوە و رژێم و دەوڵەتی ئێران داوای لێبوردن لەگەڵی كورد و گەلانی تری ئێران و تایبەت لەدایكان و ژنان بەگشتی بكات. هەروەها پەیامێكی تری نەورۆزی كوردەواری، خاوەنداری كردن بوو لەچاند و كەلتوری رەسەنی كوردی. بەجل و بەرگی كورد و شاڵ و شەپك و سەروێن و مێزەرە و دەست لەنێودەستی یەكتر و داگیرساندنی ئاگر لەچوارشەممە سورێ"كۆتا چوارشەممەی ساڵ"، تا سێزدە رۆژ دوای سەری ساڵی نوێ، نزیكەی یەك مانگ بەبەرێوەبردنی مەراسیمی جۆراوجۆر هەم كەلتور و چاندی خۆیان نمایش دەكەن و هەم پەیامی ئەوە دەدەن كە كەس ناتوانێت كوردان لەچاند و كەلتوری هەزاران ساڵەیان داببڕێت.

راستەبەهۆی سیاسەتەكانی سیستەمی دەسەڵاتداریەتی پیاوەوە و سیاسەتی توانەوە و ئاسیمیلاسیۆنی زۆرەملێیانەی دەوڵەتان لەسەر گەلی كوردەوە، تا ئاستێك كوردانیش لەچاند و كەلتوری راستەقینەیان دابڕاون، بەڵام بەهۆی دەوڵەمەندی و فرەچاندی كۆمەڵگەی كوردی، نەتوانراوە بەگشتی كۆمەڵگەی كورد لەبۆتەی خۆیاندا بتوێننەوە. لەبەر ئەوەش گەلی كورد هەركات دەرفەت و هەلێكی بۆ رەخسابێت، بەباشترین شێوە مۆمارسەی مافە دیموكراتیەكانی خۆیان كردوە و پەیامی خۆشەویستی و پێكەوەییان بەگەڵ گەلان و پێكهاتەكانی تری دراوسێ خۆیان داوە. كورد گەلێكی ئاشتیخواز و نیشتیمانپەروەرە و ئامادە نییە بەهیچ نرخێك دەست لەئاو و خاك و هەوا و چاند و كەلتوری خۆی بەربدات.

گەلەكەمان لەرۆژهەڵات و باكور و رۆژئاوا و باشور لەپەیامی نەورۆزی خۆیاندا، بەئاشكرا بەهەرچوار دەوڵەتی تورك، ئێران، سوریا و عێراقیان راگەیاند، كورد نەكوردی پێشوویە. كوردان ژمارەیان زیاتر لە ٥٠ ملیۆن کەسە و ئێدی لەوە تێگەیشتوون تاكە رێگەی چارەسەری پرسەكان بەرێگەی دیموكراتیك و ئاشتیانە و پێكەوەبوون و یەكگرتنە و سیاسەتی شەڕخوازانەی دەوڵەتە داگیركەرەكانی سەر كوردستان و پلان و پرۆژەی دەوڵەتان و هێزە هەژەمۆنخوازە جیهانیەكان و هێڵی نەتەوەپەرستی و دەوڵەتگەرا رەتدەكەنەوە. بۆیە دەبێت هەركەس بەو هەستیاری و جددیەتەوە نزیكی گەلی كورد ببێتەوە. ئەمڕۆكە ئەدی كوردی ئازاد بووەتە ناسنامەی نوێ رۆژهەڵاتی ناوین. ئەگەر ئەو دەوڵەتانەش دەیانەوێت لەرۆژهەڵاتی ناوین و جیهاندا ئاشتی و سەقامگیری و ئەمن و ئاسایش بەرقەرار بێ، دەبێت بەدروستی پەیامەكانی نەورۆزی گەلی كورد بخوێننەوە و بەپێ راستینە مێژوویی و كەلتوری و ئەخلاقی و سیاسیەكان مامەڵە لەگەل، گەلی كورددا بكەن. بەتایبەتی كوردان لەباكوری كوردستان بەو ورە و وزە و جۆش و خرۆشەی لەنەورۆزی ئەمساڵدا وەریانگرت، لەهەڵبژاردنە هەرێمیەكان ئەو پەیامەشیان بە دەوڵەتی داگیركەری تورك و حكومەتی ئاكەپە ـ مەهەپەیاندا كە ئەوان سیاسەتی قەیم"سەروەسیەت"و دیكتاتۆریانە و فاشیستانە پەسەند ناكەن و جارێكی تر بەرێوەبردنی شارەوانیەكانیان لەهەڵبژاردندا گەڕاندەوە بۆ خاوەنە راستەقینەكانی خۆیان.

لەرۆژئاوای كوردستان و باكوری سوریا، لەشاری دێركەوە بگرە تا رەقە و دێرەزوور و شەهبا و عەفرین و حەلەب و شام، گەلی كورد بەرژێمی سوریا و گەلانی سوریادا كە گەلی كورد، لایەنگری یەكگرتوویی و پێكەوەییە لەگەڵ گەلانی تری سوریا و لەدژی پارچەكردن و جیاخوازییە، بەڵام لەهەمانكاتیشدا دەستبەرداری مافە دیموكراتیەكانی خۆی نابێت، دەبێ رەچاوی دۆخی كوردان بكرێت. كوردان خاوەن سیستەمێكی بەرێوەبەرین. ئەو سیستەمە یەكێتی گەلانی سوریا دەپارێزێت و گەرەنتی پێكەوە و ئاشتیش مسۆگەر دەكات، بەمەرجێك دەوڵەت و رژێمی سوریاش ئەو دەرفەتە بەهەل بقۆزنەوە و مامەڵەیەكی تەندروستانە لەگەل كورداندا بكەن.

پێكهاتە و گەلانی رەسەنی عێراق و دەوڵەتیش دەبێت هەوڵی دانۆستاندنی راستەقینە لەگەڵ مۆخاتەبی چارەسەری پرسەكاندا بدەن. گەلانی عێراق لەماوەی ئەم بیست ساڵەی دوایی زۆر و زەحمەتی و ماڵوێران و برسیەتی و كۆچبەری و كۆمەڵكۆژی زۆریان بینی. ئەدی كاتی هاتووە، بەئەقڵێكی سەلیم و دیموكراتیانە نزیكی پرسە هەڵواسراوەكان ببننەوە و ئەزموونی شكستخواردووەكانی پێش خۆیان تاقی نەكەنەوە. لەگەل دەوڵەتانی داگیركەری سەر كوردستان، بەتایبەتی دەوڵەتی داگیركەری تورك و حكومەتی ئاكەپە ـ مەهەپە دژ بەكوردان هاوپەیمانی دروست نەكەن. دەوڵەتی داگیركەری تورك سەد ساڵە بووەتە بەڵا لەرۆژهەڵاتی ناوین. كارێكی تێكبەردانی گەلانە لەبەرامبەر بەیەكدی. دەوڵەت و حكومەتێكی بەكرێگیراوی سیستەمی دەسەڵاتداریەتی جیهانیە. پرۆژەی دژە ئاشتی و دیموكراسی و پێكەوە ژیانی گەلانە.

ئەمڕۆ لەرۆژئاوای كوردستان پرۆژەی نەتەوەی دیموكراتیك هەموو پێكهاتە و گەلانی باكوری سوریای بەدەوری یەكتر كۆكردوەتەوە. بەڵام دەوڵەتی داگیركەری تورك و سیستەمی دەسەڵاتداریەتی جیهانی چاویان بەیەكگرتنی گەلان هەڵنایەت. نەورۆزی ئەمساڵی كوردانیش بەگشتی پەیامی یەكگرتن و پێكەوەیی و ئاشتی و دیموكراتی كوردان بوو بۆ گەلان و دەوڵەتانی هەرێم و جیهان.

هـ . ب